2 KIUTHSÜYUKHEAN 25 - AMÜSÜH HÜM CL Bible (BSI)

Juda Kiulongthsüpuh Amazia

¹ Amazia kiulongthsüpü tankihchoki kam 25 azorü lakheah, tüsho apinü Jirusalem ching kam mukukheak tuku kiulongthsü. Abe mung ju Jirusalemrü Jehoaddin lakheah.

² Apinü Atungpuh miki alungki rhimo, tütüshe thiyuro mulongnü yung.

³ Api khah ching kiulongthsü wu-sühmüh düküngde akam akede anihbuh abuh kiulongthsüpuh laksahrü atorübo laksah.

⁴ Tüshe apinü arü tsührübo, Mosa hüm, yakzan ching thrüta lakhi, “Tsührübo dünkheaknü berübuhrü müsheshih, yungsho berübuhrü dünkheaknü tsührübo müsheshih; tüshe alala arü nihbuh neakbo dünkheak sheshihbah,” de Atungpuhnü thiyukhüm jihkhi yande müsheshih.

Edom azhihde Thirithsükhi

⁵ Amazianü Juda mihtsürü jimukhung, tüsho Juda le Benjamin alala arü jipürü gukbo ayannü arü kurungkheak chithürübo tüsho chibo wühkenorübo zojih. Apinü kam 20nü akumung azorü bemukhung, tüsho thirithsüpü thülünde amokhitkhi, thsüh tüsho tsung zhimkhukrü arü 300,000 yimkhit.

⁶ Apinü Israel chingnü she müzhakde athrungrü 100,000 shotoyinchi khahngak 3400 jihbah mulo.

⁷ Tüshe Thrünpuh mihtsürü khülang api ki arü tüsho tha, “O kiulongthsüpuh, Israel bonungrü nü lung düyüshih, tümüde Israel lung Atungpuh müla–harü Ephraimrü alala.

⁸ Nüsanü yübah keochihpung ching mulong tode keochihchih she, Thrünpuhnü nüsa thiriri müngüh jipyuka bahbah, tümüde Thrünpuh kheak arungpü wu yungsho jipa bahpü lah.”

⁹ Amazianü Thrünpuh mihtsürü ki tha, “Tüshe inü Israel bonungrü kilim jihkhi shotoyinchi khahngak 3400 dünkheak isanü küde athsüpü?” Thrünpuh mihtsürünü alo, “Atungpuhnü ha kheaknü alü nü kilim jihkhuklah.”

¹⁰ Judüki Ephraim chingnü api kilim arükhi bonungrübo Amazianü thüyam lim alode yüshih. Tüshe arünü Judarü kheak khide bukakhiukde thüyam lim alode yü.

¹¹ Amazianü mulong toa lu, tüsho anihbuh mihtsürübo bede yü; apinü Thimi Jindükhün ching yü, tüsho Seir mihtsürü 10,000 laksah.

¹² Judarü bonungrünü püpü 10,000 arhangnü rambah Sela mujuk kheak bede yü, tüsho arübo Sela mujuk kheaknü jipkhia bah, junangde arü alala adütre kamabah.

¹³ Tüshe Amazianü keochihpung ching müyüshihde athiyilokhi bonungrübonü Samaria chingnü Beth-horon khiungde Juda kiutobo yan; arünü jurü ching mihtsürü 3000 laksah, tüsho ayankhikhi kukruk ahihdo lu.

¹⁴ Küyimki Amazianü Edomrü laksahkhi chingnü arükhea, apinü Seir mihtsürü thrünpuhbo lulobah arü. Apinü jurü anihbuh thrünpuhbo thsüde zhipshihbah arü ki mükhüm tüsho arü ki kingaünkhibo tak.

¹⁵ Atungpuhnü Amazia kheak bukakhiuk tüsho api kilim wukihrü khülang yüshihbah api ki tha, “Tümüde nünü nü khah chingnü arü mihtsürübo mübekhitkhukkhi mihtsürü thrünpuhbo yimkhea?”

¹⁶ Tüshe api thade alachoki kiulongthsüpuhnü anihbuh ki tha, “Isanü nü kiulongthsü athsunganahrü thsüshihkhea de? Tukloang! Tümü thsüpü nü asheshihpü?” Jumonü wukihbuhnü tuklo, tüshe tha, “Thrünpuhnü nü thsümünimpü lümkihdo de inü mükheahlah, tümütüsho nünü ha rhimodo tüsho inü athsunganahkhi mani.”

Israel azhihde Thirithsükhi

¹⁷ Judüki Juda kiulongthsüpuh Amazianü keokhikeora tüsho Israelrü Jehu tsührü Jehoahaz tsührü kiulongthsüpuh Joash kilim thiyusheak yüshih, “Arang, thirithsü ching isa mironü miro shoruachihanü.”

¹⁸ Israel kiulongthsüpuh Amazia kilim thiyusheak yüshih, “Lebanon ching ayang rim khülangnü Lebanon ching cedar sang kilim thiyusheak yüshih de tha, ‘Nü tsührübe ju I tsührü niube thsüpü jihang;’ tüshe Lebanon mütüm shiwühnü ayang rim ju tsahhode juthünakabah.

¹⁹ Nünü thachoh, ‘ Kheahang, inü Edom kukdo,’ tüsho nünü kükheangdo. Kheakü thüyam ching binang; nü tüsho nü lung Juda keampü thsüde tümü thsüpü nünü küpkhukpü asahcho?”

²⁰ Tüshe Amazianü mani, tümüde ha arübo jihabahpü Thrünpuh rhimo lakheah, tümütüsho arünü Edom thrünpuhbo yim.

²¹ Jumonü Israel kiulongthsüpuh Jehoashnü wutu; api tüsho Juda kiulongthsüpuh Amazia ane Judarü yo Beth-shemesh ching keochihpung khülangnü khülang kheahachih.

²² Juda ju Israelnü kuk; mihbüm abannü thüyam lim alihde tso.

²³ Israel kiulongthsüpuh Jehoashnü Ahazia tsührü, Joash tsührü Juda kiulongthsüpuh Amazia Beth-shemesh chingnü tholo; apinü anihbuh Jirusalem lim bede arü, tüsho Jirusalem chipi ju Ephraim Ripit kheaknü Amühit Ripit khiungde, adükeak khahnap 400 zahde kingkheam.

²⁴ Apinü Thrünpuh yam ching Obed-edomnü kümde alakhi suna le shotoyinchi alala, tüsho phühlungbo alala lu; apinü kiulongthsüpuh yam ching rahpung tüsho aheangrübo she lu; jushu apinü Samaria lim alodarü.

²⁵ Israelrü Jehoahaz tsührü kiulongthsüpuh Jehoash she dunglim Judarü Joash tsührü kiulongthsüpuh Amazia kam 15 lakheah.

²⁶ Kheakü aningkhi Amazia rhimobo, atankihnü akheam khiungde Juda tüsho Israel kiulongthsürübo hüm ching thrüta müla de?

²⁷ Amazianü Atungpuh kheaknü rholode atsokhi nimungnü arünü Jirusalem ching api azhihde mülapmüjide rhimo, tüsho api Lakish ching tsoabah. Tüshe arünü api dunglim mihtsürübo yüshih, tüsho ju ching api laksah.

²⁸ Arünü api khorabo kheaknü belode arü; api nihbuh jipürü lung David kiuto ching kiuyukabah.