2 SAMUEL 16 - AMÜSÜH HÜM CL Bible (BSI)

David tüsho Ziba

¹ Küyimki David awung mujuk anükhüh hobah ayükhea, Mephiboshet yamlarü Zibanü donkibo kheak yikhap 200, kurungaso mukuhkhi keangthrün 100, muzhusangaso 100, tüsho yukhu keluhkhüh de hanbah api shoru.

² Kiulongthsüpuhnü Ziba ki tha, “Tümüde nünü harü hande arükhea?” Zibanü alo, “Donkibo ju kiulongthsüpuh yamkhün binshihpü thsungkheak, yikhap tüsho muzhu-sangaso ju athrününgtsüngbo tsühshihpü thsungkheak tüsho yukhu ju sunglo ching keaka yaprü yungshihpü thsungkheak.”

³ Kiulongthsüpuhnü tha, “Tüsho nü putungrü tsührü küching la?” Zibanü kiulongthsüpuh ki tha, “Api Jirusalem ching lah; tümüde apinü tha, ‘ Khihni Israel yamkhünnü I pü kiulongthsü I kilim jihlobah.’”

⁴ Judüki kiulongthsüpuhnü Ziba ki tha, “Mephiboshet yo athrünkhi kheakü nü yo ah.” Zibanü tha, “Inü akin jihchoh; I tungpuh kiulongthsüpuh nü miki I mihmuzho ngüshang.”

Shimeinü David Athrukhi

⁵ Küyimki kiulongthsüpuh David Bahurim ching arükhea, Saul yamkhün chingnü mihtsürü khülang Gera tsührü Shimeinü athrude akhiuk.

⁶ Apinü David tüsho api yamlarübo kheak lungnü king; kheakü mihtsürü tüsho thirithsürü alala anihbuh tsülim tüsho huzulim lakheah.

⁷ Shimeinü athruchoki zhi, “Akhiukang! Akhiukang! Mihlaksahrü! Mihbukmuyuk!

⁸ Saul yamkhün ching thiyih bukshihbah, api müthri nünü kiulongthsükhi dünkheak Atungpuhnü nüsa alala kheak royimdo; tüsho Atungpuhnü kiulongthsü nü tsührü Absalom khah ching jihabahdo. Kheahang, thsümütsünü nü alapdo; tümüde nü thiyih bukshihrü mihtsürü ah.”

⁹ Judüki Zeruia tsührü Abishainü kiulongthsüpuh ki tha, “Tümüde ha ashekhi yihnunü I tungpuh kiulongthsüpuh athrupü? I yüshang tüsho api ku luanü.”

¹⁰ Tüshe kiulongthsüpuhnü tha, “Nü Zeruia tsührü inü nü kheak tümü thsüpü? David athruang de Atungpuhnü api ki thamonü athruchosho, tümüde nünü ha rhimokhea? de shepünü athapü.”

¹¹ Davidnü Abishai tüsho api yamlarübo alala ki tha, “I tsührünü I rhangdung yimchoh; ha Benjaminrünü a küdükhüh she alaba! Alangzü zojang, tüsho apinü athrushang; tümüde Atungpuhnü api ki thakheah.

¹² Khükia Atungpuhnü I lümthsünü ngüjihbah, tüsho khihni ha athrukhi thsungkheak Atungpuhnü I kilim atsü jihlobah.”

¹³ Jumonü David tüsho amihtsürübo limro ching yü, judüki Shimei a awung yean api jukkih yü, tüsho api yüde alachoki api kheak lungbo tüsho asungthulung jipkih.

¹⁴ Kiulongthsüpuh tüsho api lung mihtsürü alala keakpülaka Jordan khiung; tüsho ju ching api sühakhim.

Absalom Jirusalem ching

¹⁵ Kheakü Absalom tüsho Israel alala Jirusalem ching arü; api lung Ahithophel lakheah.

¹⁶ Küyimki David müyambuh, Arkrü Hushai ju Absalom ki arükhea, Hushainü Absalom ki tha, “ Kiulongthsüpuh kutsüpde laang! Kiulongthsüpuh kutsüpde laang!”

¹⁷ Absalomnü Hushai ki tha, “Haha nü müyambuh ki thiyuro-amuzho a de? Tümüde nü ju nü müyambuh lung müyü le?”

¹⁸ Hushainü Absalom ki tha, “Yung; tüshe shepü Atungpuh tüsho ha Israel mihtsürü alalanü amokhitkhea, I api kilim ah tüsho I api lung labah.

¹⁹ Judüalalashe, inü shepü tankihbea? Ju api tsührü yung de? Inü nü buh tankihkhi nangde, nü tankihbah.”

²⁰ Judüki Absalomnü Ahithophel ki tha, “Nünü isa ki athsunganahang; isanü tümü rhimobea?”

²¹ Ahithophelnü Absalom ki tha, “Thüyam neakpü lashihkhi nü buh hanniubebo kheak yübah nungang; tüsho nünü nü buh kheak thiriri kamchoh de Israel alalanü asobah, tüsho nü lung larübo mulong tode akambah.”

²² Jumonü arünü Absalom khilim thüyam kumung khimyam thsüjih; tüsho Absalomnü yübah Israel alala mikinü abuh hanniubebo kheak nung.

²³ Judüki Ahithophelnü athsunganahkhi ju Thrünpuh yu yankhi nangde lang alakheah; jumonü Ahithophelnü athsunganahkhi alala David tüsho Absalom ane chidonü leangkhi.