2 SAMUEL 10 - AMÜSÜH HÜM CL Bible (BSI)

Davidnü Amon tüsho Siriarü Kukkhi

¹ Kim anükhüh dunglim, Amon kiulongthsüpuh sheabah, tüsho api tsührü Hanunnü api müthri kiulongthsü.

² Davidnü tha, “Nahashnü I ki thiyuro-amuzho huhkhi nangde inü api tsührü Hanun ki thiyuro-amuzho huhbah.” Jumonü Davidnü yunithsürü thiyia anihbuh abuh dünkheak mulong shukheamshihpü yüshih. Küyimki David yunithsürü Amonrü lo ching arükhea,

³ Amon kiulongthsürü tsührübonü arü tungpuh Hanun ki tha, “Mulong rozhak shukheamde yunithsürü nü kilim arüshihmonü Davidnü nü buh ki akin jihchoh de atsütsü nünü lümla de? Kiuto züta kheahshihpü, tüsho yanabahpü Davidnü yunithsürübo nü kilim arüshihkhi yung de?”

⁴ Jumonü Hanunnü David yunithsürü rambah arü mükhühnam chamkhüh hüta bahjih, arü mutsu kheak khimmih aphulung ching niprüpjih tüsho thiyia tsoshih.

⁵ Küyimki David ki thakhea, apinü arü shorupü yüshih, tümüde mihtsürübo khide achih ngü. Kiulongthsüpuhnü tha, “Nüsa mükhühnam müchinyichokia Jirikho ching laang, tüsho jushu lang alodarang.”

⁶ Küyimki Amonrünü arübo David riri kamdo de amükheahkhitkhea, Amonrünü thiyia yüshih tüsho Beth-rehob tüsho Zoba ching Siriarü, jingtsahrü bonungrü 20,000, tüsho Maaka kiulongthsüpuh mihtsürü 1000, tüsho Tob mihtsürübo 12,000 muloa bebah arü.

⁷ Küyimki Davidnü ju sokhea, apinü Joab tüsho thirithsürü alala bebah bonungrübo yüshih.

⁸ Amonrünü akhiukbah ripit limro kheak thirithsüpü thürünga zhip; tüshe Siriarü Zoba le Rehob tüsho Tob le Maaka mihtsürübo a aleangkheak mükeak ching lakheah.

⁹ Küyimki Joabnü api azhihde müngüh tüsho dunglim keochihmusukhi ngükhea, apinü atsüdak Israel mihtsürü mokhit tüsho Siriarü azhihde thürünga zhipshih;

¹⁰ aningkhi api mihtsürübo akhiung Abishai kilim jih, tüsho apinü arübo Amonrü azhihde thürünga zhipshih.

¹¹ Apinü tha, “I thsungkheaknü Siriarü khide müküpsho, nünü I rungang; tüshe nü thsungkheaknü Amonrü khide müküpsho, I arübah tüsho nü rungbah.

¹² Reangzahang, tüsho isanü isa mihtsürü tüsho isa Thrünpuh kiutobo dünkheaknü mulong toanü; tüsho Atungpuhnü api tsükhi thsüshang.”

¹³ Jumonü Joab tüsho api lung lakhi mihtsürübo Siriarü bede thirithsüpü keochihpung yü; tüsho arübo api müngüh shande tso.

¹⁴ Küyimki Siriarü tsokhi Amonrünü angükhea, arü she Abishai müngüh tso, tüsho kiuto ching yüzah. Jushu Joabnü Amonrü bede keochihkhi chingnü alodarü tüsho Jirusalem lim yü.

¹⁵ Tüshe küyimki Siriarünü Israelnü arü kukkhi ngükhea, arünü rukhüh shumukhung.

¹⁶ Hadadezernü yüshih tüsho Euphra hobah alakhi Siriarü bebah arüshih; tüsho Hadadezer bonungrü kurungkheak Shobaknü akuthsübah arübo Helam lim arü.

¹⁷ Küyimki Davidnü ha sokhea, apinü Israel alala bemukhungbah Jordan ho tüsho Helam lim arü. Siriarünü David azhihde thürünga zhip tüsho api bede keochih.

¹⁸ Siriarünü Israel müngüh tso; tüsho Davidnü Siriarü lolungbe berü 700, khoraberü 40,000 laksah, tüsho bonungrü limthobuh Shobak yurijih, tüsho api ju ching sheabah.

¹⁹ Küyimki Hadadezer yamlarü kiulongthsürübo alalanü arübo Israelnü akukkhi ngükhea, arübonü Israel kheak mungtsü thsü, tüsho arü bukkhüp laabah. Jumonü Siriarünü kheaküa Amonrü rungpü treabah.