2 KIUTHSÜYUKHEAN 33 - AMÜSÜH HÜM CL Bible (BSI)

Juda Kiulongthsüpuh Manase

¹ Manase kiulongthsüpü tankihchoki kam 12 azorü lakheah; apinü Jirusalem ching kam thünimkheak phüngü kiulongthsü.

² Apinü Atungpuhnü Israel mihtsürü müngühnü yankhita bahkhi trükshihbo athraneanbe rhimobo yande Atungpuh miki amütsü rhimo.

³ Tümüde apinü abuh Hezekianü thokheamkhi achang dangpungbo thsülo, tüsho Baalbo kilim kingaün sadambo thsü, Ashera sangthsübo thsü, chiningbo kingaün tüsho arübo tankih.

⁴ Apinü Atungpuh yam ching kingaün sadambo thsü, küpü dünkheak Atungpuhnü tha, “Jirusalem ching I mung lünnü alabah.”

⁵ Apinü Atungpuh yam ching khikzakpung mahne ching chiningbo kingaünpü thsungkheaknü kingaün sadambo thsü.

⁶ Apinü müchitde, dünjiyu thade, wurük thsüde tüsho mesherü le kuhi-kheahrü keokhide Hinnom jindükhün ching api tsührü taka kingaünkhi jih. Apinü khide amütsü Atungpuh miki rhimode api bukakhiukshih.

⁷ Apinü athsükhi sangthsü Thrünpuh yam ching zo, küpü dünkheak Thrünpuhnü David tüsho api tsührü Solomon ki tha, “Ha yam ching, tüsho Jirusalem ching, küpü inü Israel trük alala bolungnü amokhitkhea, inü I mung lünnü azobah;

⁸ nüsanü lang inü nüsa kilim thiyukhüm, yakzan, yakzan thsükhi, tüsho thiyuzüngbo Mosa hode ajihkhi kümkangde rhimosho, inü nüsa jipürü thsungkheak jihkhi lo chingnü küyimkishe Israel jing matrütloshih.”

⁹ Manasenü Juda tüsho Jirusalem ching larü bemüchih, jumonü Atungpuhnü Israel mihtsürü müngüh, yankhitkhi trükshihbo kheaknü alü arünü amütsü rhimo.

Manase Mulong Müthrikhi

¹⁰ Atungpuhnü Manase tüsho api mihtsürübo ki asuk, tüshe arünü mani.

¹¹ Jumonü Atungpuhnü arü azhihde Asiria kiulongthsüpuh bonungrü wühkenorübo bedarü; arünü khoyangnü Manase wuh-a lubah müwayinchi wuhrünnü rhük, tüsho api Babilon ching bede yü.

¹² Api lümthsünü ching lachoki apinü anihbuh Thrünpuh, Atungpuh ki tamkhüntamnü tüsho anihbuh jipürü Thrünpuh miki tode azhihayihde kam.

¹³ Apinü api ki tamkhüntamnü, tüsho Thrünpuhnü api tamkhüntamnü leangkhi, apinü mushukhi so, tüsho Jirusalem tüsho anihbuh kiulongthsü kilim api alode yüshih. Judüki Atungpuh ju Thrünpuh ah de Manasenü mükheah.

¹⁴ Ju dunglim apinü jindükhün ching Gihon aniyüzahlim David kiuto thsungkheak Thüngüh Ripit ching ayüzahpung khiungde chipi aleangbe thsü; apinü Ophel mühide rhimo, tüsho khide changde zünkih. Apinü bonungrü wühkenorübo she chipi ayünkhi Juda kiuto alala ching zojih.

¹⁵ Apinü khiungkerü thrünpuhbo tüsho sangthsübo, Atungpuh yam chingnü yihkhita bah, tüsho apinü Atungpuh yam wung kheak le Jirusalem ching kingaün sadambo thsükhi alala lude tso, tüsho apinü jurü kiuto aleanglim jipa bah.

¹⁶ Apinü Atungpuh kingaün sadam she thsülo tüsho ju kheak mungtsü tüsho makshe kingaünbo jih; tüsho apinü Atungpuh Israel Thrünpuh tankihshihpü Juda ki thiyukhüm jih.

¹⁷ Judüalalashe mihtsürübonü achang dangpungbo kheak kingaün jih, tüshe Atungpuh arü Thrünpuh kilim lang alakheah.

Manase Kiulongthsü Akheam

¹⁸ Kheakü aningkhi Manase rhimobo, Thrünpuh kilim api tamkhüntamnü, tüsho Atungpuh Israel Thrünpuh mung ching asukkhi angürü yubo, Israel kiulongthsürü yukheanbo ching thrüta lah.

¹⁹ Api tamkhüntamnü, tüsho künangde Thrünpuhnü api tamkhüntamnü leangkhikhea, api neak alala tüsho api akin mülakhi, api mulong mümüthrichoki achang dangpungbo thsübah Ashera sangthsübo zhipshihkhi lopungbo angürü yukhean ching thrüta lah.

²⁰ Manase nihbuh jipürü lung yap, tüsho arünü api ayam ching kiuyukabah. Api tsührü Amonnü anihbuh müthri.

Juda Kiulongthsüpuh Amon

²¹ Amon kiulongthsüpü tankihchoki kam 22 azorü lakheah; apinü Jirusalem ching kam mahne kiulongthsü.

²² Abuh Manasenü arhimokhi nangde, apinü Atungpuh miki amütsü rhimo. Abuh Manasenü athsükhi sangthsü alala kheak Amonnü kingaün, tüsho jurübo tankih.

²³ Abuh Manasenü azhihayihkhi nangde apinü Atungpuh miki mazhihayih tüshe ha buh Amonnü amülim alü thsüde rhimo.

²⁴ Anihbuh yamlarübonü api azhihde mulomülap tüsho ayam chingnü api laksah.

²⁵ Tüshe kiulongthsüpuh Amon azhihde mulomülaprü lomi mihtsürübonü laksah; tüsho lomi mihtsürübonü api tsührü Josia api müthri kiulongthsürü kamshih.