2 SAMUEL 3 - AMÜSÜH HÜM CL Bible (BSI)

¹ Judüki Saul yamkhün tüsho David yamkhün dükeak thirithsü kim ashang lakheah; David amürangbe tüsho amürangbe kam, tüshe Saul yamkhün ayiuhyiuhbe tüsho ayiuhyiuhbe kam.

David Tsührübo

² Hebron ching David kilim tsührü athrürübo zübejih: adüjibuh ju Jezreelrü Ahinoamnü Amnon zübejih;

³ mahnepü ju Karmelrü Nabal niube Abigailnü Kileab zübejih; asampü, Geshur kiulongthsüpuh Tamai tsührü Makanü Absalom zübejih;

⁴ aphüyipü, Haggithnü Adonija zübejih; aphüngüpü, Abitalnü Shephatia zübejih;

⁵ tüsho athurukpü, David niube Eglanü Ithream zübejih. Harübo Hebron ching David kilim zübejih.

Abnernü David kheak Arihkhi

⁶ Küyimki Saul yamkhün le David yamkhün dükeak thirithsü lakhea, Abner a Saul yam ching lalim tsüde la.

⁷ Kheakü Saul a hanniube Aia tsührü Rizpa lakheah. Tüsho Ishboshetnü Abner ki tha, “Tümüde nünü I buh hanniube lung nungkhea?”

⁸ Ishboshet yubonü Abner bukakhiukshih; apinü tha, “I Juda thsungkheaknü khihnu lümlung a de? Khihni inü nü buh Saul, akhiungmungrü, tüsho amüyamrü ki thiyuro-amuzho huhde lah tüsho nü David khah ching jihamübah; tüshe ha liberü dünkheaknü nünü I amülim jihchoh.

⁹ Jumonü Thrünpuhnü Abner kheak rhimoshang tüsho khide amütsübe she kamshang! Tümüde Atungpuhnü tümü David ki thiyuchihchimkhea, ju inü api thsungkheak akuk ngübah,

¹⁰ Saul yamkhün chingnü kiulongthsü luakhinbah, tüsho Dan chingnü Beersheba khiungde Israel tüsho Juda kurungkheak David kiulongthsü zojihbah.”

¹¹ Tüsho Abnernü athakhi yu Ishboshetnü malokhuk, tümütüsho anihbuhnü api treabah.

¹² Abnernü Hebron ching David kilim yunithsürübo yüshihde tha, “Lomi ha shepü yo a? Nünü I ki tangzüngang, tüsho nü kilim Israel alala bedarüpü inü nü kheak arung jihbah.”

¹³ Apinü tha, “Tsülah; inü nü kheak tangzüng khülang thsübah. Tüshe nü kheaknü inü alunepü rhimo khülang ju: küyimki I shorupü arübanü, Saul tsührü Mikal mübesho küyimkishe I miki nü marü.”

¹⁴ Judüki Davidnü yunithsürübo Saul tsührü Ishboshet kilim yüshihde tha, “Inü adün Filistiarü yo küp chi khülang jihbah thiyu zokhi I niube Mikal arüshang.”

¹⁵ Ishboshetnü yüshih tüsho Laish tsührü aniubuh Paltiel kheaknü anihbe bea lu.

¹⁶ Tüshe aniubuhnü adunglim tsahde Bahurim limro khiungde tripde yü. Tüshe Abnernü api ki tha, “Thüyam lim alode yüang!” Jumonü api alode yü.

¹⁷ Abnernü Israel azothsürü kilim thiyu yüshih tüsho tha, “ Kim ashangkhüh nüsa kurungkheak kiulongthsüshihpü David yimkheah.

¹⁸ Kheakü ju rhimoang; tümüde Atungpuhnü David ki thiyuchihchim: I yamlarü David hode Filistiarü, tüsho arü riri alala khah chingnü I mihtsürü Israel khümkhitbah.”

¹⁹ Abnernü kheaküshe Benjaminrü ki züklangde tha; jushu Abnernü Israel alala tüsho Benjamin yamkhünnü arhimopü thsakhambah alakhi David ki thapü Hebron ching yü.

²⁰ Küyimki Abnernü mihtsürü 20 bebah David kilim Hebron ching arükhea, Davidnü Abner tüsho api lung lakhi mihtsürübo thsungkheaknü anioji.

²¹ Abnernü David ki tha, “I yüanü tüsho Israel alala I tungpuh kiulongthsüpuh ki bemukhunganü, ju hode arünü nü kheak tangzüng khülang thsübah, tüsho nü mulongnü akünkhi nangde nünü alala kurungkheak kiulongthsübah.” Jumonü Davidnü Abner yüshih, tüsho api mungtsü chingnü yüabah.

Joabnü Abner Laksahkhi

²² Anükhüh labah David yamlarübo thirithsü chingnü kukrukbo hihdakde hanbah Joab lung arü khiung. Tüshe Abner a Hebron ching David lung mülade alakheah, tümüde anihbuhnü api yüshih, tüsho api mungtsü chingnü yüabah.

²³ Küyimki Joab tüsho api lung bonungrü alala arükhea, ju Joab ki tha, “Ner tsührü Abner kiulongthsüpuh ki arükheah, tüsho anihbuhnü api yüshihdo, tüsho api mungtsü chingnü yüabahdo.”

²⁴ Judüki Joabnü kiulongthsüpuh ki yü tüsho tha, “Nünü tümü rhimokhea? Abner nü kilim arüdo; tümüde nünü api dükhea tsoshihkhea?

²⁵ Ner tsührü Abner nü mülapyukpü tüsho nü yüla arüla dükhi tüsho nü rhimokhi alala ngükhitpü arükheah de nünü mükheahlah.”

²⁶ Küyimki Joabnü David mikinü akhiukkhea, apinü yunithsürübo Abner dunglim yüshih, tüsho arünü api Sira kekhip chingnü belobah arü; tüshe ju dünkheak Davidnü mümükheah.

²⁷ Küyimki Abner Hebron lim alodarükhea, Joabnü api ki mükhingde athapü ripit limro lim bebah yü, tüsho ju ching apinü abuk ching düchip. Jumonü api Joab akhiung Asahel thiyih bukkhi dünkheaknü api she.

²⁸ Jushu, küyimki Davidnü ju sokhea, apinü tha, “Ner tsührü Abner thiyih dünkheaknü I tüsho kiulongthsü lünnü Atungpuh miki amülim müla.

²⁹ Amülim ju Joab ku kheak, tüsho abuh yamkhün alala kheak yükihshang; tüsho Joab yamkhün a thiyih müyeankhi yungsho aphamkhi, yungsho tso shuhpü yungsho nukshangnü ashepü yungsho khümzungpü lashang!”

³⁰ Jumonü Joab tüsho akhiung Abishai anenü Abner laksah tümütüsho apinü thirithsüpung Gibeon ching akhiung Asahel laksah.

³¹ Judüki Davidnü Joab tüsho api lung lakhi mihtsürü alala ki tha, “Nüsa khimmih rukrüpang, tüsho shungliukhim yukbah Abner dünkheak tüzhoang.” Tüsho kiulongthsüpuh Davidnü kung dunglim yan.

³² Arünü Abner Hebron ching kiuyukabah. Kiulongthsüpuhnü düsheak zhi tüsho Abner kiuyuk ki mitrip, tüsho mihtsürü alalanü mitrip.

³³ Kiulongthsüpuhnü Abner dünkheak tüzhode khün thsü, “Amülimrü shekhi nangde Abner sheba de?

³⁴ Nü khahbo mürhük, nü jingbo mürhük; khürü mihbukmuyuk miki lungkhi nangde nü lungdo.” Tüsho mihtsürü alalanü kheaküshe api dünkheaknü mitrip.

³⁵ Judüki mihtsürü alala David ki arübah tümükhüh lang she atsühpü nimungroro tha; tüshe Davidnü thiyuchihchimde tha, “Ani müyüzahchoki inü yikhap yungsho tümükhüh lang she tsühpheansho Thrünpuhnü I kheak alübe she rhimoshang!”

³⁶ Mihtsürü alalanü anikhita lu, tüsho junü arü asühshih; junangde kiulongthsüpuhnü arhimokhi lüpdükhinü mihtsürü alala asühshih.

³⁷ Jumonü Ner tsührü Abner laksahkhi ching kiulongthsüpuh mübe de mihtsürü alala tüsho Israel alalanü ju nimung mükheah.

³⁸ Tüsho kiulongthsüpuhnü ayamlarübo ki tha, “Ha nimung ching kiulongthsürü tsührü tüsho mungthu mihtsürü khülang Israel ching lungdo de nüsanü mümükheah de?

³⁹ I mujudemokhitkhi kiulongthsürü thsüthsü she khihni I wu müla; harü mihtsürü, Zeruia tsührübo, I thsungkheaknü khide thrunglah. Mihbukmuyuk rhimorü ki anihbuhnü arhimokhi yande Atungpuhnü jihloshang!”