2 KORINT 2 - AMÜSÜH HÜM CL Bible (BSI)

¹ Nüsa mulong tukthsüshihpü thsüde I nüsa kilim marülo de inü lüma lu.

² Tümüde inü nüsa mulong tukthsüshihsho, inü mulong tukthsüshihrü kheak hode shenü I asühshihpü?

³ I asühshihpü larünü I mulong mutukthsüshihbeah de lümbah inü thrütdo, tümüde I asühkhi ju nüsa alala asühkhi labah de nüsa alala kheak mulonglam lah.

⁴ Tümüde inü nüsa kilim lümthsünü ato tüsho mulong thsünü ching tüsho chikebo bede athrütkhi ju nüsa mulong tukthsüshipü yung tüshe nüsa thsungkheak I amuzho tokhi nüsanü mükheahshihpü ah.

Athsümünimrü ki Neak Bahjihkhi

⁵ Tüshe khürünü khülang khüh mulong tukthsüshih-a lasho, nüsa alala mulong tukthsüshihkhi nangde I ki a yung le api kheak khide dümüküp.

⁶ Nüsa ahihkhühnü ha mihtsürü hanangde thsümüchikhi suhdahdo.

⁷ Kheakü nüsanü rholobah api neak bahjang; tüsho api mulong shukheamang, jude yungsho api khide mulong rozhakbah.

⁸ Jumonü nüsanü api muzhopü mütsanang de inü nüsa ki mushuchoh.

⁹ Hamonü nüsanü lüpdükhi ching mihyuanila shi yungnü rükakheahpü tüsho amükheahpü inü thrüt.

¹⁰ Nüsanü sherü neak bahjihchonü, inü she neak bahjihchoh. Inü tümükhüh neak bahjihsho, Khrista miki nüsa thsülimnü ju neak bahjihbah,

¹¹ jude yungsho arimrinü isa kukbah; tümüde api rük thsükhi isanü mükheahlah.

Khrista hode Akuk Ngükhi

¹² Küyimki Khrista thiyusheakatsü thsangyuthsangrapü I Troa ching arükheanü Atungpuhnü I kilim ripit khimshuhjih;

¹³ tüsho I me ching sühakhim mülade alakheah, tümütüsho inü ju ching isa keoniorü Tita müngü. Jumonü inü arü kheaknü chamachihbah Macedonia lim yü.

¹⁴ Tüshe Khrista ching kamruhroro akuk ngükhi ching isa bebuh, tüsho api mükheahkhi rhümthünea isa hode lüpdükhi ching bushihbuh Thrünpuh ki makshe jihang.

¹⁵ Tümüde isa ju akhümkhitrü tüsho adükheakrü bolung Thrünpuh kilim Khrista yo arhümthüneabe nangde lah.

¹⁶ Khülang kilim isa ju ashekhi shuhrhüm ah; püpü kilim rhangdung rhümthüneabe ah. Shepü harü thsungkheak suhdahla?

¹⁷ Tümüde isa a püpürü ahihkhüh nangde Thrünpuh yu yinzüyindochoh yung; tüshe adüngakhide, Thrünpuh kilimnü, isanü Khrista ching Thrünpuh miki asukchoh.