2 TIMOTHI 4 - AMÜSÜH HÜM CL Bible (BSI)

¹ Inü nü Thrünpuh tüsho arhang larü le asherü thiyukhappü lakhi Jisu Khrista mikinü tüsho api arüpü lakhi tüsho api kiulongthsü dünkheaknü nü tuthsukchoh:

² Thiyu thsangyuthsangraang, akheahmünchi yungsho püpü kim ching niokheamang, münityukang, thürühang, tuthsukang, arümkheamang tüsho thsangyuang.

³ Thiyuro thsangyukhi mihtsürübonü marümkheampü kim arüchoh, tüshe nükhünbo rangrangde arü nihbuh künkhi ayede thsangyurübo bemukhungbah,

⁴ thiyuro anipü chingnü rholode atsobah, tüsho mümütsankhi yukhean ching mulong jihbah.

⁵ Nünü kamruhroro adüngakhiang, thsümütsü arümang, thsangyuthsangrarü rhimo thsang, nü tankih rhimo akuk ngüang.

⁶ Tümüde I a shuhmülanga kingaünkhi ching lah; I chamachihpü kim arüdo.

⁷ Inü thirithsü atsü keochihdo, inü alihkhi bando, inü akin zodo.

⁸ Kheakü Atungpuh, thiyuro-lungki mahkhapbuhnü ju nimung I kilim thsambah jihpü zowupung ching thiyuro-lungki kuthranbo zojihlah–I kilim lang yung tüshe api arüpü lakhi muzhode aleangrü alala kilim she ah.

Langzü Yubo

⁹ I kilim nahde arüpü nünü mürangang.

¹⁰ Tümüde Demanü kheakü ha lomi muzhode I bahbah Tesalonika ching yüdo; Kresen Galatia ching, tüsho Tita Palmatia ching yüdo.

¹¹ Luk lang I lung lah. Nü lung Mark bebah arang; tümüde I rungpü ching api khide yihnüpü lah.

¹² Inü Tykika Efisia ching yüshihdo.

¹³ Küyimki nü arübanü Troa ching Karpa ki zojihkhi pangkhümpü, hümbo she tüsho adungto thsüde shihküpnü athsükhibo lubah arang.

¹⁴ Shoto-yingkingrü Alexandernü I ki tode yuride rhimodo; api rhimobo dünkheak Atungpuhnü ajihlobah.

¹⁵ Nü she api dünkheak kümkangang, tümüde apinü isa thiyusheak müküpde azhihlah.

¹⁶ I akhuhbe alim thade alachoki shenü she I murung; alalanü I bahbah tsodo. Ju arü ki azhihkhi dülashih.

¹⁷ Tüshe Atungpuh I ki zhip tüsho khiungkerü alalanü asopü thsüde thiyusheak suhde azhiyukpü I kilim sühmüh jih, junangde kekhüzü mün chingnü I khümkhitdo.

¹⁸ Atungpuhnü amütsü lüpdükhi chingnü I bekhitbah tüsho api yinmi kiulongthsü thsungkheak I khümkhitbah. Api ki lünnü lün müretahshang. Amen.

Akheam Salüm

¹⁹ Priscilla le Aquila, tüsho Onesiphora yamkhün ki salüm thaang.

²⁰ Erasta Korint ching lah; Trophima tukthsüde inü Mileta ching zojihdo.

²¹ Nü tsüngkam müngühnü arüpü mürangang. Eubula, Puden, Klaudia tüsho keoniorü alalanü nü kilim salüm jihchoh.

²² Atungpuh nü me lung lashang. Nü lung amüthsüm laang.