ABEKHIT 12 - AMÜSÜH HÜM CL Bible (BSI)

Phungho-thünio

¹ Kheakü Atungpuhnü Ijip lomi ching Mosa tüsho Aron ki tha,

² “Ha khinu ha nüsa thsungkheaknü kam yo akhuhbe khinu labah.

³ Israel amukhungrü alala ki thaang: Ha khinu thürü nipü mihtsürü abannü nihbuh yambuk thsungkheak bebuhrü yamkhün ayannü namfimihnunu khülang lubah.

⁴ Tüsho namfimihnunu khülang thsungkheaknü yambuk ju khide nunusho, mihtsürü khekhi ayannü nihbuh yamhingrü ki rukhüh chamachihpü kuklah. Mihtsürü khülangnü atsühpü akhude namfimihnunu ju kheang.

⁵ Nüsa namfimihnunu ju kam khülang bankhi lapha mükihkhi pung labeah. Nüsanü namfimihnu yungsho mihnu bolungnü alupü kuklah.

⁶ Nüsanü haju khinu thürükheak phüyi ni khiungde zoang. Jushu Israel amukhungrü alalanü shuhyini lachoki ju laksahbah.

⁷ Tüsho arünü athiyih khürü lubah arünü atsühpung thüyam ripit dungjing le ripit kumungbo kheak yihkihbah.

⁸ Ju re arünü ashihtsü tsühbah; mo chingnü angukhi, phaüm muyukkhi tüsho akhüh sangyü bede arünü ju tsühbah.

⁹ Arhangnü yungsho ke ching khiungbah dütsüh, tüshe aku, ajingbo tüsho bukningbo bede ngubah tsühang.

¹⁰ Nüsanü ju yapsu khiungde daningshih, tüsho yapsu khiungde aningkhi a takabahang.

¹¹ Hanangde nüsanü atsühbah: nüsa chim kheak pangrümpü kihbah, nüsa jingkhümpü khümbah, tüsho nüsa khah ching tso shuhbah. Nüsanü ju niokheamde tsühang. Ha Atungpuh phunghothünio ah.

¹² Tümütüsho ju tsüngre I Ijip lomi hode ayübah tüsho Ijip lomi ching adüjirü, mihtsürü tüsho shiwüh chido laksahbah; tüsho Ijip thrünpuhbo alala azhihde inü mahkhapbah: I Atungpuh ah.

¹³ Kheakü nüsa lakhi yambo kheak thiyih ju nüsa thsungkheak amütsan khülang thsübah. Küyimki inü thiyih ngübanü inü nüsa phunghode ayübah; tüsho inü Ijip shikchoki nüsa dükheakpü arüm ju nüsa kheak mülade alabah.

¹⁴ Jumonü ha nüsanü mümihkhi nimung khülang labah; tüsho nüsa lünbo ching nüsanü Atungpuh ki akheam mülakhi yuzüng kamde thüniode alabah.

Phaüm Muyukkhi Yikhap Thünio

¹⁵ “Nüsanü nimung thüne phaüm muyukkhi yikhap tsühbah. Akhuhbe nimung nüsanü nüsa yambo chingnü phaüm yihkhita bahang. Tümütüsho shepünü akhuhbe nimungnü thüne ni khiungde phaüm yukkhi yikhap tsühbanü, ju mihtsürü Israel chingnü khekhita bahbah.

¹⁶ Akhuhbe nimung tüsho thüne nimungpü nüsa thsungkheak amüsüh amukhung labah. Ju nimungbo ching rhimo tümü düthsü; tüshe mihbüm abannü nihbuh küdah thsüde mozümodokhi lang atsühbah.

¹⁷ Jumonü nüsanü phaüm muyukkhi thünio mungbah, tümüde ha nimung ching inü nüsa bonungrü Ijip lomi chingnü abekhitkheah. Jumonü nüsanü ha nimung ju nüsa lünbo alala ching akheam müla yuzüng kamde mungde laang.

¹⁸ Akhuhbe khinu, thürükheak phüyi nipü arelimnü mukukheak khülang ni arelim khiungde nüsanü phaüm muyukkhi yikhap tsühbah.

¹⁹ Nimung thüne nüsa yambo ching phaüm müngüshih, tümütüsho shepünü phaüm yukkhi tsühbanü, khiungkerü yungsho ha lo ching asürükhi thsüthsü ju mihtsürü Israel amukhungrü bolungnü khekhita bahbah.

²⁰ Nüsanü phaüm yukkhi tümü she mütsüh; nüsa lapung alala ching nüsanü phaüm muyukkhi yikhap tsühbah.”

²¹ Judüki Mosanü Israel azothsürübo alala jibah tha, “Nüsa yamkhünbo ayannü nüsa thsungkheak namfimihnunu mokhitang, tüsho phungho-thünio namfimihnunu laksahang.

²² Tüsho nüsanü monam düchi khülang lubah müsühmüraphuru ching lakhi thiyih ching thsamang, tüsho ripit kumung le khimdopü dungjing mahne kheak rhapkihang. Tüsho nüsa sheshe ha yam ripit hode yapsu khiungde duwukhiuk.

²³ Tümüde Atungpuhnü Ijiprü laksahpü hode ayübah; tüsho apinü ripit kumung le dungjing mahne kheak thiyih ngüsho, Atungpuhnü ripit hode ayübah tüsho athsümünimrü nüsa yambo ching alaksahpü mazahshih.

²⁴ Tüsho nüsanü ha nüsa le nüsa tsührübo thsungkheak lünnü thiyuzüng kamde aleangkhibah.

²⁵ Küyimki Atungpuhnü nüsa jihpü alokhikhi lo ching arübanü, nüsanü ha mukhung laang.

²⁶ Tüsho küyimki nüsa tsührübonü akeoba, ‘Ha mukhungkhi amütsan tümü a?’

²⁷ Nüsanü athabah, ‘Ijip ching apinü Ijiprü laksahchoki Israelrü yambo phunghode yübah isa yambukbo khümkhitkhi Atungpuh kilim phungho-thünio laksah-a kingaünkhi ah.’ ” Jumonü mihtsürübonü khukning tüsho kingaün.

²⁸ Judüki Atungpuhnü Mosa tüsho Aron ki thiyukhüm jihkhi nangde Israelrünü yü tüsho jude rhimo.

Adüjirü Shekhi

²⁹ Ijip ching adüjirü kiulongthsübinkiu kheak binkhi Pharao tsührünü rhede aramrü amiting ching larü adüjirü tüsho akhuh anukhi shiwüh Atungpuhnü tsüngphulung ching laksah.

³⁰ Jumonü Pharao, api yamlarübo tüsho Ijiprü alala azhing ching asürü; tüsho Ijip ching tripachihkhi ato lakheah, tümüde mihmüshekhi yam khülang she mülade alakheah.

³¹ Judüki apinü azhing ching Mosa tüsho Aron büne jibah tha, “Asürang tüsho nü le Israelrü I mihtsürü bolungnü tsoang. Tüsho yüang, nüsanü athakhi nangde Atungpuh tankihang.

³² Kheaküshe nüsanü athakhi nangde nüsa mihnu tüsho moshi boto bebah yüang; tüsho I she müngühjang.”

³³ Ijiprünü mihtsürübo ki arü lomi niokheamde bahbah atsopü tuthsuk. Tümüde arünü tha, “Isa alala ashebah.”

³⁴ Jumonü mihtsürübonü phaüm muyukkhi yikhap neamkhi lu, tüsho yikhap neam-phuru khim chingnü hinga arü dubuh kheak han.

³⁵ Kheakü Israelrünü Mosa yu yande rhimo, tüsho arünü Ijiprü ki shotoyinchi le suna kukrukbo tüsho khimmihbo kheang.

³⁶ Tüsho Atungpuhnü Israel kheak Ijiprünü wüntre jihshihde kam, junangde arünü amushukhi arünü alojih. Hanangde Israelrünü Ijiprü lakhit hanbah tso.

Israelrü Ijip chingnü Atsokhi

³⁷ Judüki Israelrünü azürü aliberü mükhede mihtsürü 600,000 bande jingnü Rameses chingnü Sukkoth khiung.

³⁸ Püpürü mihtsürü boto ato tüsho namfimihnu le mihnubo tüsho moshibo arü lung yü.

³⁹ Tüsho arünü Ijip chingnü hanbah akhiukkhi phaüm muyukkhi yikhap ju nung; ha phaüm muyukyide alakheah, tümütüsho arübo Ijip chingnü ayankhitkhinü maleangkhuk yungsho arü tsühyungbe mütsanglungbit.

⁴⁰ Kheakü Israelrü ju Ijip ching kam 430 lakheah.

⁴¹ Kam 430 akheam nimung, Atungpuh mihtsürü trükbo alala Ijip chingnü wukhiuk.

⁴² Ha tsüngre ju arü Ijip lomi chingnü bede akhiukkhi thsungkheak arüngako lakheah. Ha Atungpuh tsüngre ju Israelrü alalanü arü lün amuyung arüngakopü lakheah.

Phungho-thünio Yuzüngbo

⁴³ Tüsho Atungpuhnü Mosa le Aron ki tha, “Ha phungho-thünio yuzüng labah: Khiungkerü shenü ju mütsüh.

⁴⁴ Tüshe shonü athulokhi yamlarübo küyimki nünü api tsütabahbanü, jushu apinü atsühbah.

⁴⁵ Tsotsahrü tüsho amulokhi yamlarünü ju mütsüh.

⁴⁶ Tsühyungbe alala mozümodopung yam chingnü tsühang; nüsanü shih tümü she wungdo dühankhit, yungsho arobo düyihshak.

⁴⁷ Israel trük alalanü ha arüngbah.

⁴⁸ Tüsho küyimki khiungkerü nüsa lung labah Atungpuh kilim phungho-thünio arüngbanü, athrürü alala tsütabahshang tüsho apinü phünide arübah shihcham lushang; tüsho api lomi ching asürükhi ruk labah. Tsütamübahkhi mihtsürü shenü she ju mütsüh.

⁴⁹ Lomi ching asürükhi tüsho nüsa lung lakhi khiungkerü thsungkheak yakzan khülang labah.”

⁵⁰ Atungpuhnü Mosa tüsho Aron ki thiyukhüm jihkhi nangde Israelrü alalanü rhimo.

⁵¹ Tüsho ju nimung ching Atungpuhnü Israelrü arü bonungrü ayannü Ijip chingnü bekhit.