2 SAMUEL 18 - AMÜSÜH HÜM CL Bible (BSI)

Absalom Shekhi

¹ Judüki Davidnü api lung lakhi mihtsürübo bemukhung, tüsho chithürübo le chibo kurungkheak limthorü mokhit.

² Tüsho Davidnü bonungrü khunung mahsam thsüde cham: khunung khülang Joab yukhüm bukkhüp, khunung khülang Joab akhiung Zeruia tsührü Abishai yukhüm bukkhüp, tüsho khunung khülang Gitrü Ittai yukhüm bukkhüp. Kiulongthsüpuhnü mihtsürübo ki tha, “I she nüsa lung yübah.”

³ Tüshe mihtsürübonü tha, “Nü duwukhiuk. Tümüde isa shande tsosho, arünü isa müküm. Isa chamkhüh shesho, arünü isa müküm. Tüshe nü a isa chithürü thürü dün ah; jumonü nünü kiuto chingnü isa kilim arung arüshihpü tsülah.”

⁴ Kiulongthsüpuhnü arü ki tha, “Tümüpürü nüsa ki atsüanü inü arhimobah.” Jumonü kiulongthsüpuhnü ripit rheang ki zhip, judüchoki bonungrü alala chi tüsho chithürübo thsübah tsahde wukhiuk.

⁵ Kiulongthsüpuhnü Joab, Abishai tüsho Ittai ki thiyukhüm jihde tha, “I dünkheak athrününgtsüngbuh Absalom ki atsükheaknü asukachihang.” Tüsho kiulongthsüpuhnü Absalom dünkheak limthorübo alala ki thiyuzüng jihkhi mihtsürü alalanü so.

⁶ Jumonü bonungrübonü Israel kheak azhihde thulu ching wukhiuk; tüsho Ephraim murung chingnü keochih.

⁷ Ju ching David yamlarübonü Israel mihtsürü kheak kuk, tüsho ju nimung hihdakde mihtsürü 20,000 laksah.

⁸ Thirithsü ju lomi alala ching bude yü; tüsho nukshangnü alaksahkhi kheaknü alübe thsüde murung chingnü she.

⁹ Absalomnü David yamlarübo shoru. Absalom khoranunu kheak bin, tüsho khoranununü thülamsang khahdübeakbo bukkhüp yüzah. Api ku thülamsang kheak yükih, tüsho khoranunu api khüpnü tsoabahbah api a thüning le alo dükeak zhina kih.

¹⁰ Mihtsürü khülangnü ju ngü tüsho Joab ki tha, “Inü Absalom thülamsang kheak zhina kihde ngüdo.”

¹¹ Joabnü api ki thabuh mihtsürü ki tha, “Nünü api tümü ngükhi! Dale tüsho tümü thsükhi nünü api ju ching alo kheak mükingkhikhea? Dükhülaa inü nü kilim shotoyinchi 10 tüsho pangrümbe 1 de asühde jih-a labah.”

¹² Tüshe mihtsürü junü Joab ki tha, “I khah ching shotoyinchi khahngak 1000 jihjih she, kiulongthsüpuh tsührü kheak inü I khah muchung; tümüde isanü sode Abishai tüsho Ittai ki kiulongthsüpuhnü thiyukhüm jihde tha: I thsülimnü athrününgtsüngbuh Absalom khümkhitang!

¹³ Yungsho, inü api rhangdung kheak amütsü thsükhülaa–kiulongthsüpuhnü lüpdükhi sobah–judüki nünü I müzhipdokhuka labah.”

¹⁴ Joabnü tha, “Hanangde I nü lung kim mübah.” Apinü thsüh mahsam akhah ching lu, tüsho Absalom thülamsang kheak arhang lachoki amulong ching düchip.

¹⁵ Tüsho Joab thsühnuk hanrü athrününgtsüng 10nü Absalom mükamdo tüsho kingkhibah api laksah.

¹⁶ Judüki Joabnü hulipungpung khung, tüsho thirithsürübo Israel müshamkhi chingnü alodarü, tümüde Joabnü thirithsürübo ju yanlo.

¹⁷ Arünü Absalom lubah murung ching alokhün ato ching jipa bah, tüsho api kheak lung ato rhungkih. Judüki Israelrü alala nihbuh yam lim alihde tso.

¹⁸ Kheakü Absalomnü api rhangdung lachoki dungjing khülang lubah Kiulongthsüpuh Jindükhün ching khima zo, tümüde apinü tha, “I mung lümkhitpü thsüde I tsührü athrürü müla”; apinü dungjing ju anihbuh mungnü ji. Khihni khiungde Absalom Mümih-lung de jichoh.

Absalom Shekhi David ki Thakhi

¹⁹ Judüki Zadok tsührü Ahimaaznü tha, “I alihanü tüsho Atungpuhnü api riri royimjihkhi kiulongthsüpuh ki thaanü.”

²⁰ Joabnü api ki tha, “Nü khihni thiyusheak mühan; nünü thiyusheak püpü nimung hanpü thsüang, tüshe nünü khihni jude düthsü, tümütüsho kiulongthsüpuh tsührü shea lah.”

²¹ Judüki Joabnü Kushbuh ki tha, “Yüang, nünü tümü ngükheanü kiulongthsüpuh ki thaang.” Kushbuhnü Joab miki khukning, tüsho alihde yü.

²² Kheaküshe Zadok tsührü Ahimaaznü Joab ki tha, “ Küdüküdü she I she Kushbuh dunglim alihde yüanü.” Tüsho Joabnü tha, “I tsah-a, thiyusheak thsungkheak thsambah tümü lade ngübah nü tümü thsüpü alihpü?”

²³ Apinü tha, “ Küdüküdü she, I alihbah.” Jumonü apinü anihbuh ki tha, “Alihang.” Jushu Ahimaaznü adükhün limronü alihde yü, tüsho Kushbuh alihho.

²⁴ Kheakü David ripit mahne dükeak binde alakheah. Aheangbuhnü ripit kumung kheak rhü chingnü yükih, tüsho küyimki apinü abina kheahkheanü mihtsürü khülang alangzü shande ngü.

²⁵ Aheangbuhnü zhibah kiulongthsüpuh ki tha, tüsho kiulongthsüpuhnü alo, “Api alangzü a sho, apinü thiyusheak atsü handalabah.” Apinü thüninde arü.

²⁶ Judüki aheangbuhnü mihtsürü püpü alihde ngü; tüsho aheangbuhnü ripit neakrü jibah tha, “ Kheahang, mihtsürü püpü alangzü alihchoh!” Kiulongthsüpuhnü tha, “Apinü she, thiyusheak atsü hande arüdalabah.”

²⁷ Aheangbuhnü tha, “Inü alümkhia akhuhbuh ju Zadok tsührü Ahimaaz alihkhi nangde lah.” Kiulongthsüpuhnü tha, “Api mihtsürü atsü ah, tüsho thiyusheak lubah arüchoh.”

²⁸ Judüki Ahimaaznü kiulongthsüpuh ki zhi, “Alala tsüde lah!” Apinü kiulongthsüpuh miki akin jihde alo kheak khukning tüsho tha, “Atungpuh nü Thrünpuh müngühmühi thsüang! Apinü I tungpuh kiulongthsüpuh azhihrü mihtsürü jihabahdo.”

²⁹ Kiulongthsüpuhnü tha, “Athrününgtsüngbuh Absalom tsüde la shi?” Ahimaaznü alo, “Joabnü nü yamlarü arüshihchoki, inü neamneamruru ato khülang ngüdo, tüshe ju küde thsüdünü inü mümükheah.”

³⁰ Kiulongthsüpuhnü tha, “Anguhang, tüsho ha kheak zhipang.” Jumonü apinü anguh tüsho zhikde zhip.

³¹ Jushu Kushbuh arü; tüsho Kushbuhnü tha, “I tungpuh kiulongthsüpuh thsungkheak thiyusheak atsü! Tümüde khihni Atungpuhnü alim thsüde nü riribo wu-sühmüh chingnü nü bekhitdo.”

³² Kiulongthsüpuhnü Kushbuh ki tha, “Athrününgtsüngbuh Absalom tsüde la shi?” Kushbuhnü alo, “I tungpuh riribo, tüsho nü thsümünimpü asürürü alala ju buh athrününgtsüng nangde kamshang.”

³³ Kiulongthsüpuh mulong sükde tukthsü, tüsho ripit kumung akhiungshak ching wutu, tüsho trip; tüsho anihbuh tsochoki, apinü tha, “O I tsah-a Absalom! Nü müthri I müshede, O Absalom, I tsah-a, I tsah-a!”