2 KIUTHSÜYUKHEAN 21 - AMÜSÜH HÜM CL Bible (BSI)

¹ Jehoshaphat nihbuh jipürü lung yap tüsho api jipürü lung David kiuto ching kiuyukabah; atsührü Jehoramnü api müthri.

Juda Kiulongthsüpuh Jehoram

² Juda kiulongthsüpuh Jehoshaphat tsührü Jehoram keoniorübo: Azaria, Jehiel, Zekaria, Azariahu, Maikel, tüsho Shephatia.

³ Arü abuhnü arü kilim thsambah ahihdo, shotoyinchi, suna, tüsho amo achak kukrukbo, Juda ching chipi ayünkhi kiutobo bede jih; tüshe apinü kiulongthsü ju Jehoram kilim jih, tümütüsho api adüjibuh lakheah.

⁴ Küyimki Jehoramnü abuh kiulongthsü-binkiu kheak yükihkhea tüsho düküngde akamkhea, apinü akeoniorü alala tüsho Israel torübo khürü laksah.

⁵ Api kiulongthsüpü tankihchoki Jehoram kam 32 azorü lakheah; apinü Jirusalem ching kam tizheah kiulongthsü.

⁶ Ahab yamkhünnü arhimokhi nangde, apinü Israel kiulongthsürübo limro ching tsah; tümüde Ahab tsührübe ju api niube lakheah. Apinü Atungpuh miki amütsü rhimo.

⁷ Tümütüsho apinü David kheak tangzüngkhinü Atungpuhnü David yamkhün müdükheakshih, tümütüsho apinü api le api tsühsoniusobo kilim lünnü tsünpung khülang jihpü alokhi.

⁸ Api nimungbo ching Edomnü Juda yakzan shuhkhi kheak azhih tüsho arü thsungkheak kiulongthsürü khülang mokhit.

⁹ Judüki Jehoramnü anihbuh yo limthorübo tüsho khora-lolungbe alala bebah hode yü. Apinü azhing ching tsahmusu tüsho api le api khora-lolungbe limthorübo zündorü Edomrü yan.

¹⁰ Jumonü khihni khiungde Edomnü Juda yakzan shuhkhi kheak azhihde arü. Ju kim ching Libnanü she api yakzan shuhkhi kheak azhih, tümütüsho Jehoramnü jipürü Thrünpuh, Atungpuh bahyuk.

¹¹ Kheaküshe apinü Juda awung lomi ching achang dangpungbo thsü, tüsho Jirusalem ching larü müthülünde kamshih, tüsho Juda ju bahkhide tsoshih.

¹² Wukihbuh Elija kilimnü kihüm khülang api kilim arüshihde tha: “Atungpuh , nü buh David Thrünpuhnü ha thachoh: Tümütüsho nünü nü buh Jehoshaphat yungsho Juda kiulongthsüpuh Asa limrobo ching mütsah,

¹³ tüshe Israel kiulongthsürübo limro ching tsah, tüsho Ahab yamkhünnü Israel müthülünde kamshihkhi nangde Juda tüsho Jirusalem ching larü müthülünde kamshih, tüsho nünü nü keoniorübo, nü buh yamkhün ching akheyukkhibo, nü kheaknü atsübe lakhibo laksah,

¹⁴ kheahang, Atungpuhnü nü mihtsürübo, nü tsührübo, nü niubebo, tüsho nü kukrukbo alala kheak arüm ato khülang hande arübah,

¹⁵ tüsho tukthsükhi hode nü rhukheam makhiukyi khiungde nimung adukde nü bukning ching tukthsü amülangbe labah.”

¹⁶ Atungpuhnü Jehoram azhihde Sudanrü phünide alarü Filistiarü tüsho Arabrü bukakhiukshih.

¹⁷ Arünü Juda azhihde atubah yüzah, tüsho arünü angükhi kiulongthsüpuh yam ching kukrukbo, api tsührübo tüsho api niubebo lubah tso, junangde api tsührü akheambuh Ahazia kheak hode tsührü maningshih.

¹⁸ Ha alala dunglim Atungpuhnü amüthsükhukbe tukthsünü api rhukheam kheak rheakshih.

¹⁹ Ju kim ching, kam mahnepü akheam ching, tukthsükhi hode api rhukheam akhiuk, tüsho thsünü ato ching api sheabah. Api jipürü thsungkheak mo thsükhi nangde, api mihtsürübonü api akin jihde mo müthsü.

²⁰ Api kiulongthsü tankihchoki kam 32 azorü lakheah; apinü Jirusalem ching kam tizheah kiulongthsü. Shenü mülümrhihde api chamachih. Arünü api David kiuto ching kiuyukabah, tüshe kiulongthsürübo kiuyukbo ching yung.