2 SAMUEL 20 - AMÜSÜH HÜM CL Bible (BSI)

Shebanü David Azhihkhi

¹ Kheakü yakli mütsükhi Benjaminrü Bikri tsührü amung Sheba lakheah. Apinü hulipungpung khung tüsho zhi, “Isa David lung shihcham müla, Jesse tsührü lung shihcham müla! Mihbüm aban nihbuh khimyam lim yüang, O Israel!”

² Jumonü Israel mihtsürü alala David bahkhibah Sheba dunglim yan; tüshe Juda mihtsürünü düngdüngde Jordan chingnü Jirusalem khiungde arü kiulongthsüpuh dunglim yan.

³ Davidnü Jirusalem ching api yam lim arü; tüsho kiulongthsüpuhnü thüyam kümpü lashihkhi hanniube 10 lu, tüsho arübo thüyam ching aheangshih, tüsho apinü arü kheak munung. Jumonü arübo ashe khiungde khimoberü nangde rihdoa la.

⁴ Judüki kiulongthsüpuhnü Amasa ki tha, “Nimung mahsam dükeak chingnü Juda mihtsürübo I ki jimukhungang, tüsho nü arü lung ha ching arang.”

⁵ Jumonü Amasanü Juda jipü yü; tüshe api ki akhukhi kim apinü hoabah.

⁶ Davidnü Abishai ki tha, “Kheakü Bikri tsührü Shebanü Absalom kheaknü alü isa ki rhimobah; nü tungpuh yamlarübo bea lubah api müshamang, ju yungsho apinü chipi ayünkhi kiutobo yimkhitbah ajikbah, tüsho isa kheaknü atsokhibah.”

⁷ Joab mihtsürü lung Kerethrü, Pelethrü, tüsho thirithsürü alala api dunglim yü; arünü Bikri tsührü Sheba müshamde Jirusalem chingnü wukhiuk.

⁸ Küyimki arübo Gibeon ching lakhi lung ato ki lakhea, Amasanü arü shorupü arü. Kheakü Joab ju bonungrü khimmih yih tüsho ju kheak nukshang zahkhi nuktrüp bede pangrümbe achim kheak rümkih; api mikhuhlim yüde lachoki ju chinkhit.

⁹ Joabnü Amasa ki tha, “Akhiung, nü tsüde la shi?” Tüsho Joabnü amüthsüppü akhah tsülimnü Amasa ju amükhühnam kheaknü thoa lu.

¹⁰ Tüshe Joab khah ching nukshang shuhkhi Amasanü mümükheah; Joabnü abuk ching kiujihbah arhubo alo kheak bukkhit, tüsho api she. Apinü mahne kipü a mukiulo. Jushu Joab tüsho akhiung Abishai anenü Bikri tsührü Sheba müshamde yü.

¹¹ Tüsho Joab mihtsürü khülangnü Amasa pang kheak zhipbah tha, “Sherünü Joab mulongla, tüsho sherü David thsungkheaknü a, api Joab ru yanang.”

¹² Amasa ju limto phulung athiyih ching awuhde yap tüsho mihtsürü alala ju kheak tuklokhi mihtsürü khülangnü ngü. Api ki arürü alala tuklo jumonü apinü Amasa ju limto ching mükeak lim hanbah yü, tüsho api kheak khim khülang züngkihjih.

¹³ Api limto chingnü luakhinshu, mihtsürü alalanü Bikri tsührü Sheba müshamde Joab dunglim yü.

¹⁴ Shebanü Israel trük alala hode Beth-maaka ching lakhi Abel lim yü; tüsho Bikrirü alala mukhungbah api dunglim kiuto ching yüzah.

¹⁵ Joab bonungrü arü tüsho Beth-maaka ching lakhi Abel ching Sheba yan; arünü kiuto ki leak rünkih tüsho ju aleanglim chipi arih-a zhip. Chipi ju alungshihpü thsüde Joab bonungrünü alunglim kheanmusu.

¹⁶ Judüki kiuto ching rükri larü aliberü khülangnü tha, “Aniang! Aniang! Joab ki thaang, ‘ Ha ching arang, nü ki inü asukachihnelah.’”

¹⁷ Apinü alibe phünide arü; tüsho alibenü tha, “Nü Joab a de?” Apinü alo, “I ah.” Judüki alibenü api ki tha, “Nü yamlarü yu aniang.” Apinü alo, “Inü anichoh.”

¹⁸ Judüki alibenü tha, “Arünü awün nimungbo ching thade la, ‘ Arünü Abel ching keokhikeorashang’; tüsho junangde arünü adüngakhi thsüde la.

¹⁹ I Israel ching mungtsü tüsho thiyuro amuzho lakhi bolung khülang ah; Israel ching lakhi berü kiuto thsümünimpü nünü yimchoh; tümüde nünü Atungpuh yamrüplurüp muyuba le?”

²⁰ Joabnü alo, “Inü amuyupü yungsho athsümünimpü I kheaknü limshuang!

²¹ Junangde yung! Tüshe Ephraim awung lomi mihtsürü Bikri tsührü Shebanü kiulongthsüpuh David azhihde akhah shuhkihdo; ha mihtsürü khülang jihabahang, tüsho I kiuto chingnü atsobah.” Alibenü Joab ki tha, “Api ku nü kilim chipi kumung jipa bahbah.”

²² Jushu alibenü alümkhi atsü hanbah mihtsürü alala ki yü. Tüsho arünü Bikri tsührü Sheba ku lipshak, tüsho Joab kilim jipa wukhiukshih. Jumonü apinü hulipungpung khung, tüsho arübo kiuto chingnü müzüt, tüsho Joab a kiulongthsüpuh kilim Jirusalem lim alode ayüchoki mihtsürü alala nihbuh yam lim yü.

David Yo Atorübo

²³ Kheakü Joab ju Israel bonungrü alala limthorü lakheah; Jehoiada tsührü Benaia ju Kerethrü tüsho Pelethrü limthorü lakheah;

²⁴ Adoniram ju rhimo amüküp ching abebuh lakheah; Ahilud tsührü Jehoshaphat athrütyukrü lakheah;

²⁵ Sheva ju athrütrü; Zadok tüsho Abiathar amükeamrübo;

²⁶ tüsho Jairü Ira she David yo amükeambuh lakheah.