2 KORINT 5 - AMÜSÜH HÜM CL Bible (BSI)

¹ Kheakü isa lakhi alomi khimyam thsümünimsho, mihtsürü khahnü müthsükhi yinmi ching lün yam Thrünpuh kilimnü lah de isanü mükheahlah.

² Tüsho yinmi ching yo thüyam isa kheak phukihpü khide künsahde isa mulong dukchoh,

³ junangde ju phuyukhinü isa bünkeang müngüde alabah.

⁴ Tümüde isa ha khimyam ching lachoki, isa mulong duklah tüsho hahmülang lah, tümütüsho isa muphuyupü yung tüshe yinmi yamnü aphudopü künlah, junangde tümü ashepü lanü rhangdungnü muyuabahbah.

⁵ Shepünü isa thsungkheak harü tsanglungkhea, shepünü isa kilim mütsanmükhi thsüde Me jihkheanü, ju Thrünpuh ah.

⁶ Jumonü isa kamruhroro mulong tode lah; isa ha pang yam ching lachokia Atungpuh kheaknü chamkhibah lah de isanü mükheahlah,

⁷ tümüde isa akinnü tsahchoh, angükhinü yung.

⁸ Isa mulong tode lah, tüsho isanü pang kheaknü chamkhibah Atungpuh lung thüyam ching lapü mulonglah.

⁹ Jumonü isa thüyam ching yungsho chamkhibah lalashe, isanü api asühshihpü mükkheahkih thsüchoh.

¹⁰ Tümüde isa alala Khrista thiyukhap binkiu miki labah, junangde mihbüm abannü pang ching rhimokhi ayannü atsü yungsho amütsü leangkhibah.

Khrista hode Thrünpuh ki Müyamrü

¹¹ Jumonü, Atungpuh trekhi mükheahde isanü mihtsürübo münityukchoh; tüshe isa tümüanü Thrünpuhnü mükheahlah, tüsho nüsa lümkhi ching she ju mükheahlah de inü akin lah.

¹² Kheaküshe isanü nüsa ki shilode mütha tüshe isa dünkheak kükheangpü nüsa ki amütsan jihchoh, junangde nihbuh yakli chingnü yungde mihtsürü lalim kheak lülüshishirü ki nüsanü alokhukbah.

¹³ Tümütüsho isa ju isa tsangde lasho, ju Thrünpuh thsungkheak lah; isa ju isa lümkhi alungki ching lasho, ju nüsa thsungkheak lah.

¹⁴ Tümüde Khrista amuzhonü isa danlochoh, tümütüsho alala dünkheaknü khülang shedo de isanü mütsanlah, jumonü api shekhi ching alalanü shihcham luchoh.

¹⁵ Tüsho alala dünkheaknü api she, junangde sherü rhangdung lanü kheaküa nihbuh thsungkheak müla tüshe arü dünkheak shebah arhang kamlobuh thsungkheak labah.

¹⁶ Jumonü kheakünü ründe isanü sheshe mihtsürü lalim yande mükheahyuk; isanü khülang ki Khrista ju mihtsürü lalim yande kheahyuka lalashe kheaküa isanü api ju jude müthsü.

¹⁷ Jumonü khürü Khrista ching lasho, api aso thrünlokhi ah; awünbe hode tsodo, kheahang, aso arüdo.

¹⁸ Ha alala Khrista hode isa api lung tsüarihkhi tüsho tsüarihkhi tankih rhimo isa kilim jihbuh Thrünpuh kilimnü lah;

¹⁹ juju mihtsürübonü arü azhihde neak yihbeakkhi mükhede Thrünpuhnü alomi ju Khrista ching anihbuh kilim tsüarihshih. Tüsho apinü isa kilim tsüarihkhi yusheak jihdo.

²⁰ Jumonü Thrünpuhnü isa hode tuthsukkhi nangde, isa ju Khrista yo limburü ah. Khrista thsung thsüde isanü nüsa ki mushuchoh: Thrünpuh kheak tsüarihang.

²¹ Tümüde isa ju api lung Thrünpuh yo thiyuro-lungkirü kampü thsüde apinü isa dünkheaknü neak mümükheahbuh neak yihbeakshih.