2 SAMUEL 13 - AMÜSÜH HÜM CL Bible (BSI)

Amnon tüsho Tamar

¹ Kim anükhüh dunglim, David tsührü Absalom niurü akheahakhamkhi amung Tamar lakheah; tüsho David tsührü Amnonnü alibe kheak muzho.

² Api niurü Tamar dünkheaknü mulong thsünüde Amnon tukthsü kam, tümüde alibe atsangkhitkhi lakheah tüsho Amnonnü alibe kheak tümü müthsükhukpü nangde alakheah.

³ Tüshe Amnon müyambuh khülang amung Jonadab, David akhiung Shimea tsührü lakheah; tüsho Jonadab ju rük ayuk mihtsürü lakheah.

⁴ Apinü anihbuh ki tha, “O kiulongthsüpuh tsührü, tümüde nü a yapsu abande pheakmulukdo la? Nünü I ki müthaba de?” Amnonnü api ki tha, “Inü I khiung Absalom niurü Tamar muzholah.”

⁵ Jonadabnü api ki tha, “Nü yapkiu kheak yapang, tüsho tukthsüa huhang; tüsho küyimki nü buh nü kheahpü arübanü, api ki thaang, ‘I niurü Tamar arübah I kilim atsühpü tümükhüh jihshang, tüsho I mikinü tsühyungbe mozümodoshang, junangde inü kheahbah akhah chingnü atsühbah.’”

⁶ Jumonü Amnonnü yap, tüsho tukthsükhi ruk huh; tüsho küyimki kiulongthsüpuhnü api kheahpü arükhea, Amnonnü kiulongthsüpuh ki tha, “Muzhobah I niurü Tamar arüshang tüsho I mikinü yikhap khürü nungshang, junangde inü akhah chingnü tsühanü.”

⁷ Judüki Davidnü thüyam ching Tamar kilim yüshih, tüsho tha, “Nü khiung Amnon yam lim yüang, tüsho api thsungkheak tsühyungpü mozümodojang.”

⁸ Jumonü Tamarnü akhiung Amnon yam ching api yapde alapung yü. Alibenü ayikeang lubah ayi, amikinü ayikangkang neam tüsho yikhap nunga tak.

⁹ Judüki anihbenü keangkih phüh lu tüsho api miki zojih, tüshe apinü mütsühde thsunglo. Amnonnü tha, “Alala I kinü wukhiukshang.” Jumonü alala api kinü wukhiukabah.

¹⁰ Judüki Amnonnü Tamar ki tha, “Yappung khiungshak ching tsühyungbe lubah arang, junangde inü nü khah chingnü tsühanü.” Jumonü Tamarnü anihbenü athsükhi yikhapbo lubah akhiung Amnon yappung ching yüzah.

¹¹ Tüshe küyimki alibenü lubah api tsühshihpü thüninde ayükhea, apinü alibe kheak ramlo, tüsho tha, “I niurü, arang, I lung yapang.”

¹² Alibenü api ki alo, “Yung, akhiung, I kheak dünimkih; tümüde Israel ching hadürü mürhimochoh; khide amakham tümü dürhimo!

¹³ I thsungkheaknü, I achihkhi tümü ching hanpü? Tüsho nü thsungkheak, nü ju Israel ching mihbukmuyuk rhimokhi labah. Kheakü jumonü kiulongthsüpuh ki keoang de inü nü ki mushuchoh; tümüde apinü I nü kheaknü mutholo.”

¹⁴ Tüshe apinü alibe ki mani; tüsho anihbe kheaknü amüküpbe thsümonü, apinü anihbe kheak nimkih tüsho alibe kheak amütsü rhimo.

¹⁵ Judüki Amnonnü alibe kheak khide thraneanabah; apinü anihbe muzhokhi kheaknü alübe thraneanabah. Amnonnü alibe ki tha, “Asürang tüsho tsoabahang!”

¹⁶ Tüshe alibenü api ki alo, “Yung, akhiung; tümüde I thiyia tsoshihkhi ju nünü I kheak rhimokhi kheaknü alübe amülim labah.” Tüshe apinü alibe ki mani.

¹⁷ Apinü anihbuh kipduhrü athrününgtsüng jibah tha, “Alibe ha I mikinü yankhita bahang, tüsho anihbe dunglim khimdopü mükhipang.”

¹⁸ (Kheakü alibenü abin phudode khim ashang phuyukheah; tümüde adüso kim ching kiulongthsürü tsührü atsangkhitrü kheak phuyujihde alakheah.) Jumonü ayamlarübonü alibe yankhitabah, tüsho anihbe dunglim khimdopü mükhipabah.

¹⁹ Tüshe Tamarnü aku kheak awah yihkih, tüsho anihbenü aphuyukhi khim ashang ju thorüp; alibenü akhah aku kheak yihkihbah achangnü tripde tsoabah.

²⁰ Anihbe akhiung Absalomnü alibe ki tha, “Nü khiung Amnonnü lung lakhea de? I niurü, kheakü thsungkheaknü zhikang; api nü khiung ah; ha nü mulong ching dühan.” Jumonü Tamar a abahkhitkhi liberü kamde akhiung Absalom yam ching bin.

²¹ Küyimki kiulongthsüpuh Davidnü harübo sokhea, api khide bukakhiuk tüshe apinü atsührü Amnon müthsümüchi, tümüde api ju adüjibuh lakheah.

²² Tüshe Absalomnü Amnon ki atsü yungsho amütsü she mütha; tümüde Absalomnü Amnon thranean; tümütüsho apinü aniurü Tamar kheak reangkihde amütsü rhimo.

Absalomnü Amnon Laksahkhi

²³ Kam mahne rünkhitshu Ephraim phünide alakhi Baal-hazor ching Absalom mihnu nam rhipde alakheah, tüsho Absalomnü kiulongthsürü tsührübo alala jiyuk.

²⁴ Absalomnü kiulongthsüpuh ki arübah tha, “Nü yamlarü mihnu nam rhiprübo arüa lah; kiulongthsüpuh tüsho api yamlarübo nü yamlarü lung yünahnü?”

²⁵ Tüshe kiulongthsüpuhnü Absalom ki tha, “Yung, I tsah-a, isa alala müyünü, jude yungsho isanü nü kheak hahmülang jihbah.” Anihbuhnü api kheak nimkih, tüshe apinü müyü; tüsho anihbuh kilim api müngühmühi jih.

²⁶ Judüki Absalomnü tha, “Jude yungsho, muzhobah I khiung Amnon isa lung arüshang.” Kiulongthsüpuhnü api ki tha, “Tümü thsüpü api nü lung yüpü?”

²⁷ Tüshe Amnon tüsho kiulongthsüpuh tsührübo alala api lung marüshihyi khiungde Absalomnü api kheak nimkihde tha. Absalomnü kiulongthsürü thünio nangde thünio mung.

²⁸ Judüki Absalomnü ayamlarübo ki thiyukhüm jih, “ Küyimki Amnon yukhu kheak mulong jihba tüsho küyimki inü nüsa ki Amnon kingang de athabanü, api laksahang. Dütre; inü nüsa ki thiyukhüm müjih de? Mulong toang tüsho athrungrü thsang.”

²⁹ Jumonü Absalomnü thiyukhüm jihkhi nangde ayamlarübonü Amnon kheak rhimo. Judüki kiulongthsüpuh tsührübo alala asürü tüsho nihbuh khoranunu kheak yükihbah tsokhamabah.

³⁰ Küyimki arübo limro ching lakhea, kiulongthsüpuh tsührübo sheshe maningde Absalomnü laksahdo de David kilim thiyusheak arü.

³¹ Kiulongthsüpuhnü asürübah akhim rukrüp, tüsho alo kheak yap; tüsho api ki zhiprü ayamlarü alalanü arü khim rukrüp.

³² Tüshe David akhiung Shimea tsührü Jonadabnü tha, “Arünü kiulongthsüpuh tsührü athrününgtsüngbo alala laksahkhamdo de I tungpuhnü dülüm; Amnon lang shea lah. Ha Amnonnü aniurü Tamar kheak amütsü rhimokhi nimungnü Absalomnü alümkihkheah.

³³ Kheakü jumonü, kiulongthsüpuh tsührü alala sheabahkhi nangde I tungpuh kiulongthsüpuhnü mulong ching dühan; tümüde Amnon lang shea lah.”

³⁴ Tüshe Absalom a alihyukde tso. Küyimki aheangrü athrününgtsüngbuhnü abinthrua kheahkhea, apinü awung yean Horonaim limro ching mihtsürü ahihkhüh arüde ngü.

³⁵ Jonadabnü kiulongthsüpuh ki tha, “ Kheahang, kiulongthsüpuh tsührübo arüdo; nü yamlarünü athakhi nangde ha dünjido.”

³⁶ Apinü athakham akede kiulongthsüpuh tsührübo arünü khiung, tüsho arü düsheak shuhkihde trip; tüsho kiulongthsüpuh le ayamlarübo alalanü khide düsüknimde trip.

³⁷ Tüshe Absalom a alihyukde tso, tüsho Geshur kiulongthsüpuh Ammihud tsührü Talmai kilim yü. Davidnü api tsührü dünkheak nimung aban tüzho.

³⁸ Absalomnü Geshur ching tsoyukbah ju ching kam mahsam la.

³⁹ Tüsho kiulongthsüpuh mulong ching Absalom lümrhihde yüabah; tümüde kheaküa Amnon shekhi dünkheak api mulong shukheamabah.