2 KORINT 9 - AMÜSÜH HÜM CL Bible (BSI)

Khristanrü Rungachihpü

¹ Kheakü akinrübo rungpü kingaün dünkheak inü nüsa kilim thrütpü yihnüpü müla,

² tümüde nüsanü ahobe kamnü ründe Akaia ching thsakhama lakhi mükheahbah thade, nüsa dünkheak inü Macedonia mihtsürübo ki kükheangchoh; tüsho nüsanü akünsahkhinü arü ahihdo thurumusudo.

³ Tüshe inü nüsa dünkheak kükheangkhi mütsanpü akeangkeang mükampü thsüde keoniorübo thiyichoh, junangde inü nüsa ki thakhi nangde nüsanü athsakhambah;

⁴ jude yungsho Macedoniarü khürü I lung arübah nüsa müthsakhamde ngüsho, khide mulong tode labah nüsa dünkheak thapü tümü mülade isa achih ngübah.

⁵ Jumonü I müngühnü keoniorübo nüsa kilim tuthsuka yüshihbah nüsanü alokhikhi thsambah amüngühnü tsanglungpü yihnüpü lah de inü lümdo, junangde reangkihde yung tüshe mulongkhi thsambah nangde ju thsakhama labah.

⁶ Shepünü nükde ahiubanü nükde yimlubah, tüsho shepünü hihde ahiubanü pheangde ayimlubah de lümkhitang.

⁷ Mihtsürü abannü mükünmuthsung yungsho arochihde yungde nihbuh mulongnü apungkhikhi jihang, tümüde asühde ajihrü Thrünpuhnü muzhochoh.

⁸ Tüsho Thrünpuhnü nüsa kilim müngühmühi lüpdükhi suhdahde ajihpü kuklah, junangde nüsa kamruhroro lüpdükhi suhdahde alabah tüsho rhimo atsübo thsungkheak suhdahde ajihbah.

⁹ Ha thrüta lah, “Apinü zhochihrü kilim salade jihchoh, api thiyuro-lungki lünnü rünkhiungde lah.”

¹⁰ Shepünü müjih-hiurü kilim müjih tüsho atsühpü yikhap jihchonü nüsa müjih bushihbah tüsho nüsa thiyuro-lungki yimlukhi alü kamshihbah.

¹¹ Nüsa limro lüpdükhi ching lakhitshihbah, junangde kim aban salade alabah, tüsho isa hode nüsa salakhinü Thrünpuh ki makshe jihshihbah;

¹² tümüde ha tankih rhimokhinü akinrü yihnüpü lakhi lang müjih tüshe Thrünpuh kilim makshe jihpü hihde kamshihchoh.

¹³ Ha tankihkhi mütsankhi ching, nüsanü Khrista thiyusheak-atsü mihyuanikhi tüsho arü le püpürü alala thsungkheak salade arungkhi hode arünü Thrünpuh müretahshihbah.

¹⁴ Tüsho Thrünpuhnü nüsa kilim münchi hode amüthsüm jihkhinü, arünü sükde amuzho lade nüsa thsungkheak tamkhüntamnüjihbah.

¹⁵ Müthakhukbe api thsambah thsungkheak Thrünpuh kilim makshe jihang!