2 KIUTHSÜYUKHEAN 35 - AMÜSÜH HÜM CL Bible (BSI)

Josianü Phungho-thünio Arüngkhi

¹ Josianü Jirusalem ching phungho-thünio mung; arünü akhuhbe khinu nimung thürükheak phüyi nipü phungho-thünio namfimihnunu laksah.

² Apinü amükeamrübo arü rhimobo ching yüzahshih tüsho Atungpuh yam tankihpü ching mulong toshih.

³ Apinü Israel alala thsangyurü tüsho Atungpuh kilim müsühde alarü Levirü ki tha, “Amüsüh sangdan ju Israel kiulongthsüpuh David tsührü Solomonnü athsükhi yam ching yuka zoang; kheaküa nüsa dubuh kheak hanpü yihnüpü müla. Kheakü Atungpuh nüsa Thrünpuh tüsho api mihtsürü Israel tankihang.

⁴ Israel kiulongthsüpuh Davidnü athrütkhi tüsho api tsührü Solomonnü athrütkhi ayannü, nüsa jipürü buhtsüh, achamnakbo yande tsanglungang.

⁵ Nüsa jipürü buhtsüh keoniorü mihtsürü khunung yande amüsüh dangpung ching zhipang, tüsho jipürü buhtsüh achamnak abande Levirü beshang.

⁶ Phungho-thünio namfimihnunu laksahang, nüsa tsangkhitang, tüsho Mosa hode ajihkhi Atungpuh yu yande, nü keoniorü thsung thsüde tsanglungang.”

⁷ Judüki Josianü phungho-thünio ching kingaünpü thsüde mihtsürü alala kilim, namfimihnunu tüsho mihnu bolungnü anunu 30,000, tüsho moshi 3000 jih; harü ha kiulongthsüpuh alakukruk chingnü alakheah.

⁸ Api yo atorübonü mulongsahde mihtsürübo, amükeamrübo, tüsho Levirü kilim arung jih. Hilkia, Zekaria, tüsho Thrünpuh yam atobuh Jehielnü phungho-thünio kingaün thsungkheak amükeamrübo kilim namfimihnunu le mihnu nunu 2600 tüsho moshi 300 jih.

⁹ Levirü limberübo Konania tüsho api keoniorübo Shemaia, Nethanel, Hashabia, Jiel tüsho Jozabad arünü Levirü kilim phungho-thünio kingaün thsungkheak namfimihnunu le mihnu nunu 5000 tüsho moshi 500 jih.

¹⁰ Küyimki münchi thsakhama lakhea, kiulongthsüpuh yukhüm yande amükeamrübonü arü dangpung zhip, tüsho Levirünü arü chamnak ching la.

¹¹ Arünü phungho-thünio namfimihnunubo ju laksahbah Levirünü aküp lü, tüsho amükeamrübonü athiyih rhaka bah.

¹² Arünü taka kingaünbebo shuhmuwuh-a zo, junangde Mosa hüm ching thrütkhi nangde arünü jipürü gukbo mihtsürübo khunung yande arü kilim jihpü lakheah. Tüsho arünü ju ruk moshibo she kheakrak.

¹³ Arünü phungho-thünio namfimihnunu ju thiyuzüng yande mo kheaknü ngu; tüsho arünü amüsüh kingaünkhibo ju phühbo, tüsho keangkih phüh chingnü khiung tüsho nahde mihtsürü alala kilim lubah yü.

¹⁴ Ju dunglim arünü arü le amükeamrübo thsungkheak thsakham, tümütüsho Aron tsühsoniuso amükeamrübo ju taka kingaün tüsho amüdang shihchambo jihpü azhing khiungde mükühbah alakheah; jumonü Levirünü arü le Aron tsühsoniuso amükeamrübo thsungkheak tsanglunga lakheah.

¹⁵ Asaph tsühsoniuso khün thsürübonü, David, Asaph, Heman, tüsho kiulongthsüpuh yo angürü Jeduthun yukhüm yande arü dangpung ching lakheah. Ripit neakrübo ripit abande alakheah; arünü arü rhimo mülakshak, tümüde arü keoniorü Levirünü arü thsungkheak thsakhamjih.

¹⁶ Jumonü kiulongthsüpuh Josia yukhüm yande phungho-thünio mungpü tüsho Atungpuh kingaün sadam kheak taka kingaünkhi jihpü Atungpuh rhimo alala ju nimung thsakham.

¹⁷ Israel mihtsürübo bede alarünü ju kim ching phunghothünio tüsho phaüm muyukkhi thünio nimung thüne mung.

¹⁸ Amükeambuh Samuel nimungbo chingnü ha ruk phungho-thünio Israel ching mümungakheah; Josia, amükeamrü, Levirü, bede alarü Juda tüsho Israel alala tüsho Jirusalem ching larünü amungkhi ruk Israel kiulongthsürü shenü hadürü phungho-thünio mümungakheah.

¹⁹ Josia kiulongthsü kam thürükheak tizheahpü ching ha phungho-thünio mung.

Josia Kiulongthsü Akheam

²⁰ Ju dunglim Josianü arüngyam thsungkheak akhinashu thsüde rhimokhamshu, Ijip kiulongthsüpuh Nekonü keochihpü Karkemish ching Euphra kheak wutu, tüsho Josianü api azhihde wukhiuk.

²¹ Tüshe Nekonü api kilim yunithsürü yüshihde tha, “Juda kiulongthsüpuh, nü kheak inü tümü thsüpü? Khihni nü azhihde I arükhi yung, tüshe thirithsü ching lakhi guk azhihde ah; tüsho niokheampü Thrünpuhnü I ki thiyukhüm jihkheah, I lung lakhi Thrünpuh azhihpü tukloang, jude yungsho apinü nü thsümünimbah.”

²² Tüshe Josianü api kheaknü rholode mutso tüshe api bede keochihpü anihbuh jak müthria lu. Apinü Thrünpuh yukhüm Neko yubo mani, tüshe Megiddo dükhün ching thirithsüpü arü.

²³ Hühzo kiprünü kiulongthsüpuh Josia kip; tüsho kiulongthsüpuhnü api yamlarübo ki tha, “I lubah tsoang, tümüde I khitode yurido.”

²⁴ Jumonü anihbuh yamlarübonü khora-lolungbe chingnü api bekhit tüsho api yo mahnepü khora-lolungbe chingnü hanbah Jirusalem lim arü. Ju ching api sheabah, tüsho anihbuh jipürü kiuyukbo ching api mi bah. Juda tüsho Jirusalem alalanü Josia thsungkheak tüzho.

²⁵ Jeremianü she Josia thsungkheak tüzhokhi thrüt, tüsho khün thsürü athrürü tüsho aliberübonü arü tüzhokhi ching khihni khiungde thsüchoh. Arünü harü Israel ching jipü-yakli khülang kamshih; jurübo atüzhokhi ching thrütyuka lah.

²⁶ Kheakü aningkhi Josia rhimobo Atungpuh yakzan ching thrütkhi yande apinü thülünde arhimokhibo,

²⁷ tüsho api rhimobo, atankih tüsho akheam, Israel tüsho Juda kiulongthsürübo hüm ching thrüta lah.