2 KIUTHSÜYUKHEAN 3 - AMÜSÜH HÜM CL Bible (BSI)

¹ Solomonnü abuh David ki Atungpuh akhiukpung, Davidnü amung jijihkhi dangpung ching, Jebusrü Arauna hinitpung kheak, Jirusalem ching Moria wung kheak Atungpuh thsungkheak thüyam khülang thsü.

² Apinü anihbuh kiulongthsükhi phüyi kam khinu mahne nimung mahne nipü athsüpü tankih.

³ Harü ha Solomonnü Atungpuh yam thsüpü thsungkheak akearakhibo: ayunglim khahnap 60 tüsho apunglim khahnap 20.

⁴ Mükü ju arüngyam apunglim dükhüh khahnap 20 tüsho achanglim khahnap 20 lakheah. Apinü alunglim suna müthsünnü lüpkih.

⁵ Apinü mükü ju saipress sangnü kümdo, ju suna müthsünnü lüpdo, tüsho ju kheak ashisang tüsho wuhrünbo thsükih.

⁶ Apinü thüyam kheak shotolungbonü züt thsüjih. Suna ju Parvim ching yo ah.

⁷ Jumonü apinü thüyam kheak suna yihkih–abinkiu, ripit-limro, rhü, tüsho khimdopübo; tüsho apinü rhübo kheak cherubim dokih.

⁸ Apinü Khide Amüsüh Dangpung thsü; thüyam atolim yande ayunglim khahnap 20 tüsho apunglim 20; apinü ju kheak suna müthsün khahngak chithürü 20 yihkih.

⁹ Yümruyinchi thsüpü suna dübüt 570 lu. Apinü achangbe khiungshak sunanü lüpdo.

¹⁰ Khide Amüsüh Dangpung ching apinü cherubim 2 thsüa zo tüsho ju kheak suna lüpkih.

¹¹ Cherubim ghidükeangbo müchinarünkhi khahnap 20: khülang ghidükeang khahnap 5nü thüyam rhü qiu, tüsho püpü ghidükeang khahnap 5nü püpü cherub ghidükeang qiu;

¹² junangde mahnepü cherub ghidükeang khahnap 5nü püpü cherub ghidükeang kheak qiu, tüsho püpü ghidükeang khahnap 5nü püpü cherub ghidükeang qiu.

¹³ Harü cherubim ghidükeang müchinarünkhi ju khahnap 20; cherubimbo ju alunglim abinbah arü jingnü zhip.

¹⁴ Tüsho Solomonnü biyi azhindobe, mürümmuchu, neakrümkhi hingliu tüsho atsüdak khimthünak thsü, tüsho ju ching cherubim thsü.

Müwayinchi Dungjing Mahne

¹⁵ Thüyam mikhuh ching apinü dungjing 2 achanglim khahnap 35nü thsü, ane chido akudüdap ashanglim khahnap 5 lakheah.

¹⁶ Apinü phuhpho wuhrünbo thsü tüsho dungjingbo ku kheak yihkih; tüsho apinü tsarümkiu 100 thsü tüsho wuhrünbo kheak yihkih.

¹⁷ Apinü dungjingbo ju arüngyam mikhuh zhipshih, khülang tsülim, püpü huzulim; tsülim zokhi Jakin, tüsho huzulim yo ju Boaz de ji.