2 KORINT 6 - AMÜSÜH HÜM CL Bible (BSI)

¹ Rukhüh Thrünpuh tankihrü thsükhinü Thrünpuh amüthsüm akeangkeang ching düleangkhi de isanü nüsa ki tuthsukchoh.

² Tümüde apinü thachoh, “Aleangkhipü kim ching inü nüsa ki anido, tüsho akhümkhit nimung ching nüsa rungdo.” Kheahang, kheakü aleangkhipü kim ah; kheahang, kheakü akhümkhitpü nimung ah.

³ Isa tankihkhi ching amülim tümü müngüpü thsüde isanü she limro she jingmükhebe muzhochoh,

⁴ tüshe Thrünpuh tankihrü thsükhinü limro aban ching isa küdahnü tsülah de lümchoh: arümkheam ato hode, thsünü ching, küpkhukbo, thsümütsübo,

⁵ ashikkhibo, aramrü thsükhi, arhungangümbo, khisahkhi, mükmutrukhi, akhümkhi;

⁶ atsangkhitkhi, mükheahmudu, arorikhi, amuzho, Amüsüh Me, atsütsü amuzho,

⁷ thiyuro thakhi, tüsho Thrünpuh wu; khah tsülim tüsho huzulim ching thiyurolungki thsühnuk lade;

⁸ wüntre tüsho wüntre mülakhi ching, isa mükhemükim tüsho shijih. Isa akeangyu tharü khejih, tüshe thiyuro lah;

⁹ mümükheahde la, tüshe tsüde mükheahabah; shede la, tüsho kheahang isa arhang lah; thsümüchia la, tüshe mülaksah;

¹⁰ mulong rozhakde la, tüshe kamruhroro asühachihde la; zhochihrü la, tüshe ahihdo alarü kamshih; tümü mülade la, tüshe lüpdükhi la.

¹¹ Korintrübo, nüsa kilim isanü khuhlangde thado; isa mulong mülihde khimshuhlah.

¹² Nüsa ki mümuzhokhi ju isanü yung; isa ki mümuzhokhi ju nüsa ah.

¹³ Ju müthri, nüsa mulongbo she mülihde kamshang de tsührübo ki nangde inü thachoh.

Amükinrü lung Darihako

¹⁴ Amükinrü lung arihde rukhüh dürhimo. Tümütüsho thiyuro-lungki le amülim arih-rhimo tümü la? Yungsho ayinnü amiting lung arihkhi tümü la?

¹⁵ Khrista tüsho amünean dükeak arihachihkhi tümü la? Yungsho akinrünü amükinrü lung rukhüh tümü la?

¹⁶ Thrünpuh arüngyamnü sangthsübo kheak arihkhi tümü la? Tümüde isa ju arhang Thrünpuh arüngyam; Thrünpuhnü tha, “I arü kheak labah tüsho arü bolung tsahbah, I arü Thrünpuh thsübah tüsho arü I mihtsürü thsübah.

¹⁷ Jumonü arü kheaknü akhiukang, tüsho arü kheaknü chamkhiang, Atungpuhnü thachoh, tüsho amümüsüh tümü düqiu; tüsho inü nüsa leangkhibah,

¹⁸ I nüsa abuh thsübah, tüsho nüsa I tsührübo le tsührübebo thsübah, Wuto Atungpuhnü thachoh.”