2 KIUTHSÜYUKHEAN 8 - AMÜSÜH HÜM CL Bible (BSI)

Solomonnü Akuk Ngükhibo

¹ Solomonnü Atungpuh yam tüsho anihbuh yam thsüchoki, kam muku akheam ching,

² Hiramnü api kilim jihkhi kiutobo thsülo, tüsho jurü ching Israel mihtsürübo lashih.

³ Solomonnü Hamath-zoba ching yü tüsho ju yan.

⁴ Apinü sunglo ching Tadmor thsü tüsho kukruk zopung kiutobo alala Hamath ching thsü.

⁵ Apinü akube Beth-horon tüsho abobe Beth-horon, chipi ayünkhi kiutobo, rhübo, ripitbo, tüsho akhrihbebo bede,

⁶ tüsho Baalath, Solomon kukruk zopung kiutobo she, tüsho khora-lolungbebo thsungkheak kiutobo, api khoraberü thsungkheak kiutobo, tüsho Jirusalem, Lebanon, tüsho apinü yakzan shuhkhi lomi alala ching Solomonnü athsüpü lümkhibo thsü.

⁷ Mihtsürü alala Hitrü, Amorrü, Perizrü, Hivrü, tüsho Jebusrü aningkhi, sherübo Israel yungnü,

⁸ arü tsühsoniusobo chingnü sherübo lomi ching aninga lakhea, sherübo Israel mihtsürünü müthsümünim–harübo Solomonnü nimkih-a rhimoshihpü thrütyuk, ju yakli khihni khiungde lah.

⁹ Tüsho Israel mihtsürübo a Solomonnü api rhimo thsungkheak azhorü müthsüshih; arübo a bonungrü, api torübo, api khora-lolungbe tüsho khoraberü limthorübo lakheah.

¹⁰ Harübo ha kiulongthsüpuh Solomon yo atorübo, arü 250nü mihtsürübo kurungkheak thiyukhüm shuh.

¹¹ Solomonnü Pharao tsührübe David kiuto chingnü apinü alibe thsungkheak thsükhi thüyam ching bede arü, tümüde apinü tha, “I niube a Israel kiulongthsüpuh David yam ching müla, tümüde Atungpuh sangdan arükhi dangpungbo amüsüh lah.”

¹² Judüki Solomonnü apinü arüngyam müngüh thsükhi A TUN GPU H kingaün sadam kheak taka kingaünkhi jih,

¹³ nimung aban yihnüpü rhimo, Mosa yukhüm yande amunibo, khinu aso, tüsho kam kheam thünio mahsam thsungkheak jih–phaüm muyukkhi thünio, yimlukhi thünio, yünthsünio.

¹⁴ Abuh David yuzüng yande, apinü amükeamrübo chamnakkhi arü tankihpü thsungkheak, Levirü thsungkheak mungshi rhimo yambo tüsho nimung aban yihnüpü lakhi amükeamrü rungpü rhimobo, tüsho ripit aphuaphu thsungkheak ripit neakrü chamnakbo; tümütüsho junangde Thrünpuh mihtsürü Davidnü thiyukhüm jih.

¹⁵ Kiulongthsüpuhnü amükeamrübo tüsho Levirü ki tümükhüh yungsho rahpung dünkheak thiyukhüm jihkhi chingnü arünü müchamkhi.

¹⁶ Hanangde Atungpuh yam khimtan nimungnü Atungpuh yam müthsükhiyi khiungde Solomon rhimo alala bankham.

¹⁷ Judüki Solomonnü Ezion-geber tüsho Edom lomi ching keto yean Eloth ching yü.

¹⁸ Hiramnü api yamlarübo, sangkungbo, tüsho kephungsorü, ayamlarübo kümde api yüshih. Arübo Solomon yamlarübo lung Ophir ching yü, tüsho ju chingnü suna khahngak 15,000 akumung lubah kiulongthsüpuh Solomon kilim arü.