2 SAMUEL 21 - AMÜSÜH HÜM CL Bible (BSI)

Saul Tsühsoniusobo Sheshihkhi

¹ Kheakü David nimungbo ching kam atukde kam mahsam khümzung lakheah; tüsho Davidnü Atungpuh ki keoakheah. Atungpuhnü tha, “Saul tüsho api yamkhün kheak thiyih bukkhi amülim lah, tümütüsho Gibeonrü sheshih.”

² Jumonü kiulongthsüpuhnü Gibeonrü jibah arü ki asuk. (Kheakü Gibeonrü ju Israel mihtsürü yungde Amorrü aningkhi lakheah; Israel mihtsürübonü arü rhangdung lashihpü thiyuchihchima lalashe, Israel tüsho Juda mihtsürübo thsungkheak Saulnü anihbuh künkhi ching arü dükheakshihpü mürang.)

³ Davidnü Gibeonrü ki tha, “Nüsa thsungkheak inü tümü rhimoba? Nüsanü Atungpuh mihtsürü müngühjihpü thsüde inü nüsa tümünü dünthsükhijihba?”

⁴ Gibeonrünü api ki alo, “Isa le Saul yungsho api yamkhün dükeak shotoyinchi yungsho sunanü akebe yung; yungsho isanü Israel ching sheshe müsheshih.” Apinü tha, “Inü nüsa thsungkheak tümü thsüang de nüsanü thacho?”

⁵ Arünü kiulongthsüpuh ki tha, “Israel lomi ching isa lapung mülashihpü thsüde, mihtsürü shepünü isa tsühabahkhea tüsho isa thsümünimpü lümkhi thsükhea–

⁶ api tsührü athrürü 7 ju isa kilim jihang, tüsho Atungpuhnü mokhitkhi Saul kiuto Gibeon kheak Atungpuh miki isanü arü wuka zhinbah.” Kiulongthsüpuhnü tha, “Inü arübo jihabahbah.”

⁷ Tüshe kiulongthsüpuhnü Saul kheak yo Jonathan tsührü Mephiboshet aninga lashih, tümütüsho ju David le Saul tsührü Jonathan ane dükeak Atungpuh thiyuchihchimkhinü ah.

⁸ Kiulongthsüpuhnü Aia kheak yo Rizpa tsührü athrürü 2 lu, shepünü Saul kilim Armoni tüsho Mephiboshet zübejih; tüsho Saul kheak yo Merab tsührü athrürü 5, shepünü Meholarü Barzillai tsührü Adriel kilim zübejih;

⁹ apinü arübo Gibeonrü khah ching jih, tüsho arünü arübo Atungpuh miki awung kheak zhin. Arü 7 ju rukhühnü dükheakabah. Arü ju barli yimlukhi atankih ching akhuhbe nimung sheshih.

¹⁰ Judüki yimlukhi kim chingnü mumükin tsüng marüyi khiungde Aia tsührü Rizpanü shungliukhim lubah anihbe thsungkheak lungto khülang kheak dütrüta pinga zo; alibenü animung wuhnubo mibo kheak marüshih, yungsho azhing ching mütüm shiwüh marüshih.

¹¹ Küyimki Saul hanniube Aia tsührü Rizpanü arhimokhi David ki thakhea,

¹² Davidnü yü tüsho Saul le atsührü Jonathan robo Jabesh-gilead mihtsürü kheaknü lu. Arünü arübo ju Filistiarünü Gilboa wung kheak Saul laksah nimung Filistiarünü azhinpung Beth-shan kiudunglimrobo chingnü ahüh-a lubah atsokheah.

¹³ Apinü ju chingnü Saul tüsho atsührü Jonathan robo lubah atu; tüsho azhinkhi robo arünü momukhung.

¹⁴ Arünü Saul tüsho atsührü Jonathan robo ju Zela ching lakhi Benjamin lo ching, abuh Kish mibahpung ching kiuyukabah; kiulongthsüpuhnü thiyukhüm jihkhi alala arünü rhimo. Jushu, lomi thsungkheak tamkhüntamnükhi Thrünpuhnü sojih.

Filistiarü bede Keochihkhi

¹⁵ Filistiarünü Israel bede keochihpü yü, tüsho David le api yamlarü rukhühnü yüki. Arünü Filistiarü bede keochih, tüsho David keakabah.

¹⁶ Atoshang tsührü-tsührü bolung khülang, api yo müwayinchi thsüh khahngak 300 akumung, tüsho thirithsü zülu aso yihkhi, Ishbibenobnü David laksahpü lüm.

¹⁷ Tüshe Zeruia tsührü Abishainü api rungpü arü, tüsho Filistiarü yande apinü laksah. Judüki David mihtsürübonü api ki thiyuchihchim, “Kheaküa nü isa lung thirithsüpü müyü, junangde Israel tsünpung nünü mümütshih.”

¹⁸ Ju dunglim Gob ching Filistiarü kheak thirithsü; judüki Hushathrü Sibbekainü atoshang Rabha tsührü-tsührü bolung khülang Saph laksah.

¹⁹ Kheaküshe Gob ching Filistiarü kheak thirithsü lakheah; tüsho Bethlehemrü Jaareoregim tsührü Elhanannü Gitrü Goliath laksah, api thsühbeak ju khim-keakrü dükim nangde alakheah.

²⁰ Kheaküshe Gath ching thirithsü lakheah, ju ching mihtsürü khülang trungdung ato lakheah, akhah abande yingkhing 6, tüsho amüphü abande yingmünüpü 6, alala thsürubah 24; api she Rabha tsührü-tsührü lakheah.

²¹ Küyimki apinü Israel müneahkhea, David akhiung Shimei tsührü Jonathannü api laksah.

²² Harü 4 ha Gath ching Rabha kheaknü atrükkhitkhibo ah; arübo ju David tüsho api yamlarübo khah hode keamshih.