2 SAMUEL 17 - AMÜSÜH HÜM CL Bible (BSI)

Hushainü Absalom Bemüchihkhi

¹ Ahithophelnü Absalom ki tha, “Inü mihtsürü 12,000 mokhitanü, tüsho khihre inü David müshamde yüanü.

² Küyimki api keakzunga mulong ninide akamba tüsho zukleangnü trede amüyinsahbanü inü api tholobah; tüsho api lung lakhi mihtsürü alala shanyukde atsobah. Inü kiulongthsüpuh lang alaksahbah,

³ tüsho yamkhünbe aniubuh kilim thüyam lim arükhi nangde mihtsürü alala inü nü kilim belode arübah. Nünü mihtsürü khülang rhangdung yimchoh tüsho mihtsürü alala mungtsü ching labah.”

⁴ Athsunganahnü Absalom tüsho Israel azothsürü alala asühshih.

⁵ Tüshe Absalomnü tha, “Arkrü Hushai she jiang, tüsho apinü tümü thabanü isanü anianü.”

⁶ Küyimki Hushai ju Absalom kilim arükhea, Absalomnü api ki tha, “Ha Ahithophelnü athakheah; apinü athsunganahkhi nangde isanü arhimoba shi? jude yungsho, nünü isa ki thaang.”

⁷ Hushainü Absalom ki tha, “Ha kim ching Ahithophelnü athsunganahkhi atsü yung.”

⁸ Hushainü thalo, “Nü buh tüsho api mihtsürübo thirithsürübo ah de nünü mükheahlah, tüsho arübo thulu ching kuto anunubo jangkhikhi nangde bukmüke ah. Ju lang yung, nü buh ju thirithsüpü ching athsüso; apinü azhing ching bonungrü lung mülachoh.

⁹ Kheakü ha she api lungkhün yungsho kükheakanü jiklah. Tüsho küyimki isa bonungrü akhuhde ayankhi ching lungba, asorübonü athabah, ‘ Absalom dunglim yanrü bonungrü bolung laksahdo.’

¹⁰ Judüki athrungrü thirithsürü, kekhüzü mulong nangde alarübo atrekhinü shahde niuthünakbah; tümüde nü buh ju thirithsürü tüsho api lung larübo ju thirithsürü athrungrü ah de Israel alalanü mükheahlah.

¹¹ Tüshe inü athsunganahpü lakhi jua, Israel alala keto yean loyi nangde boto Dan chingnü Beersheba khiungde nü ki mukhungbah nünü mihbüm abande keochih ching bebah yüang.

¹² Junangde api lapungbo ching isanü api kheak yübah, tüsho ayinke alo kheak keamkhi nangde isa api kheak keambah; tüsho api le api lung larü alala rhangdung müla.

¹³ Api kiuto ching yüzahlosho, Israel alalanü shungliu ju kiuto ching lude arübah tüsho isanü lungjinim khülang she maningshihde ju jindükhün ching thoa lubah ayüzahbah.”

¹⁴ Absalom tüsho Israel mihtsürü alalanü tha, “Arkrü Hushainü athsunganahkhi ju Ahithophel athsunganahkhi kheaknü atsübe ah.”

David ki Thaa Tsoshihkhi

¹⁵ Judüki Hushainü amükeamrübo Zadok tüsho Abiathar ki tha, “Hanangde Ahithophelnü Absalom tüsho Israel azothsürübo ki athsunganahdo; tüsho hanangde inü athsunganahdo.

¹⁶ Jumonü nahde yübah David ki thashang, ‘ Khihre sunglo chipi ching düyap, tüshe niokheamde hode yüang; jude yungsho kiulongthsüpuh tüsho api lung mihtsürü alala muyuabahbah.’”

¹⁷ Jonathan tüsho Ahimaaz ane Enrogel ching aleangde alakheah; yamlarü aliberü khülangnü yübah ane ki tha, tüsho anenü yübah kiulongthsüpuh David ki tha; tümüde ane kiuto ching yüzahkhi müngüshihpü thsüde alakheah.

¹⁸ Tüshe athrürü nunu khülangnü ane ngü tüsho Absalom ki tha; jumonü ane chido nahde tsoabah, tüsho Bahurim ching mihtsürü khülang yam ching arü, api yam dükeak kekung khülang lakheah; tüsho ane ju ching yüzah.

¹⁹ Mihtsürü yamkhünbenü amuhiudobe khülang lubah kekung mün kheak muhiudo, tüsho ju kheak hi choa zo; tüsho ju dünkheak tümü she mümükheah.

²⁰ Küyimki Absalom yamlarübo thüyam lim alibe ki arükhea, arünü tha, “Ahimaaz tüsho Jonathan küching la?” Alibenü arü ki tha, “Ane ayung hodo.” Tüsho arünü ane yimbah müngüde arübo Jirusalem lim alode yü.

²¹ Arü tso dunglim, ane kekung chingnü akhiuk tüsho yübah kiulongthsüpuh David ki tha, “Yüang tüsho nahde ke hoang; tümüde ha ruk Ahithophelnü nü azhihde athsunganah jih-a lah.”

²² Jumonü David tüsho api lung mihtsürü alala tsahmusu tüsho Jordan hode yü; yapsu a she lang she Jordan muhoyikhi mülakheah.

²³ Küyimki Ahithophelnü athsunganah mürhimokhi anihbuhnü angükhea, apinü nihbuh donki kheak hah mühahbah kiuto ching thüyam lim yüabah. Apinü nihbuh yam akhinashu thsüde zowu, tüsho azangrü sük; api sheabah tüsho abuh mibahpung ching kiuyukabah.

²⁴ Judüki Absalom tüsho Israel mihtsürü alala Jordan hochoki David a Mahanaim ching arü.

²⁵ Kheakü Absalomnü Amasa ju Joab müthri bonungrü kurungkheak shuhkihjih. Amasa ju Ishmaelrü Ithra tsührü lakheah, apinü Joab abe Zeruia achi Nahash tsührü Abigail lukheah.

²⁶ Israelrü tüsho Absalom arü Gilead lo ching binkheam.

²⁷ Küyimki David Mahanaim ching arükhea, Amonrü yo Rabba chingnü Nahash tsührü Shobi, Lodebar chingnü Ammiel tsührü Makir, tüsho Rogelim chingnü Gileadrü Barzillainü

²⁸ yapkiubo, müsühmüraphurubo, tüsho alo phühbo, wheat hi, barli, ayikangkang, angukhi hi, hühkeangbo tüsho müngrhühbo,

²⁹ mukhuke, niuhke zhihzhih, namfimihnu, tüsho mihnubo chingnü niuhke kingkung David tüsho api lung mihtsürübo khilim lubah arü; tümüde arünü tha, “Bonungrübo sunglo ching khümkethüride keaka lah.”