2 KORINT 7 - AMÜSÜH HÜM CL Bible (BSI)

¹ Amuzho müyamrübo, tümütüsho isa harü alokhikhibo lah, pang tüsho me müneankhi lüpdükhi chingnü isanü müsühkhitanü, tüsho Thrünpuh trekhi ching banthsangkhi amüsüh kamanü.

Paul Asühkhi

² Isa kilim nüsa mulongbo khimshuhang; isanü she ki amülim müthsü, isanü she ki müthsümünim, isanü she ki mülapyukde mürhimo.

³ Inü ha nüsa bahyukde mütha, tümüde inü akhuhlim, rukhüh shepü tüsho rukhüh lapü nüsa ju isa mulong ching lah de thado.

⁴ Inü nüsa kheak mulongram ato lah; nüsa hode kükheangkhi ato lah; I a sühakhimnü mide lah. Isa thsünü alala ching I khide asühdo.

⁵ Tümütüsho küyimki isa Macedonia ching arükhea, isa pang sühakhim müla, lüpdükhi lim küpkhuk lakheah. Wungdo rukachih, alunglim atrebe lakheah.

⁶ Tüshe akheamkhibe ching larü mulong shukheamrü Thrünpuhnü Tita arüshihde isa mulong shukheam,

⁷ tüsho api arükhinü lang yung, tüshe nüsanü api kilim mulong shukheam jihkhinü she ah. Nüsanü I mürheangkhi, sükde nüsa mulong rozhakkhi, nüsanü mulongsahde lümrhihkhi isa ki thado, junangde inü alü thsüde asüh.

⁸ I yo kihümnü nüsa mulong tukthsüshih-a lalashe inü mülümrhihlo (lüma lalashe), tümüde ju kihümnü anükhühkheak lang thsüthsü she nüsa mulong tukthsüshihkhi inü ngüdo.

⁹ Nüsa mulong tukthsükhinü yung, tüshe nüsa mulong tukthsükhinü mulong müthrikhi thsungkheak I asühchoh; tümüde Thrünpuh lümkhi yande nüsanü mulong tukthsü, junangde isa hode nüsa akeangkeang ching müthsünü.

¹⁰ Tümüde Thrünpuh lümkhi yande mulong tukthsükhinü akhümkhit lim bepü mulong müthri akhiukshihchoh tüsho tümü mülümalo, tüshe alomi yande mulong tukthsükhinü ashepü akhiukshihchoh.

¹¹ Ha Thrünpuh lümkhi yande mulong tukthsükhinü nüsa kheak tümü akhiukshih-a lanü kheahang: azhihayihkhi, nüsa müsühde alapü mulongdakkhi, thiyuro, bukakhiukkhi, lamlamsahdo, künsahde, lümrhihpü, thiyuro rhimo kheahpü thsakham. Hadürü alala ching nüsa müsühde alakhi mütsan.

¹² Jumonü inü nüsa kilim thrüta lalashe, ju amülim rhimobuh yungsho amülim hode thsünübuh dünkheak yung, tüshe nüsanü isa lümrhihkhi ju Thrünpuh miki akhiukpü ah.

¹³ Jumonü isa mulong shukheam lah. Tüsho isa mulong shukheamkhi kheak khiode Tita asühkhi ching isanü alü asühachihchoh, tümütüsho nüsa alalanü api lümkhi sühakhimshih.

¹⁴ Tümüde inü nüsa dünkheak api ki kükheangkhi ching nüsanü I achih müngüshih; tüshe isanü nüsa ki thakhi lüpdükhi thiyuro lakhi nangde, Tita miki isanü kükheangkhi thiyuro mütsando.

¹⁵ Tüsho nüsa alalanü mihyuanide, trede tüsho ajande api leangkhikhi lümkhitchoki apinü nüsa muzhokhi atobe kamchoh.

¹⁶ I asühchoh, tümütüsho inü nüsa kheak athülünkhi mulongram lah.