2 PETER 2 - AMÜSÜH HÜM CL Bible (BSI)

Arükchih Thsangyurübo

¹ Adüso arükchih wukihrübo mihtsürü bolung lakheah, junangde nüsa bolung she arükchih thsangyurübo akhiukbah. Arünü athsümünimbe akeangyu kingaünyakzan hande arübah, tüsho arü rhokhitbuh arü Putungrü reanglobah, tüsho junangde arünü arü nihbuh kheak zukleangnü athsümünim hande arübah.

² Ahihdonü arü makhamaleak limrobo yanbah, tüsho arü hode thiyuro ju amütsü kamshihbah.

³ Thsangyurü harünü arü mükhütmürakhi chingnü arü lümkangyu thiyukheannü nüsa bemüchihbah. Tümüde kim ashang chingnü arü mahkhappü, yomuhde müla tüsho arü thsümünimpü yapnede müyü.

⁴ Neak yihbeakrü yunirübo Thrünpuhnü maningshih, tüshe thsümüchipung ching jipyuka, amiting ching rhüka zobah mahkhap nimung aleangde lah.

⁵ Thrünpuhnü jipü lomi maningshih, tüshe amükinrü mihtsürü lomi kheak keking hande arü; apinü akhümkhitkhi ju thiyuro-lungki thsangyuthsangrabuh Noa, tüsho püpürü mihtsürü 7 lang alakheah;

⁶ tüsho Sodom le Gomorra kiutobo mobün kamshihde athsümünim ching bahyuk, tüsho amükinrübo ki amütsan khülang thsü;

⁷ tüsho mihbukmuyuk rhimo amünean hode lümthsünüa lakhi Lot bekhit

⁸ (tümüde thiyuro-lungki mihtsürü ju arü bolung lade arü yakzan mülakhi rhimobo ngükhi tüsho asokhinü nimung aban api thiyuro-lungki me thsünü)–

⁹ tüsho junangde arü rükaki chingnü akinrü bekhitpü tüsho mahkhap nimung thsungkheaknü mihbukmuyuk athsümüchi khüp zopü Atungpuhnü mükheahlah,

¹⁰ adungto thsüde amüneankhi shihkünkhi ching tsahrü tüsho Thrünpuh thiyukhümsühmüh bahyukrü lah. Arübo mulong tolah tüsho müzhaklah; arünü müretahkhibo azhihde amütsü asukpü mütre,

¹¹ tüshe yunirübo sühmüh tüsho wu atobe lalashe, Atungpuh miki arü azhihde amütsü masukchoh.

¹² Tüshe harü mihtsürünü arünü manikhitkhibo ching mükhemükimchoh. Arübo bukmüke shiwühbo yakli nangde, aphuhpü tüsho asheshihpü lang zübea lah, tüsho shiwühbo nangde arü she adükheakbah.

¹³ Arünü arhimokhi dün arü kilim athsümünimnü athrihlobah. Arü asüharapü lakhi ju arü pangnü akünkhi reangkeamshihpü animuro tümütümü she arhimopü lah.

¹⁴ Mükbo yüliyüranü mide, neak yihbeakpü mutuklo; reangmüzahkhi mihtsürübo arünü münityukchoh. Arü mulongbo mükhütmürapü thsükhita lah. Arübo muthrumünean khüp lah!

¹⁵ Arünü alungki limro bahyukbah amülim rhimokhi chingnü alü thsükhi muzhobuh Beor tsührü Balaam limro yando,

¹⁶ tüshe api neak dünkheak thürüh; thiyu müthabe donkinü mihtsürü düsheaknü tha tüsho wukihrünü makhade arhimokhi tukloshih.

¹⁷ Harü mihtsürübo ju ke müzahkhi kekhip tüsho chinthrümnü yünde ayükhi amo ah. Arü thsungkheaknü amiting amürak zojihlah.

¹⁸ Küyimki arünü lülüshishide akeangkeang yu asukbanü, arünü shihkünkhi, yakli amütsü hode dükde mülarü bolungnü atsokhirü bephülapchoh.

¹⁹ Arünü arü ki zuzu thiyuchihchimchoh tüshe arü a athsümünim yo azhorü ah; tümüde tümüpürünü mihtsürü ju kukchonü, api ju yo azhorü ah.

²⁰ Arünü isa Atungpuh tüsho akhümkhitrü Jisu Khrista mükheahkhinü alomi athsümünim bahkhibah kheaküshe ju ching phuhlode kukshihsho, arü atan lakhi kheaknü akheam amütsübe lah.

²¹ Arünü mükheahbah arü kilim jihkhi amüsüh yukhüm chingnü atsolopü dün a thiyurolungki limro mümükheahkhülaa atsübe thsüpü lado.

²² Thiyuro müchitmudu yande arü kheak dünjido: “Khihnunü apinü amülümkhi lim rholode yüchoh,” tüsho, “Kheaknu dretonü kemüyihbah akhimniuhniuh ching awuhpung lim alode yüchoh.”