2 TESALONIKA 1 - AMÜSÜH HÜM CL Bible (BSI)

¹ Paul, Sila, tüsho Timothi kilimnü, Isa Abuh Thrünpuh tüsho Atungpuh Jisu Khrista ching Tesalonika borü kilim:

² Abuh Thrünpuh tüsho Atungpuh Jisu Khrista kilimnü nüsa kilim amüthsüm tüsho mungtsü laang.

Khrista Arüchoki Thiyukhapkhi

³ Keoniorübo, isanü nüsa thsungkheak alungki lakhinü kamruhroro Thrünpuh ki makshe jihpü lah, tümütüsho nüsa akin alü thsüde zokihpü, tüsho nüsa khülangnü khülang muzhoachihkhi ching alü kamchoh.

⁴ Jumonü nüsanü arümde alakhi thsümüchibo tüsho küpkhukbo alala ching nüsa akin düküngkhi thsungkheak isanü Thrünpuh borübo ching nüsa dünkheaknü kükheangchoh.

⁵ Ha Thrünpuh thiyuro-lungki yukhapkhi thiyumütsan ah, junangde küpü thsungkheak nüsa thsünüde lanü, nüsa ju Thrünpuh kiulongthsü thülünde akambah.

⁶ Tümütüsho Thrünpuh ju thiyuro lakhinü sherünü nüsa küpkhuk jihbanü apinü küpkhuk jihlobah,

⁷ tüsho thsünüde alarü nüsa le isa kilim sühakhim jihbah. Ha yinmi chingnü api yo wulakhi yunirübo lungnü mo trude Atungpuh Jisu amikheak akhiukchoki dünjibah.

⁸ Thrünpuh mümükheahrü tüsho isa Atungpuh Jisu thiyusheak-atsü mihyumanirü apinü thsümüchibah.

⁹ Arübo athsümünim tüsho Thrünpuh miki tüsho api wu müretah chingnü chamkhia bahkhi thsünü labah,

¹⁰ ju api yo amüsührübo kheak api müretahpü nimung api arüchoki tüsho akinrübo alala kheak amüyinsahpü lachoki labah, tümütüsho isanü nüsa ki thiyusheak thakhi kindo.

¹¹ Hamonü isa Thrünpuhnü nüsa apinü ajikhi thülünde akamshihpü, tüsho api wu hode akinnü apungkhikhi rhimo atsü aban akuk ngübah,

¹² junangde isa Thrünpuh tüsho Atungpuh Jisu Khrista amüthsüm yande isa Atungpuh Jisu mung nüsa kheak, tüsho nüsanü api kheak müretahbah.