2 TIMOTHI 2 - AMÜSÜH HÜM CL Bible (BSI)

Thiyuro Jisu Khrista Bonungrü

¹ Jumonü I tsah-a, Jisu Khrista kheak lakhi amüthsüm ching düküngang,

² tüsho thiyumütsan ahihdo mikinü nünü I kheaknü tümü sodünü püpürü ki thsangyukhukpü thiyuro lakhi mihtsürübo ki thiyiang.

³ Jisu Khrista bonungrü atsü nangde thsümütsü ching shihcham luang.

⁴ Bonungrü shenü she püpü boto rhimo ching marahrungchoh, tümütüsho apinü nihbuh limthorü atorü asühshihpü mulongchoh.

⁵ Jukthülahrü khülangnü thiyuzüng yande mazhihachihsho akuk kuthran müleangkhichoh.

⁶ Mürangde awochakrü thulu thsürünü hi akhuhbe shihcham lubeah.

⁷ Inü tümü thachonü lümakheahang, tümüde Atungpuhnü lüpdükhi ching nü kilim anikhitkhi mülüjihbah.

⁸ David kheaknü atrükkhitkhi, ashe chingnü arhang kamlokhi Jisu Khrista lümkhitang. Ha I yo thiyusheakatsü,

⁹ tümüde ha dünkheak I thsünüchoh tüsho khukshikrü nangde rhüka lah, tüshe Thrünpuh yu a mürhük.

¹⁰ Jumonü amokhitrü dünkheaknü inü lüpdükhi arümchoh, junangde arünü she Jisu Khrista ching lün müretah akhümkhit ngübah.

¹¹ Athakhi ju thiyuro: Isa api lung shea lasho, isa she api lung labah;

¹² isanü arümsho, isa she api lung kiulongthsübah; isanü api reanglosho, apinü she isa reanglobah;

¹³ isa thiyuro mülachoki, api a thiyuro labah, tümüde apinü aküdahnü amülim thsüpü mukuk.

Alungki Rhimorü

¹⁴ Arü ki ha lümkhitshang, tüsho atsü thsüpü yungde, anirübo lang athsümünimbe yubo atsangachih bahkhipü Atungpuh mikinü thaang.

¹⁵ Nü küdah thsüde tsülah dükhi khülang, machihde arhimorü tüsho thiyuro yu lungkide thsangyurü nangde Thrünpuh miki lang.

¹⁶ Amükinrü yu thakhibo bahkhiang, tümüde junü mihtsürübo alü amükinrü yakli lim bebah,

¹⁷ tüsho arü yubo mü nangde abubah. Arü bolung Hymenaea tüsho Phileta belah.

¹⁸ Arünü thiyuro limro bahdo tüsho isa arhang kamlopü dünjiabahdo de athakhinü khürü akin thsümünimjihchoh.

¹⁹ Tüshe ha amütsan bede Thrünpuh yo adüküng khimtan zhiplah: “Sherü api yoanü Atungpuhnü mükheahlah,” tüsho, “Atungpuh mung jirü abannü amülim chingnü chamkhishang.”

²⁰ Thüyam ato khülang ching suna tüsho shotoyinchi lang yung tüshe sang tüsho alo kukrukbo she lah, tüsho khürü adungto thsungkheak tüsho khürü mübanmukhiung thsungkheak lah.

²¹ Khürünü mübanmukhiungbe ching junü tsangkhitsho, api adungto ahoribe kukruk kambah, amüsühkhitbah tüsho thüyam putungrü ki rhimo atsübo thsungkheak thsakhamkhi yihnüpü labah.

²² Jumonü athunu shihkünkhi yakli chingnü tsokhiang tüsho atsangkhitkhi mulong chingnü Atungpuh ki jirü lungnü thiyuro-lungki, akin, amuzho tüsho mungtsü müshamang.

²³ Makhakhi tüsho akeangkeang atsangachih tümü düthsü, tümütüsho jurünü rukachih akhiukshihchoh de nünü mükheahlah.

²⁴ Tüsho Atungpuh tankihrünü a murukachihbeah tüshe mihbüm aban ki muzhode, thsangyurü thsüpü thülünde arümkheam,

²⁵ azhihrü ki azhihayihkhinü thsülangde alabeah. Khükijua, arü mulong müthripü Thrünpuhnü mülüjihbah tüsho thiyuro mükheahde akambah,

²⁶ tüsho arübo ju api lümkhi rhimoshihpü ramkhi amünean zheang chingnü atsokhitbah.