2 KIUTHSÜYUKHEAN 29 - AMÜSÜH HÜM CL Bible (BSI)

Juda Kiulongthsüpuh Hezekia

¹ Hezekia kam 25 azorü lachoki kiulongthsüpü tankih; apinü Jirusalem ching kam mukukheak tuku kiulongthsü. Abe mung ju Zekaria tsührübe Abija lakheah.

² Api jipürü Davidnü arhimokhi nangde apinü Atungpuh miki alungki rhimo.

Arüngyam Tsangkhitkhi

³ Anihbuh kiulongthsü atankih kam, akhuhbe khinu ching apinü Atungpuh yam khimdopübo khimshuh tüsho thsülo.

⁴ Apinü amükeamrübo le Levirübo bede yüzah tüsho aniakhiuklim dangpung kheak arübo bemukhung.

⁵ Apinü arü ki tha, “I ki aniang, Levirübo! Nüsabo tsangkhitang, tüsho nüsa jipürü Thrünpuh, Atungpuh yam tsangkhitang, tüsho amünean ju amüsüh dangpung chingnü yihkhitang.

⁶ Tümüde isa jipürübonü thiyuro mülade arüdo tüsho Atungpuh isa Thrünpuh miki amütsü rhimodo; arünü api bahyuk, tüsho arü miro Atungpuh lakhi chingnü anguhde tso, tüsho arü dunglim anguh.

⁷ Arünü mükü khimdopübo she rih, tsünpungbo yihmüt, tüsho Israel Thrünpuh kilim amüsüh dangpung ching rhümthüneabe müjih yungsho taka mükingaün.

⁸ Jumonü Atungpuh bukakhiukkhi Juda tüsho Jirusalem kheak akih, tüsho apinü arü atrebe tüsho athraneanbe kukruk khülang kamshih, nüsa mükbonü ngülah.

⁹ Ha dünkheaknü isa bebuhrübo nukshangnü keamdo tüsho isa tsührübo le tsührübebo tüsho isa niuberübo ramtso ching lah.

¹⁰ Kheakü ha Atungpuh , Israel Thrünpuh kheak tangzüng khülang thsüpü inü mulonglah, junangde api bukakhiukkhi amüshak isa kheaknü rholode atsobah.

¹¹ I tsührübo, dübahkhit, tümüde Atungpuhnü nüsa api miki zhipde api tankihpü, api tankihrü thsüpü tüsho api ki kingaünshihpü mokhitdo.”

¹² Judüki Levirübo asürü, Amasai tsührü Mahath, tüsho Azaria tsührü Joel, Kohathrü tsührübo; tüsho Merari tsührübo, Abdi tsührü Kish, tüsho Jehallelel tsührü Azaria; tüsho Gershonrübo, Zimma tsührü Joa, tüsho Joa tsührü Eden;

¹³ tüsho Elizathan tsührübo, Shimri tüsho Jeuel; tüsho Asaph tsührübo, Zekaria tüsho Mattania;

¹⁴ Heman tsührübo, Jehuel tüsho Shimei; tüsho Jeduthun tsührübo, Shemaia tüsho Uzziel.

¹⁵ Arünü arü keoniorü bemukhungbah arübo tsangkhit, tüsho Atungpuh yubo yande, kiulongthsüpuh yukhüm anide A TUN GPU H yam müsühkhitpü yüzah.

¹⁶ Amükeamrübonü Atungpuh yam alunglim müsühkhitpü yüzah, tüsho arünü Atungpuh arüngyam ching ngükhi amümüsüh kukruk alala Atungpuh yam khikzhakpung ching lude akhiuk; tüsho Levirübonü jurübo lubah Kidron ayung ching yü.

¹⁷ Arünü akhuhbe khinu atan ni tsangkhitpü tankih, tüsho ju khinu nimung tizheah nipü arünü Atungpuh yam mükü ching arü; jushu nimung tizheah arünü Atungpuh yam tsangkhit, tüsho khinu akhuhbe nimung thürükheak thuruk nipü arünü ban.

Arüngyam Müsükhitlokhi

¹⁸ Judüki arünü kiulongthsüpuh Hezekia kilim alunglim yüzah tüsho tha, “Isanü Atungpuh yam alala taka kingaünpung sadam tüsho ju pungphurubo, tüsho yikhap thürüngpung dükhüm tüsho ju pungphurubo müsühkhitdo.

¹⁹ Kiulongthsüpuh Ahaznü kiulongthsüchoki, api thiyuro mülachoki mulunekhi pungphurubo alala isanü tsanglungdo tüsho müsühkhitlodo; kheahang, jurübo Atungpuh kingaün sadam miki lah.”

²⁰ Judüki kiulongthsüpuh Hezekianü mükikde asürübah, kiuto atorübo bemukhung, tüsho Atungpuh yam ching wutu.

²¹ Arünü moshi 7, namfimihnupung 7, namfimihnunu 7, tüsho mihnu pung 7 ju kiulongthsü, arüngakopung tüsho Juda thsungkheak neak kingaünpü hande arü. Apinü jurübo Atungpuh kingaün sadam kheak jihshihpü Aron tsühsoniusobo amükeamrübo ki thiyukhüm jih.

²² Jumonü arünü moshibo laksah, tüsho amükeamrübonü athiyih leangkhibah kingaün sadam kheak rhakkih; jushu namfimihnupungbo laksah tüsho athiyih kingaün sadam kheak rhakkih; kheaküshe arünü namfimihnunubo laksah tüsho athiyih kingaün sadam kheak rhakkih.

²³ Jushu neak kingaünbe mihnu pungbo ju kiulongthsüpuh tüsho amukhungrü ki ludarü; arünü arü khahbo jurü kheak nimkih,

²⁴ tüsho amükeamrübonü jurübo laksah tüsho athiyih bede Israel alala thsungkheak dünthsükhipü kingaün sadam kheak neak kingaün jih. Tümüde taka kingaünkhi le neak kingaünkhi ju Israel alala thsungkheak jihbeah de kiulongthsüpuhnü thiyukhüm jih.

²⁵ Apinü Levirübo larüpbo, bingshangbo, bingkhungbo shuhbah, David tüsho kiulongthsüpuh yo angürü Gad tüsho wukihbuh Nathan yukhüm yande Atungpuh yam ching bemukhung, tümüde thiyukhüm ju api wukihrübo hode Atungpuh kilimnü alakheah.

²⁶ Levirübonü David yo kingzükingdobe shuh, tüsho amükeamrübonü hulipungpungbo shuhbah zhip.

²⁷ Jushu taka kingaünkhi jihpü Hezekianü thiyukhüm jih. Küyimki taka kingaünpü tankihkhea, Atungpuh kilim khün thsüpü she tankih, tüsho Israel kiulongthsüpuh David yo kingzükingdobe bebah hulipungpungbo khung.

²⁸ Amukhungrü athrünkhinü kingaün, khün thsürübonü khün thsü, tüsho hulipungpung mütrünü khung; ha alala taka kingaünkhi mübanyi khiungde mutukzhakde thsü.

²⁹ Küyimki kingaünpü bankhea, kiulongthsüpuh tüsho api lung berü alalanü khukning tüsho kingaün.

³⁰ Kiulongthsüpuh Hezekia tüsho atorübonü, David tüsho angürü Asaph yubo bede Atungpuh kilim mungshi khün thsüshihpü Levirübo kilim thiyukhüm jih. Arünü asühde mungshi khün thsü, tüsho arünü khukning tüsho kingaün.

³¹ Judüki Hezekianü tha, “ Kheakü nüsa Atungpuh kilim müsühkhitdo; phünide arang, kingaünbebo lude arang tüsho Atungpuh yam ki makshe kingaün jihang.” Amukhungrünü kingaünbebo lude arü tüsho makshe kingaünbo jih; tüsho mulongsahde alarü alalanü taka kingaünkhibo lude arü.

³² Amukhungrünü taka kingaünpü handarükhi khekhi ju moshi 70, namfimihnupung 100, tüsho namfimihnunu 200; harü alala Atungpuh kilim taka kingaünpü thsungkheak lakheah.

³³ Amüsühkhitkhi kingaünbo ju moshi 600 tüsho namfimihnu 3000.

³⁴ Tüshe amükeamrübo khide nük tüsho taka kingaünpü alala aküp mülükhamkhukde alakheah, jumonü amükeamrübonü nihbuh zangrü mümüsühkhityi khiungde arü buhtsührü Levirübonü rhimo mübanyi khiungde rung, tümüde nihbuh zangrü müsühkhitpü ching amükeamrü kheaknü Levirübo alü mulong amüsüh lakheah.

³⁵ Taka kingaünkhi ahihdo kheak khiode mungtsü kingaünpü amüdang lakheah, tüsho taka kingaünpü ayungbe kingaünbo lakheah. Hanangde Atungpuh yam tankihpü lalokheah.

³⁶ Tüsho Hezekia le mihtsürü alalanü Thrünpuhnü mihtsürübo thsungkheak rhimokhi dünkheaknü asühachih; tümüde hadürü zukleangnü arü.