2 KIUTHSÜYUKHEAN 23 - AMÜSÜH HÜM CL Bible (BSI)

Athalia Azhihkhi

¹ Tüshe kam thünepü ching Jehoiadanü mulong ato thsü, tüsho bonungrü atorü 5 shoruachihpü thsakham: Jeroham tsührü Azaria, Jehohanan tsührü Ishmael, Obed tsührü Azaria, Adaia tsührü Maaseia, tüsho Zikri tsührü Elishaphat.

² Arünü Juda mükamde yübah Juda kiutobo alala chingnü Levirübo tüsho Israel gukbo ching akubo bemukhung, tüsho arünü Jirusalem lim arü.

³ Judüki amukhungrü alalanü Atungpuh yam ching kiulongthsüpuh ki tangzüng khülang thsü. Jehoiadanü arü ki tha, “ Kiulongthsüpuh tsührü ha kheak lah! David tsührübo dünkheak Atungpuhnü alokhikhi nangde apinü kiulongthsüshang.

⁴ Nüsanü arhimopü ju ha: amunimung rhimo ching arürü, amükeamrü tüsho Levirübo, nüsa shihcham mahsam ching khülang ripit neakrü thsübah,

⁵ shihcham khülang kiulongthsüpuh yam ching labah, tüsho shihcham khülang Khimtan Ripit ki labah; tüsho mihtsürü alala Atungpuh yam khikzhakpung ching labah.

⁶ Amükeamrü tüsho tankihrü Levirübo kheak hode sheshe Atungpuh yam ching düyüzahshih; arübo a ayüzahpü kuklah, tümüde arübo amüsüh ah, tüshe püpürü mihtsürü alalanü Atungpuhnü thiyikhi anibah.

⁷ Levirübo nihbuh khah ching thsühnuk shuhbah kiulongthsüpuh mükamdobah; tüsho shepü thüyam ching yüzahbanü alaksahbah. Api arüchoki tüsho ayüchoki kiulongthsüpuh lung laang.”

⁸ Amükeambuh Jehoiadanü thiyukhüm jihkhi alala yande Levirü tüsho Juda alalanü rhimo; mihbüm abannü nihbuh mihtsürü amunimung rhimo ching arüpü, tüsho amunimung rhimo chingnü wukhiukpü bede la, tümüde amükeambuh Jehoiadanü achamnakbo mümüzütshih.

⁹ Amükeambuh Jehoiadanü David kiulongthsüpuh yo thsühbo tüsho atoto le anini tsungbo Thrünpuh yam ching lakhi wühkenorübo kilim jih;

¹⁰ tüsho apinü mihtsürü alala kiulongthsüpuh thsungkheak aheangrü thsüpü mihbüm aban khah ching thsühnuk shuhbah, thüyam abolimnü akulim khiungde, kingaün sadam tüsho thüyam mükamde zhipshih.

¹¹ Jushu apinü kiulongthsüpuh tsührü bede akhiukbah api kheak kuthran thranjih, tüsho api kilim tangzüngkhi jih; arünü api kiulongthsüpuh de zhiyukjih, tüsho Jehoiada le api tsührübonü api mujude-mokhit tüsho arünü zhi, “ Kiulongthsüpuh kutsüpde laang!”

¹² Küyimki Athalianü mihtsürübo nanachihde tüsho kiulongthsüpuh shikhi düsheak sokhea, alibenü mihtsürübo kilim Atungpuh yam ching yüzah;

¹³ tüsho küyimki alibenü akheahkhea, kiulongthsüpuh ju ayüzahpung anihbuh dungjing ki zhip, tüsho wühkenorübo le hulipungpung khungrü kiulongthsüpuh rheang ki zhip, tüsho lomi mihtsürü alalanü asühachih tüsho hulipungpungbo müt, tüsho khün thsürübonü arü khün-khungbebo shuhbah münchi bede ngü. Athalianü anihbe khimmih thorüp, tüsho zhi, “Mülapmüjido! Mülapmüjido!”

¹⁴ Judüki amükeambuh Jehoiadanü bonungrü chibo kurung wühkenorübo bede akhiukbah arü ki tha, “Alibe ju aheangrübo dükeak bekhitang; shepünü alibe dunglim yanbanü nukshangnü asheshihbah.” Tümüde amükeambuhnü tha, “Alibe Atungpuh yam chingnü düsheshih.”

¹⁵ Jumonü arünü alibe ram; alibe ju kiulongthsüpuh yam Khora Ripit limro ching yü, tüsho arünü ju ching anihbe laksah.

Jehoiadanü Müthrilokhi

¹⁶ Jehoiadanü api le mihtsürü alala tüsho kiulongthsüpuh dükeak arübo Atungpuh mihtsürü thsüpü tangzüng khülang thsü.

¹⁷ Jushu mihtsürü alala Baal arüngyam ching yü, tüsho ju thokheam; api kingaün sadambo le api sangthsübo arünü adütre kamde yihthünak, tüsho arünü Baal yo amükeambuh Mattan, kingaün sadambo mikinü laksah.

¹⁸ Jehoiadanü Atungpuh yam kümshihpü Levirü amükeamrübo ki thiyi. Arübo Mosa yakzan ching thrüta lakhi nangde Atungpuh yam neakpü, David yukhüm yande asühachihde tüsho khün thsüde Atungpuh kilim taka kingaünkhi jihpü Davidnü thiyia lakheah.

¹⁹ Mümüsühde alarü shenü müyüzahshihpü thsüde apinü ripit neakrü Atungpuh yam ripitbo ki binshih.

²⁰ Tüsho apinü chibo kurung wühkenorü, amükeamrü, mihtsürü yakzanshuhrübo, tüsho lomi mihtsürü alala bea lu, tüsho arünü Atungpuh yam chingnü kiulongthsüpuh bede yükibah akube ripit tsahhode kiulongthsüpuh yam lim yü. Arünü kiulongthsüpuh ju kiulongthsü-binkiu kheak binshih.

²¹ Junangde lomi mihtsürü alala asühachih, tüsho nukshangnü Athalia laksahshu a kiuto zhikrangkhündo kam.