2 KIUTHSÜYUKHEAN 30 - AMÜSÜH HÜM CL Bible (BSI)

Phungho-thünio

¹ Jirusalem ching Atungpuh yam ching arübah Atungpuh Israel Thrünpuh kilim phunghothünio mungpü thsüde, Hezekianü Israel alala tüsho Juda kilim thiyu yüshih, tüsho Ephraim le Manase kilim kihümbo thrüt.

² Tümüde kiulongthsüpuh le api yo atorübo Jirusalem ching amukhungrü alalanü phungho-thünio ju khinu mahnepü ching mungpü pungkhi.

³ Tümütüsho arünü kim dükdü ching mümungkhuk, tümüde amükeamrübonü arübo suhdahde mütsangkhit, yungsho mihtsürübo Jirusalem ching mümukhung.

⁴ Lümkhi ju kiulongthsüpuh tüsho amukhungrü alala ki alungki nangde alakheah.

⁵ Junangde mihtsürübonü arübah Jirusalem ching Atungpuh Israel Thrünpuh kilim phungho-thünio mungpü Beersheba chingnü Dan khiungde Israel alala ching zhiyukpü arünü yakzan thsü; tümüde thrüta lakhi nangde arünü mihhihde mümukhungde alakheah.

⁶ Jumonü yunithsürübo Israel tüsho Juda alala ching, kiulongthsüpuh tüsho atorübo kilimnü kihümbo lubah, kiulongthsüpuh yukhüm yande yü, “O Israel mihtsürübo, Abraham, Isak, tüsho Israel Thrünpuh, Atungpuh kilim rholoang, junangde nüsa Asiria kiulongthsürübo khah chingnü atsokhit-aningkhi kilim apinü arholobah.

⁷ Nüsa jipürü tüsho nüsa buhtsührünü Atungpuh arü Thrünpuh ki akin mülakhi nangde düla, junangde nüsanü angükhi nangde apinü arü zhikrangkhündo kamshih.

⁸ Nüsa jipürü nangde yihkhro düla, tüsho Atungpuh ki mihyuaniang tüsho apinü lün thsungkheak tsangkhitkhi api amüsüh dangpung ching arang, tüsho Atungpuh nüsa Thrünpuh tankihang, junangde api bukakhiukkhi amüshak nüsa kheaknü rholode atsobah.

⁹ Tümüde nüsanü Atungpuh kilim rholosho, nüsa buhtsührü tüsho nüsa tsührübonü arü ramrü kheaknü mihmuzho ngübah, tüsho ha lomi ching arülobah. Tümüde Atungpuh nüsa Thrünpuh ju mihmuzho tüsho mihmüthsüm, tüsho nüsanü api kilim rholosho api miro nüsa kheaknü rholode mutso.”

¹⁰ Jumonü yunithsürübonü kiuto chingnü kiuto yüde Ephraim tüsho Manase lomi hode tüsho Zebulun khiungde yü; tüshe arünü arü kheak akinashu mülade keangrümünejih.

¹¹ Asher, Manase, tüsho Zebulun chingnü lang arü anükhüh azhihayihde kam tüsho Jirusalem lim arü.

¹² Kheaküshe kiulongthsüpuh tüsho atorübo ki Atungpuh yunü thiyukhüm jihkhi kheak mulong khülangnü arholopü Thrünpuhnü Juda kheak rhimode alakheah.

Phungho-thünio Arüngkhi

¹³ Khinu mahnepü ching phaüm muyukkhi thünio mungpü mihtsürü boto ato Jirusalem ching mukhung.

¹⁴ Arünü wusu tüsho Jirusalem ching lakhi kingaün sadam alala luk, tüsho rhümthüneabe jihpung kingaün sadam alala arünü lude yünü Kidron ayung ching bah.

¹⁵ Arünü phunghothünio namfimihnunu khinu mahne nimung thürükheak phüyi nipü laksah. Amükeamrü tüsho Levirübonü achih, tüsho arünü nihbuh zangrü tsangkhit tüsho taka kingaünkhibo Atungpuh yam ching hande yüzah.

¹⁶ Thrünpuh mihtsürü Mosa yakzan yande arünü nihbuh zhippung müküh-a lu; Levirübo khah chingnü aleangkhikhi thiyih ju amükeamrübonü takabah.

¹⁷ Tümüde nihbuh mütsangkhitrü ahihdo amukhungrü lung lakheah; jumonü Atungpuh kilim amüsüh thsüpü thsüde mümüsührü aban thsungkheak Levirünü phungho-thünio namfimihnunu ju laksah.

¹⁸ Tümüde mihtsürü boto, ahihkhüh Ephraim, Manase, Issakar tüsho Zebulun chingnü arübo mümüsühkhit, tütüshe arünü thrüta lakhi azhihlode phungho-thünio leangkhi. Tüshe Hezekianü arü thsungkheak tamkhüntamnüde tha, “Atsübuh Atungpuh alala neak bahjang:

¹⁹ Arüngyam müsühkhitpü yuzüng yande yungyung she sherünü Atungpuh arü jipürü Thrünpuh kheak arü mulong zocho.”

²⁰ Atungpuhnü Hezekia tamkhüntamnü alo, tüsho mihtsürübo thsüngu.

²¹ Jirusalem ching lakhi Israel mihtsürübo tode asühachihde phaüm muyukkhi yikhap thünio nimung thüne mung; tüsho Levirü le amükeamrübonü Atungpuh yo kingzükingdobe bebah nimung abande Atungpuh mung shi.

²² Hezekianü Atungpuh tankihkhi ju anikhitkhi atsü huhrü Levirü alala ki mulong toshihde asuk. Jumonü mihtsürübonü Atungpuh arü jipürü Thrünpuh kilim mungtsü kingaün tüsho makshe jihde nimung thüne thünio jimpung tsüh.

²³ Judüki amukhungrü alala rukhühnü thünio ju nimung thüne munglopü mulongkhit; jumonü arünü asühachihde kheaküshe nimung thüne mung.

²⁴ Tümüde Juda kiulongthsüpuh Hezekianü amukhungrü kilim moshi 1000 tüsho namfimihnu 7000 kingaünpü thsungkheak jih, tüsho atorübonü amukhungrü kilim moshi 1000 tüsho namfimihnu 10,000 jih. Amükeamrübo arü hihde tsangkhit.

²⁵ Juda amukhungrü alala, amükeamrü tüsho Levirü, tüsho Israel chingnü akhiukkhi amukhungrü alala, Israel lomi chingnü akhiukrü khiungkerü tüsho khiungkerü Juda ching larü asühachih.

²⁶ Jirusalem ching asühachihkhi ato lakheah, tümüde Israel kiulongthsüpuh David tsührü Solomon kim chingnü Jirusalem ching ha ruk mülaakheah.

²⁷ Judüki amükeamrü tüsho Levirünü wusu tüsho mihtsürübo müngühjih, tüsho arü düsheak so; arü tamkhüntamnü ju api amüsüh lapung yinmi ching arü.