2 KIUTHSÜYUKHEAN 22 - AMÜSÜH HÜM CL Bible (BSI)

Juda Kiulongthsüpuh Ahazia

¹ Jirusalem ching larübonü api tsührü akheambuh Ahazianü api müthri kiulongthsürü thsüshih; tümüde bonungrübo Arabrü kheak binpung ching arürünü tsührü azorübo alala laksah. Jumonü Jehoram tsührü Ahazianü kiulongthsüpü tankih.

² Ahazia kiulongthsüpü tankihchoki kam 22 azorü lakheah; apinü Jirusalem ching kam khülang kiulongthsü. Abe mung ju Omri tsührü-tsührü Athalia lakheah.

³ Apinü she Ahab yamkhün limrobo ching tsah, tümüde abe ju amülim rhimopü ching api tuthsukrü lakheah.

⁴ Apinü Ahab yamkhünnü arhimokhi nangde Atungpuh miki amütsü rhimo; tümüde abuh she dunglim arübo ju api thsümünimpü, api tuthsukrü lakheah.

⁵ Apinü arü athsunganahkhi she yan, tüsho Siria kiulongthsüpuh Hazael bede thirithsüpü Israel kiulongthsüpuh Ahab lung Ramoth-gilead ching yü. Siriarünü Joram yurijih,

⁶ tüsho apinü Siria kiulongthsüpuh Hazael kheak keochihchoki Rama ching yurikhi mübo thsüngupü Jezreel ching alode arü. Tüsho Juda kiulongthsüpuh Jehoram tsührü Ahazianü Ahab tsührü Joram shorupü Jezreel ching yüki, tümütüsho api yuria lakheah.

⁷ Tüshe Joram rhua kheahpü yüchoki Ahazia keampü ju Thrünpuh lümkhi lakheah. Küyimki Ahazia ju ching arükhea, apinü Nimshi tsührü Ahab yamkhün thsümünimpü Atungpuhnü mujude-mokhitkhi Jehu shorupü Jehoram lung wukhiuk.

⁸ Küyimki Jehunü Ahab yamkhün kheak mahkhapde alakhea, Juda atorübo tüsho Ahazia keoniorü tsührübo Ahazia ki arürü apinü shoru, tüsho apinü arübo laksah.

⁹ Apinü Ahazia yim; Samaria ching jikde alachoki arünü api ram tüsho Jehu kilim bede arü, tüsho laksah. Arünü api kiuyukabah, tümüde arünü tha, “Api Jehoshaphat tsührü-tsührü ah, apinü api mulong athrünkhinü Atungpuh yim.” Tüsho Ahazia yamkhün ching kiulongthsü yakzan shuhkhukpü thsüde she mülade alakheah.

Juda Kiulongthsübe Athalia

¹⁰ Kheakü küyimki Ahazia abe Athalianü anihbe tsührü shekhi ngükhea, alibenü Juda kiulongthsürü yamkhün alala dükheakshihpü thsakham.

¹¹ Tüshe kiulongthsüpuh tsührübe Jehoshebanü alaksahpü lakhi kiulongthsüpuh tsührübo lungnü Ahazia tsührü Joash jikde bebah tso; alibenü api le api mütrürü ju yappung khiungshak ching lashih. Hanangde Jehoram kiulongthsüpuh tsührübe tüsho amükeambuh Jehoiada niube Jehoshebanü–tümütüsho alibe ju Ahazia achi lakheah– Athalia kheaknü ramkhi, junangde alibenü api mülaksah;

¹² Athalianü lomi ching kiulongthsüchoki arü lung api kam thuruk, Thrünpuh yam ching jika lakheah.