2 KIUTHSÜYUKHEAN 2 - AMÜSÜH HÜM CL Bible (BSI)

Arüngyam Thsüpü Tsanglungkhi

¹ Solomonnü Atungpuh mung thsungkheak arüngyam khülang thsüpü tüsho anihbuh thsungkheak kiulongthsürü-yam khülang thsüpü pungkhi.

² Solomon kukruk hanakhinrü 70,000 tüsho awung lomi ching lungkheanrü 80,000, ju lung arü kheahshihpü 3600 thrütde mokhit.

³ Solomonnü Tair kiulongthsüpuh Hiram kilim thiyu yüshih: “ Khülang ki nünü I buh David kheak tsüde lado tüsho api lapü thüyam thsüshihpü cedar sang mühahdo, junangde I ki rhimoang.

⁴ Inü kheakü Atungpuh I Thrünpuh mung thsungkheak thüyam khülang thsüpü lah tüsho api miki rhümthüneabe jihpü, kim aban ahuhbe yikhap zojihpü, tüsho khinu aso amunimungbo le Israel thsungkheak amüsüh-tsangkhit akhukhitkhi Atungpuh isa Thrünpuh thüniobo ching yapsu tüsho are taka kingaünbo thsungkheak api ki müsühkhitbah.

⁵ Inü athsüpü lakhi thüyam ju ato labah, tümüde isa Thrünpuh a püpürü thrünpuhbo kheaknü atobe ah.

⁶ Tüshe shepünü api kilim thüyam khülang thsükhukba, tümüde yinmi, achangbe yinminü she api mülüngüm? Api miki kingaünpü dangpung kheak hode, api arüngyam khülang thsüpü I she a?

⁷ Jumonü kheakü suna, shotoyinchi, müwayinchi, yinchi, mürümmuchu, neakrümkhi, biyi hingliu tüsho dozüdodo mükheahkhi ching rhimopü kizükidorü, I buh Davidnü I lung Juda tüsho Jirusalem ching ayeanzo rhimorü zojihkhi lung beshihpü I kilim arüshang.

⁸ Kheaküshe I kilim cedar sang, saipress sang tüsho algum sangthulungbo Lebanon chingnü arüshang, tümüde nü yamlarübo Lebanon sangrhütpü ching ayeanzo ah de inü mükheahlah. I yamlarübonü nü yamlarübo lung rhimobah,

⁹ I thsungkheak sang arhütbe suhdahde tsanglungpü lah, tümütüsho inü athsüpü lakhi yam ju ato tüsho amüyinsahbe labah.

¹⁰ Inü nü yamlarübo sang rhütrü kilim wheat hi khahngak chithürü 2000, barli khahngak chithürü 2000, yukhu pungdüchi 400,000, tüsho oliv müdangke pungdüchi 400,000 mühahbah.”

¹¹ Judüki Tair kiulongthsüpuh Hiramnü kihüm chingnü Solomon kilim alode mühah, “Tümütüsho Atungpuhnü api mihtsürü muzhokhinü apinü nü arü kurungkheak kiulongthsürü kamshih.”

¹² Hiramnü kheaküshe tha, “Atungpuh Israel Thrünpuh shiang, shepünü thüning tüsho alomi thrün, shepünü kiulongthsüpuh David kilim lümlung mütsankhitpü tüsho anikhitpü, Atungpuh thsungkheak arüngyam khülang tüsho anihbuh thsungkheak kiulongthsürü-yam thsüpü lakhi tsührü jih.

¹³ “Inü kizükido ayeanzo, anikhitkhi lakhi Huram thiyido,

¹⁴ Dan liberü lung khülang tsührü, abuh a Tairrü ah. Api suna, shotoyinchi, müwayinchi, yinchi, lung tüsho sang, mürümmuchu, biyi, neakrümkhi hingliu tüsho khimthünak rhimopü, tüsho I tungpuh nü buh David yo kizükidorü lung shihshihthürü dozüdodopü api ki thiyikhi rhimokhukbah.

¹⁵ Kheakü, wheat hi, barli, oliv müdangke tüsho yukhu thsungkheak a, küpü I tungpuhnü thadünü, anihbuh yamlarübo kilim mühahang.

¹⁶ Lebanon ching nünü tümüpürü yihnüpü lanü isanü akiushakbah, tüsho thsünrubah nü kilim keto chingnü Joppa ching lude arübah; nünü ju Jirusalem ching lude awutubah.”

Arüngyam Thsüpü Tankihkhi

¹⁷ Judüki Solomonnü abuh Davidnü alukhi wühkhe dunglim, Israel lo ching lakhi khiungkerü alala wühkhe lu; tüsho ju ching 153,600 lakheah.

¹⁸ Arü 70,000 rhimopü, 80,000 awung lomi ching lung kheanpü, tüsho 3600nü mihtsürü rhimokhi kheahpü thiyi.