2 SAMUEL 6 - AMÜSÜH HÜM CL Bible (BSI)

Tangzüng Sangdan Jirusalem lim Handarükhi

¹ Kheaküshe Davidnü amokhitkhi Israel mihtsürü 30,000 bemukhung.

² David tüsho api lung mihtsürü alala Baale-juda chingnü tsahmusubah, cherubim dükeak binkhi Wuto Atungpuh mung hanbah Thrünpuh sangdan ju chingnü lubah atupü yü.

³ Arünü Thrünpuh sangdan lolungbe aso kheaknü hanbah awung kheak lakhi Abinadab yam chingnü lubah akhiuk. Abinadab tsührü Uzza tüsho Ahionü lolungbe aso ju be,

⁴ ju lung Thrünpuh sangdan lakheah; tüsho Ahionü sangdan müngüh yü.

⁵ David tüsho Israel yamkhün alalanü arü sühmüh alalanü khün thsüde, bingkhung, bingshang, züpzüppü, akingbe tüsho larüp shuhbah A TUN GPU H müngüh tsün.

⁶ Küyimki arü Nakon hinitpung ching arükhea, Uzzanü akhah chungkhitbah Thrünpuh sangdan kheak tholo, tümüde moshipungbo jing mükhe.

⁷ Uzza kheak Atungpuh bukakhiukkhi alü kam; tüsho ju ching Thrünpuhnü api kheak shik tümütüsho apinü sangdan kheak akhah chungkhit; tüsho Thrünpuh sangdan rheang ki api sheabah.

⁸ Davidnü abukakhiuk tümütüsho Atungpuhnü Uzza kheak alü abukakhiuk; jumonü ju dangpung ki khihni khiungde Perez-uzza de jichoh.

⁹ Ju nimung Davidnü A TUN GPU H ki tre; apinü tha, “Küde thsah Atungpuh sangdan inü akümpü kamkhea?”

¹⁰ Jumonü David kiuto ching apinü Atungpuh sangdan kümpü mümulong; ju müthri Davidnü Gathrü Obed-edom yam ching lubah yü.

¹¹ Gathrü Obed-edom yam ching Atungpuh sangdan khinu mahsam zo; tüsho Atungpuhnü Obed-edom tüsho api yamkhün alala müngühjih.

¹² Kiulongthsüpuh David ki tha, “Thrünpuh sangdan dünkheaknü Atungpuhnü Obed-edom tüsho api lakhi alala müngühjihdo.” Jumonü Davidnü yübah Thrünpuh sangdan ju Obed-edom yam chingnü lubah David kiuto lim asühachihde arü;

¹³ tüsho Atungpuh sangdan shuhrü jingdükü thuruk yüchoki, apinü moshipung khülang tüsho amüdangkhi moshi nunu laksah-a Atungpuh kingaün.

¹⁴ Davidnü achim kheak amükeamrü khimnü rümbah A TUN GPU H miki asühmüh alalanü tsün.

¹⁵ Jumonü David tüsho Israel yamkhün alalanü zhide tüsho hulipungpung khungde Atungpuh sangdan lubah atu.

¹⁶ Atungpuh sangdan David kiuto ching arüshu, Saul tsührü Mikalnü ayinripit chingnü abinkhita kheah, tüsho Atungpuh miki David kiulongthsüpuh jukde tüsho tsünde ngü; tüsho anihbe mulong ching api ki münejih.

¹⁷ Arünü Atungpuh sangdan lubah yüzah, tüsho khimyam alunglim Davidnü thsüa zokhi azopung kheak zo; tüsho Davidnü taka kingaün tüsho mungtsü kingaünkhi Atungpuh miki jih.

¹⁸ Küyimki Davidnü taka kingaün tüsho mungtsü kingaün jihkhamkhea, apinü Wuto Atungpuh mung chingnü mihtsürübo müngühjih,

¹⁹ tüsho arü alala kilim tsühyungbe chama jih. Apinü Israel ching lakhi athrürü tüsho aliberü abande yikhap, amüthreangkhi shih, tüsho kurungaso mukuhkhi khürü jih. Jushu mihtsürü alala nihbuh yam ching alode yü.

²⁰ Davidnü api yamkhün müngühjihpü alode yü. Tüshe Saul tsührü Mikalnü api shorupü akhiukbah tha, “Khihni Israel kiulongthsüpuhnü küdükhüh she nihbuh zangrü wüntre jihcho, makharü mihtsürü khürünü nihbuh zangrü achih ngüa lukhi nangde, nihbuh yamlaberübo mük ki khihni azangrü achih ngüa ludo!”

²¹ Davidnü Mikal ki tha, “Ha Atungpuh miki nü buh tüsho api yamkhün müthri Atungpuh mihtsürü Israel kurungkheak kiulongthsürü thsüshihpü mokhitkheah, jumonü inü Atungpuh miki tsünkheah.

²² Ha kheaknü she alü I zangrü bahyukbah tüsho khenoa lubah; tüshe nünü athakhi yamlarübo miki a I wüntre jihbah.”

²³ Tüsho Saul tsührü Mikal ashe nimung khiungde tsührü müladebah.