2 KORINT 8 - AMÜSÜH HÜM CL Bible (BSI)

Khristan Jihchungkhi

¹ Keoniorübo, Macedonia borübo ching huhkhi Thrünpuh amüthsüm nüsanü mükheahshihnelah,

² tümüde arübo küpkhukbonü mütsüdakde rükaki; tüshe arü zhochih-a lalashe khide salade jih-chungkhinü arü asühpü ato lakheah.

³ Tümütüsho arünü athsükhukkhi tüsho ju kihode salade jihdo de inü thiyumütsan thsükhuklah,

⁴ junangde akinrübo rungpü ching shihcham lupü arünü zuknukde isa ki mushu.

⁵ Tüsho arünü ha isanü alümkhi nangde arhimokhi yung, tüshe akhuhde arü küdah thsüde Atungpuh kilim, tüsho jushu Thrünpuh lümkhi yande isa kilim jih.

⁶ Jumonü apinü tankih-a lakhi nangde, nüsa bolung ha amüthsüm banthsangpü isanü Tita ki tuthsuk.

⁷ Tüshe nüsa lüpdükhi–akin ching, thiyu thapü ching, mükheahmudu ching, künsahkhi ching, tüsho isa muzhokhi ching suhdahkhi nangde amüthsüm ching she suhdahpü thsang.

⁸ Ha inü thiyukhümnü mütha, tüshe püpürü künsahkhi akede nüsa adüngakhi rükakheahchoh.

⁹ Tümüde nüsanü isa Atungpuh Jisu Khrista amüthsüm mükheahlah, junangde api alarü thsüa lalashe, anihbuh mülamüthsükhinü nüsa alarü kampü thsüde nüsa dünkheaknü api zhochihrü kam.

¹⁰ Tüsho hadürü dünkheaknü I athsunganah jihchoh: ahobe kam nüsanü atankihkhi ju arhimopü lang yungde amulongpü lakhi, kheakü nüsanü abanpü tsülah,

¹¹ junangde nüsanü amulongpü thsakhama lakhi junü nüsanü abanpü kheak ayebah.

¹² Tümüde thsakhama lasho, amülakhi yande yungde, mihtsürü ju tümü lanü ju yande aleangkhikhukbe lah.

¹³ Inü alümkhi ju, püpürü zuzu thsüshihbeah tüsho nüsa hahmülang lubeah de yung,

¹⁴ tüshe shahrihkhüh lapü thsüde kheakü nüsa suhdahkhi ju arü yihnüpü lakhi jihbeah, junangde arü suhdahkhi ju nüsa yihnüpü lakhi jihbah.

¹⁵ Ha thrüta lah: “Shepünü hihde hanmukhungkheanü kihode müla, tüsho shepünü nükde hanmukhungkheanü aphahde müla.”

Tita tüsho Api Müyamrübo

¹⁶ Inü nüsa thsungkheak lakhi nangde Tita mulong ching alümrhihpü jihbuh Thrünpuh ki makshe jihang.

¹⁷ Tümüde Titanü isanü atuthsukkhi leangkhikhi lang yung, tüshe apinü khide künsahde tüsho anihbuh küdahnü pungkhibah nüsa kilim arüchoh.

¹⁸ Isanü api lung thiyusheak-atsü thsangyuthsangrakhi ching borübo alalanü athukhi keoniorü thiyichoh;

¹⁹ tüsho ju lang yung, tüshe Atungpuh müretahpü tüsho isa rhimo atsü huhpü, amüthsüm rhimode alakhi isa lung tsahshihpü borübonü api thiyi.

²⁰ Isanü rhimode alakhi arung thsambah thsungkheak shenü matsangbeah de isanü lümlah,

²¹ tümüde isanü mükkheahkih lakhi ju Atungpuh miki lang yungde mihtsürü miki she wüntre lapü lah.

²² Tüsho isanü ahihkhüh ching künsahde amütsankhi, tüsho kheakü apinü nüsa kheak mulongram ato lakhinü alü künsahde alakhi isa keoniorü ane lung thiyichoh.

²³ Tita a I atrurü tüsho nüsa tankihpü ching rukhüh rhimorü ah tüsho keoniorübo ju a Khrista müretah borübo yunithsürübo ah.

²⁴ Jumonü nüsa amuzho tüsho nüsa dünkheak isa kükheangkhi borübonü angüpü thsüde harü mihtsürübo ki amütsan jihang.