2 SAMUEL 7 - AMÜSÜH HÜM CL Bible (BSI)

David kilim Nathan Yusheak

¹ Kheakü küyimki kiulongthsüpuh ayam ching laabahkhea, tüsho Atungpuhnü api mühi thiriribo alala kheaknü sühakhim jihkhea,

² kiulongthsüpuhnü Nathan wukihrü ki tha, “ Kheakü kheahang, I cedar sang yam ching lachoh, tüshe Thrünpuh sangdan a khimyam ching lah.”

³ Nathannü kiulongthsüpuh ki tha, “Yüang, nünü alümkhi alala rhimoang; tümüde Atungpuh nü lung lah.”

⁴ Tüshe ju tsüngre Atungpuh yusheak Nathan kilim arü:

⁵ “Yüang tüsho I yamlarü David ki thaang: Atungpuhnü ha thachoh: I lashihpü thüyam khülang thsüpü ju nü a de?

⁶ Inü Israel mihtsürü Ijip chingnü bekhitkinü khihni khiungde I thüyam ching mülaakheah, tüshe I a khimyam tüsho arüngkhimyam ching lang yüla arüla de alakheah.

⁷ Inü Israel mihtsürü bolung tsahkhi amuyung I mihtsürü Israel neakshihpü thiyukhüm jihkhi limberübo ki, Nüsanü tümüde I thsungkheaknü thüyam khülang cedarnü müthsü le de keokhidü de?”

⁸ Kheakü jumonü nünü ha I yamlarü David ki thaang: Wuto Atungpuhnü ha thachoh: Inü nü mükeak ching namfimihnu dunglim yande alakhi chingnü I mihtsürü Israel kurungkheak yakzan shuhshihpü lukheah;

⁹ tüsho nü kürü ching yükheanü I nü lung lakheah, tüsho nü müngüh lakhi thiriri alala tsoshih; tüsho alomi kheak mung ato lakhibo nangde inü nü mung ato kamshih.

¹⁰ Tüsho inü I mihtsürü Israel thsungkheak dangpung khülang mokhitbah arü lashihbah, junangde arübo nihbuh lapung ching tümü kimlak mülade alabah; tüsho püpüki nangde amütsü rhimorübonü arü kheak küpkhuk müjih,

¹¹ inü I mihtsürübo Israel kurungkheak mahkhaprübo mokhitkhi kim chingnü; tüsho inü nü nüsa riri alala kheaknü sühakhimshihbah. Junangde Atungpuhnü nü kilim thüyam khülang thsüjihbah de khipkhitchoh.

¹² Küyimki nü nimungbo khiungba tüsho nü nüsa jipürü lung yübanü, inü nü pang chingnü tsührü nü dunglim asürüshihbah, tüsho inü api kiulongthsü thsakhamjihbah.

¹³ Apinü I mung thsungkheaknü thüyam khülang thsübah, tüsho inü api kiulongthsü-binkiu lün thsungkheak thsakhamjihbah.

¹⁴ I api abuh thsübah, tüsho api I tsührü thsübah. Küyimki apinü amülim rhimobanü, mihtsürünü shuhbah arhapbe tsonü api thsümüchibah.

¹⁵ Tüshe nü mikinü luakhinkhi Saul kheaknü chamachihkhi nangde I amuzho api kheaknü müchamachih.

¹⁶ Nü yam tüsho nü kiulongthsü I miki lünnü alashihbah; nü kiulongthsü-binkiu lünnü alabah.

¹⁷ Harü yubo tüsho michih alala yande Nathannü David ki tha.

Davidnü Makshe Tamkhüntamnükhi

¹⁸ Judüki kiulongthsüpuh Davidnü yüzah tüsho Atungpuh miki binbah tha, “O Atungpuh T HRÜNPU H , I shepü a, I yamkhün tümü lakhinü I ha khiungde bedarükhea?

¹⁹ Tüsho kheaküshe ha nü miki anikhüh lakheah, O Atungpuh T HRÜNPU H ; nünü nü yamlarü yamkhün ki arübe ching dünjipü ato thado. Haju ha mihtsürübo thsungkheaknü thsangdankhi thsüshang, O Atungpuh T HRÜNPU H !

²⁰ Tüsho Davidnü kheaküshe nü ki tümü thakhukba? Tümüde nünü nü yamlarü mükheahlah, O Atungpuh T HRÜNPU H !

²¹ Nünü alokhikhi dünkheaknü, tüsho nünü amulongkhi yande, nü yamlarünü amükheahpü thsüde ha ato alala rhimo.

²² Jumonü nü ato ah, O Atungpuh T HRÜNPU H ; tümüde nü nangde she müla, tüsho isa nükhünnü asokhea nü hobah Thrünpuh müla.

²³ Thrünpuhnü api mihtsürü müngühnü trükshih tüsho ju thrünpuhbo yankhitde api mung thsüa lupü tüsho arü thsungkheak ato tüsho atrebe rhimopü, api mihtsürü thsüpü rhokhitpü yükhi, nünü Ijip chingnü rhokhitkhi nü mihtsürü Israel nangde alomi ching püpü trükshih she la?

²⁴ Tüsho nünü Israelrü lünnü nü mihtsürü thsüpü thsakham; tüsho O Atungpuh , nü arü Thrünpuh kamabah.

²⁵ Tüsho kheakü, O Atungpuh T HRÜNPU H , nünü nü yamlarü tüsho api yamkhün dünkheak thakhi lün thsungkheak adüngakhi thsüang; nünü alokhikhi nangde thsüang.

²⁶ Hanangde lünnü nü mung shide athabah, ‘Wuto Atungpuh ju Israel kurungkheak Thrünpuh ah’; tüsho nü yamlarü David yamkhün nü miki lashihbah.

²⁷ Tümüde, O Wuto Atungpuh , Israel Thrünpuh nünü ha nü yamlarü ki amikheak akhiukde tha, ‘Inü nü khilim thüyam khülang thsüjihbah’; jumonü nü yamlarünü ha nü ki tamkhüntamnüpü mulong ato thsüdo.

²⁸ Tüsho kheakü, O Atungpuh T HRÜNPU H nü a Thrünpuh ah, tüsho nü yubo thiyuro lah, tüsho nünü ha atsüdakbo nü yamlarü ki alokhido;

²⁹ kheakü jumonü nü yamlarü yamkhün müngühjihpü thsüde hanü nü asühshang, junangde ha nü miki lünnü ayübah; tümüde, O Atungpuh T HRÜNPU H , nünü thado, tüsho nü müngühmühinü nü yamlarü yamkhün ki lünnü müngühjihbah.”