2 SAMUEL 9 - AMÜSÜH HÜM CL Bible (BSI)

David tüsho Mephiboshet

¹ Davidnü keokhi, “Jonathan thsülimnü inü mihmuzho huhpü thsüde Saul yamkhün khürü aninga la shi?”

² Kheakü Saul yamkhün ching yamlarü Zeba lakheah, tüsho api David kilim ji. Kiulongthsüpuhnü api ki tha, “Nü Zeba a de?” Tüsho apinü alo, “Nü tankihpü ching lah!”

³ Kiulongthsüpuhnü tha, “Inü Thrünpuh mihmuzho huhpü thsüde Saul yamkhün khürü aninga la shi?” Zebanü kiulongthsüpuh ki alo, “Jonathan tsührü aninga lah; api jing kika lah.”

⁴ Kiulongthsüpuhnü api ki tha, “Api küching la?” Zebanü kiulongthsüpuh ki alo, “Api Ammiel tsührü Makir yam ching, Lodebar ching lah.”

⁵ Judüki kiulongthsüpuh Davidnü Lodebar ching yüshihbah Ammiel tsührü Makir yam chingnü api bebah arü.

⁶ Saul tsührü Jonathan tsührü Mephiboshet David kilim arü, tüsho amiro koyubah akin jih. Davidnü tha, “Mephiboshet!” Apinü alo, “I nü yamlarü ah.”

⁷ Davidnü api ki tha, “Dütre, tümüde nü buh Jonathan thsülimnü inü nü ki mihmuzho huhbah; nü pü Saul lo alala nü kilim inü ajihlobah, tüsho kamruhroro nü I dükhüm kheak yimtsühbah.”

⁸ Apinü akin jihde tha, “I khihnu ashemi she mumokhi kheak kheahpü thsüde nü yamlarü tümü a?”

⁹ Judüki kiulongthsüpuhnü Saul yamlarü Zeba jibah api ki tha, “Saul tüsho api yamkhün yo alala nü putungpuh tsührü-tsührü kilim inü jihdo.

¹⁰ Nü tüsho nü tsührübo le nü yamlarübonü api thsungkheak thulu thsübah tüsho yimlubah, junangde nü putungpuh tsührü-tsührü tsühyungpü ngübah; tüshe nü putungpuh tsührü-tsührü Mephiboshet a kamruhroro I dükhüm kheak yimtsühbah.” Kheakü Zeba tsührü athrürü 15 tüsho yamlarü 20 lakheah.

¹¹ Judüki Zebanü kiulongthsüpuh ki tha, “I tungpuh kiulongthsüpuhnü api yamlarü ki thiyukhüm jihkhi alala yande nü yamlarünü arhimobah.” Mephiboshet a kiulongthsürü tsührü nangde David dükhüm kheak yimtsüh.

¹² Mephiboshet tsührü athrürü athunu Mika de alakheah. Tüsho Zeba yam ching larü alala Mephiboshet yamlarü kamabah.

¹³ Mephiboshet a Jirusalem ching la, tümüde api kamruhroro kiulongthsüpuh dükhüm kheak yimtsüh. Kheakü api ajing ane chido kika lakheah.