2 KIUTHSÜYUKHEAN 16 - AMÜSÜH HÜM CL Bible (BSI)

Israel kheak Küpkhukbo

¹ Asa kiulongthsü samrükheak thurukpü kam ching, Israel kiulongthsüpuh Baashanü Juda azhihde wutu, tüsho Juda kiulongthsüpuh Asa lomi ching khürü awukhiukpü yungsho azahpü chingnü azhipdopü Rama thsü.

² Judüki Asanü Atungpuh yam tüsho kiulongthsüpuh yam rahpungbo chingnü shotoyinchi tüsho sunabo lu, tüsho Damaska ching lakhi Siria kiulongthsüpuh Ben-hadad kilim yüshihde tha,

³ “I buh le nü buh ane dükeak nangde ike dükeak arihako khülang laanü; inü nü kilim shotoyinchi tüsho suna mühahchoh; yüang, Israel kiulongthsüpuh Baasha kheak nünü arihakokhi thsümünimang, junangde api I kheaknü akhinbah.”

⁴ Ben-hadadnü kiulongthsüpuh Asa ki ani, tüsho api bonungrü wühkenorübo Israel kiutobo azhihde yüshih. Arünü Ijon, Dan, Abel-maim, tüsho Naphtali kukruk zopung kiutobo alala kuk.

⁵ Küyimki Baashanü ha sokhea, apinü Rama thsükhi tuklo, tüsho api rhimo zhimzhakshih.

⁶ Judüki kiulongthsüpuh Asanü Judarü alala bede arü, tüsho Baashanü thsüde alakhi Rama ching lungbo tüsho sangrhütkhibo lude tso, tüsho jurünü apinü Geba tüsho Mizpa thsü.

Wukihbuh Hanani

⁷ Ju kim ching wukihbuh Hananinü Juda kiulongthsüpuh Asa kilim arü, tüsho api ki tha, “Tümütüsho nünü Siria kiulongthsüpuh kheak düthsün angü, tüsho Atungpuh nü Thrünpuh kheak düthsün mangü, Siria kiulongthsüpuh yo bonungrü nü kheaknü tsokhido.

⁸ Sudan tüsho Libyarü bonungrü hihkhi lung khora-lolungbe tüsho khoraberü khide hihde alakhi yung de? Judüalalashe nünü Atungpuh kheak düthsün angümonü, apinü arübo nü khah ching jih.

⁹ Tümüde api kheak thiyuro mulong larü düküngshihpü Atungpuh müknü lomi athrünkhi ngürilah. Nünü ha ching bünde rhimodo; tümüde kheakünü rünbah nü rithsübo labah.”

¹⁰ Judüki Asanü wukihbuh kheak bukakhiuk, tüsho api rihyam ching yuka zo, tümüde ha dünkheaknü api kheak abukakhiuk. Tüsho judüchoki Asanü mihtsürü khürü kheak bukakhiukde rhimo.

Asa Kiulongthsü Akheam

¹¹ Asa rhimobo, atankihnü akheam khiungde Juda tüsho Israel kiulongthsürübo hüm ching thrüta lah.

¹² Api kiulongthsü kam samrükheak tukupü ching Asa jing kheak tukthsü akhiuk, tüsho api tukthsü khitode kam; tütüshe api tukthsü ching she apinü Atungpuh müyim, tüshe thümürübo kheaknü arung yim.

¹³ Judüki Asa nihbuh jipürü lung yap, api kiulongthsükhi kam yirükheak khülang ching sheabah.

¹⁴ Arünü api David kiuto ching anihbuh zangrü api thsungkheak kiukhi kiuyuk ching bah. Arünü api rhümthüneabe rhimosorünü athsakhamkhi rhümthüneabe aphuaphu zokhi dükhüm khülang kheak yapshih; tüsho arünü api ki akin jihde morimoto khülang thsü.