2 SAMUEL 12 - AMÜSÜH HÜM CL Bible (BSI)

Nathannü David Thürühkhi

¹ Tüsho Atungpuhnü wukihrü Nathan ju David kilim yüshih. Api David kilim arübah tha, “Kiuto ching mihtsürü mahne lakheah, khülang alarü tüsho püpü zhochihrü.

² Alarü mihtsürü ju mihnu tüsho moshi boto ahihkhüh lakheah;

³ tüshe zhochihbuh ju a apinü athulokhi namfimihnunu dre anikhüh khülang lang alakheah. Apinü ju mütrümusu, tüsho api le atsührübo lung asürü; anihbuh jim tsüh, apung chingnü yung, tüsho akhüh kheak yap, tüsho api tsührü nangde alakheah.

⁴ Kheakü hantsahrü khülang alabuh kilim arü, tüsho api ki arükhi hanrü kilim tsühyungpü mozümodopü thsüde anihbuh mihnu tüsho moshi boto lungnü alupü mümulong, tüshe apinü zhochihbuh namfimihnunu lubah anihbuh yam ching arükhi hanrü kilim mozümodojih.”

⁵ Judüki Davidnü mihtsürü kheak alü abukakhiuk. Apinü Nathan ki tha, “Atungpuh mung tamde thachoh, mihtsürü shepünü hade arhimokheanü ashepü thülünlah;

⁶ apinü namfimihnunu phüyi jihlobah, tümütüsho apinü ha rhimo, tüsho apinü mihmuzho müla.”

⁷ Nathannü David ki tha, “Mihtsürü ju nü ah! Atungpuh Israel Thrünpuhnü ha thachoh: Inü nü Israel kurungkheak kiulongthsürü thsüpü mujude-mokhit, tüsho inü nü Saul khah chingnü khümkhit;

⁸ inü nü putungrü yamkhün tüsho nü putungrü niubebo nü khüh kheak jih tüsho Israel yamkhün le Juda jih; tüsho ju mudukkea lasho, inü ahihdo yuklojihpü lakheah.

⁹ Api miki amütsü lakhi tümüde nünü Atungpuh yu amülim kamshihkhea? Nünü Hitbuh Uria nukshangnü laksahdo; nünü aniube ju nü niube thsüpü ludo, tüsho Amonrü nukshangnü api laksahdo.

¹⁰ Kheakü jumonü nukshang nü yam chingnü küyimkishe müchamachih, tümüde nünü I mükhemükimdo, tüsho Hitbuh Uria niube nü niube thsüpü ludo.

¹¹ Atungpuhnü ha thachoh: Nü yam chingnü inü nü azhihde thsümütsü akhiukshihbah; tüsho inü nü niube nü mük kinü lubah nü yamhingrü kilim jihbah, tüsho apinü ha anidüchi chingnü nü niube lung yapbah.

¹² Tümüde nünü a ramde rhimodo; tüshe inü a Israel alala mikinü tüsho anidüchi chingnü arhimobah.”

¹³ Davidnü Nathan ki tha, “Inü Atungpuh azhihde neak yihbeakdo.” Nathannü David ki tha, “Kheakü Atungpuhnü nü neak bahjihdo; nü müshe.

¹⁴ Judüalalashe, nünü ha rhimokhi hode khülang kinü Atungpuh bahyukdo, nü tsührü athrürü shebah.”

David Tsührü Shekhi

¹⁵ Jushu Nathannü api yam lim yüabah. Uria niubenü David kilim zübejihkhi khungarü kheak Atungpuhnü shik, tüsho mülangde tukthsüde kam.

¹⁶ Jumonü Davidnü khungarü thsungkheaknü Thrünpuh ki mushu; Davidnü khümkeak thsü, tüsho akhiungshak ching yüzahbah alo kheak tsüngreroro yap.

¹⁷ Api yam ching larü azothsürübonü api miki zhipbah alo kheaknü asürüpü athsung; tüshe apinü mani, yungsho arü lung jim mütsüh.

¹⁸ Athüne nipü khungarü ju sheabah. Tüsho khungarü shekhi dünkheak David yamlarübonü api ki thapü trede alakheah; tümüde arünü tha, “Khungarü rhangdung lachoki isanü api ki asuk, tüshe apinü isa ki manijih; dale küde thsah isanü khungarü shekhi api ki thakhukpü? Apinü nihbuh zangrü tümüanü athsümünim rhimopü labah.”

¹⁹ Tüshe Davidnü api yamlarübo ramde asukachihkhi ngü, khungarü sheabahdo de apinü anikhit; tüsho Davidnü api yamlarübo ki tha, “Khungarü shea la de?” Arünü alo, “Api shea lah.”

²⁰ Judüki Davidnü alo kheaknü asürübah müsühmüra, nihbuh zangrü mujude-müsühkhit, tüsho akhimmihbo müthria lu. Apinü Atungpuh yam ching yüzah tüsho kingaün; jushu api nihbuh yam lim yü; tüsho küyimki apinü akeokheanü, arünü amiki jim zojih tüsho apinü yimtsüh.

²¹ Judüki ayamlarübonü api ki tha, “Nünü arhimokhi ha tümü a? Khungarü rhangdung lachoki nünü khümkeak thsü tüsho trip; tüshe küyimki khungarü sheabahkhea, nünü asürü tüsho tsühyung.”

²² Apinü tha, “Khungarü rhangdung lachoki, inü khümkeak thsü tüsho trip; tümüde Atungpuhnü I ki amuzho huhde khungarü ju müsheshihpü labah de inü lüm.

²³ Tüshe kheakü api sheabahdo; tümü thsüpü I khümkeak thsüpü? Inü api belode arükhukba de? I api kilim yübah, tüshe api a I kilim malodarü.”

Solomon Zübekhi

²⁴ Judüki Davidnü aniube Bathsheba mulong shukheam, tüsho anihbe ki yübah alibe ki yap; tüsho alibenü tsührü athrürü khülang han, tüsho apinü amung Solomon de ji. Atungpuhnü api muzho,

²⁵ tüsho wukihrü Nathan kheaknü thiyusheak arüshih; jumonü apinü amung Jedidia de ji, tümütüsho Atungpuhnü api muzho.

Davidnü Rabba Yankhi

²⁶ Kheakü Joabnü Amonrü lapung Rabba yan, tüsho kiulongthsü kiuto yankhia lu.

²⁷ Joabnü David kilim thiyusheak yüshih, tüsho tha, “Inü Rabba azhihde keochihdo; kheaküshe, inü kiuto khürü ludo.

²⁸ Kheakü, jumonü aningkhi mihtsürübo bemukhungang, tüsho kiuto zündoang tüsho ju luang; yungsho inü kiuto ju alubah, tüsho ju I mungnü ajibah.”

²⁹ Jumonü Davidnü mihtsürü alala bemukhung tüsho Rabba ching yü, tüsho keochihbah lu.

³⁰ Apinü Milkom ku kheaknü suna kuthran lu; ju adünkhi khahngak 35 lakheah, tüsho ju ching shoto lung lakheah; tüsho ju David ku kheak yihkih. Kheaküshe apinü kiuto chingnü ayankhikhi ahihkhüh lubah arü.

³¹ Apinü ju ching larü mihtsürübo bekhit, tüsho arübo sangrhütbe le yinbean, awü shuhbah rhimoshih, yungsho arübo lotaklung zünpü yüshih. Hanangde apinü Amonrü kiuto alala ching rhimo. Jushu David tüsho mihtsürü alala Jirusalem lim alodarü.