2 KIUTHSÜYUKHEAN 13 - AMÜSÜH HÜM CL Bible (BSI)

Abijanü Jeroboam kheak Thirithsükhi

¹ Kiulongthsüpuh Jeroboam kam thürükheak tizheahpü ching, Abijanü Juda kurungkheak kiulongthsüpü tankih.

² Apinü Jirusalem ching kam mahsam kiulongthsü. Abe mung ju Gibearü Uriel tsührübe Mikaia lakheah. Kheakü Abija tüsho Jeroboam dükeak thirithsü lakheah.

³ Bonungrü athrungrü amokhitkhi 400,000 bebah Abijanü thirithsü; tüsho Jeroboamnü amokhitkhi amüzhak thirithsürü 800,000 bebah api azhihde keochihpü thsakham.

⁴ Judüki Abijanü Ephraim awung lomi ching lakhi Zemaraim wung düpheak kheak zhip, tüsho tha, “I ki aniang, Jeroboam tüsho Israel alala!

⁵ Atungpuh Israel Thrünpuhnü David tüsho api tsührübo kilim lünnü Israel kurungkheak kiulongthsüshihpü müthsümünimbe tangzüng khülang hode ajihkhi nüsanü mümükheah de?

⁶ Tütüshe Nebat tsührü Jeroboam, David tsührü Solomon yamlarünü asürü tüsho api tungpuh azhih;

⁷ tüsho amüthülünkhi amütsü mihtsürübo khürü api mükamde mukhung tüsho Solomon tsührü Rehoboam müneah, Rehoboam ju athunu tüsho müdüngying tüsho arü muthsolokhukde alakheah.

⁸ “Tüsho kheakü David tsührübo khah ching Atungpuh kiulongthsü azhihkhukbah de nüsanü lümlah, tümütüsho nüsa mih hihlah tüsho Jeroboamnü nüsa thsungkheak suna moshi nunu thsükhi thrünpuhbo nüsa lung lah.

⁹ Nüsanü Aron tsühsoniusobo Atungpuh yo amükeamrübo tüsho Levirü yankhit tüsho püpü lomi mihtsürübo nangde nüsa thsungkheak amükeamrübo kamshihkhi yung de? Sherünü moshipung nunu 1 yungsho namfimihnupung 7 lubah amüsühkhitpü thsungkheak arükheanü thrünpuhbo yungkhi amükeamrü khülang kam.

¹⁰ Tüshe isa thsungkheak a, Atungpuh ju isa Thrünpuh, tüsho isanü api mübahyuk. Isa a Atungpuh tankihpü Aron tsühsoniusobo amükeamrübo tüsho arü tankihpü Levirü ah.

¹¹ Arünü yapsu tüsho are aban taka kingaünkhi tüsho rhümthüneabe Atungpuh kilim ahuhbe yikhap akhinashunü amüsüh dükhüm kheak zojih tüsho tsünpungbo are aban takshihpü suna tsünpung dubopung küm; tümüde isanü Atungpuh isa Thrünpuh yukhüm zo, tüshe nüsanü api bahyukdo.

¹² Kheahang, Thrünpuh isa lung isa ku ki lah, tüsho api yo amükeamrübonü nüsa bede keochihpü jide arü hulipungpungbo khungpü lah. O Israelrübo, nüsa jipürü Thrünpuh, Atungpuh bede dükeochih; tümüde nüsanü mukuk.”

¹³ Jeroboamnü arü kheak dunglimnü arüshihpü thsüde thrihde yüshih; hanangde api bonungrü Juda müngüh lakheah, tüsho athrihrü ju arü dunglim lakheah.

¹⁴ Küyimki Judarünü rholokhea, thirithsü ju arü müngüh tüsho arü dunglim lakheah. Arünü Atungpuh ki zhi, tüsho amükeamrübonü hulipungpungbo müt.

¹⁵ Judüki Judarünü keochihpü aho. Tüsho küyimki Juda mihtsürübonü ahokhea, Thrünpuhnü Jeroboam tüsho Israel alala Abija tüsho Juda müngüh kukjih.

¹⁶ Israelrünü Juda müngüh tso, tüsho Thrünpuhnü arübo arü khah ching jih.

¹⁷ Abija tüsho api bonungrünü tode laksahde arü kuk; amokhitkhi Israel mihtsürü 500,000 laksah-a yap.

¹⁸ Hanangde ju kim ching Israelrü juyukabah, tüsho Juda mihtsürünü akuk ngü tümütüsho arünü Atungpuh , arü jipürü Thrünpuh kheak düthsün angü.

¹⁹ Abijanü Jeroboam yande müsham, tüsho api kheaknü kiutobo: Bethel, Jeshana, tüsho Ephron, jurü lung kiulongbo bede lu.

²⁰ Abija nimungbo ching Jeroboamnü api wu-sühmüh müngülo; Atungpuhnü api kinga lungshih, tüsho api sheabah.

²¹ Tüshe Abija düküngde zokih. Apinü niuberü 14 lu, tüsho tsührü 22 tüsho tsührübe 16 abuh kam.

²² Aningkhi Abija rhimobo, api yakli tüsho api rhimobo wukihbuh Iddo yukhean ching thrüta lah.