2 KIUTHSÜYUKHEAN 17 - AMÜSÜH HÜM CL Bible (BSI)

Jehoshaphat Kiulongthsürü Kamkhi

¹ Api tsührü Jehoshaphatnü api müthri, tüsho Israel azhihde anihbuh reangzahde kam.

² Apinü Juda chipi ayünkhi kiutobo bonungrübo zojih, tüsho Juda lomi, tüsho abuh Asanü ayankhikhi Ephraim kiutobo ching aheangrü bonungrübo zojih.

³ Jehoshaphat lung Atungpuh lakheah, tümütüsho apinü adüso abuh limrobo ching tsah; apinü Baalbo müyim,

⁴ tüshe apinü anihbuh abuh Thrünpuh yim tüsho Israel limro müyande api yukhümbo yande tsah.

⁵ Jumonü Atungpuhnü api khah ching kiulongthsü düküngde kamshih. Juda alalanü Jehoshaphat kilim thsambah hande arü, tüsho api lakhit ato tüsho akinashu lakheah.

⁶ Api mulong ju Atungpuh limrobo ching düküngde alakheah; kheaküshe apinü achang dangpungbo tüsho Ashera thrünbebo Juda chingnü yihkhita bah.

⁷ Api kiulongthsü kam asampü ching Juda kiutobo ching thsangyushihpü api torübo, Ben-hail, Obadia, Zekaria, Nethanel, tüsho Mikaia yüshih.

⁸ Arü lung Levirü Shemaia, Nethania, Zebadia, Asahel, Shemiramoth, Jehonathan, Adonija, Tobija tüsho Tobadonija lakheah; tüsho harü Levirü lung, amükeamrübo Elishama tüsho Jehoram.

⁹ Arünü arü lung Atungpuh yakzan hüm shuhbah Juda kiutobo alala ching yü tüsho mihtsürübo ki thsangyu.

Jehoshaphat Tokhi

¹⁰ Atungpuh trekhi Juda mühi lomi kiulongthsü alala kheak yükih, tüsho arünü Jehoshaphat azhihde thiri müthsü.

¹¹ Filistiarü khürünü Jehoshaphat kilim thsambahbo tüsho ruk thsungkheak shotoyinchi hande arü; tüsho Arabrünü she namfimihnu pung 7700 tüsho mihnupung 7700 api kilim handarü.

¹² Jehoshaphat düshihde tode zokih. Apinü Juda ching chipi ayünkhi tüsho kukruk zopung kiutobo thsü.

¹³ Juda kiutobo ching api lakhit-kukruk hihde alakheah; tüsho Jirusalem ching api bonungrübo, athrungrü thirithsürübo lakheah.

¹⁴ Ha arü jipürü yamkhün yande wühkhekhi: Juda chingnü, chithürübo kurungkheak limthorübo: limthobuh Adna lung athrungrü thirithsürü 300,000,

¹⁵ tüsho api khin limthobuh Jehohanan lung 280,000,

¹⁶ tüsho api khin Zikri tsührü Amasia, Atungpuh tankihpü thsungkheak shuhmülanga jihrü khülang lung athrungrü thirithsürü 200,000.

¹⁷ Benjamin chingnü: Eliada, athrungrü thirithsürü lung sanglüh tüsho tsung shuhkhi 200,000,

¹⁸ tüsho api khin Jehozabad lung thirithsüpü thsungkheak thsühnuk shuhkhi 180,000.

¹⁹ Harü ha kiulongthsüpuhnü chipi ayünkhi Juda kiutobo alala ching binshihkhi lung khiode kiulongthsüpuh tankihpü ching lakheah.