2 KIUTHSÜYUKHEAN 12 - AMÜSÜH HÜM CL Bible (BSI)

Juda ching Ijiprü Azahkhi

¹ Küyimki Rehoboam düküngde tüsho reangzahde akamkhea, api lung Israel alalanü Atungpuh yakzan bahyuk.

² Kiulongthsüpuh Rehoboam kam phüngüpü ching, arünü Atungpuh kilim thiyuro mülamonü, Ijip kiulongthsüpuh Shishaknü Jirusalem azhihde atu.

³ Khora-lolungbe 12,000, khoraberü 60,000 tüsho mükhekhamkhi Libyarü, Sukrü tüsho Ethiopiarü bonungrü Ijip chingnü api lung arü,

⁴ apinü chipi ayünkhi Juda kiutobo yankhit tüsho Jirusalem khiungde arü.

⁵ Judüki Shishak dünkheaknü Jirusalem ching mukhungkhi Rehoboam tüsho Juda atorübo kilim wukihbuh Shemaia arü, tüsho arü ki tha, “Atungpuhnü ha thachoh: Nüsanü I bahyukdo, jumonü inü nüsa Shishak khah ching jihdo.”

⁶ Judüki Israel atorübo tüsho kiulongthsüpuhnü azhihayihde kam tüsho tha, “Atungpuh alungki ching lah.”

⁷ Küyimki arü azhihayihkhi Atungpuhnü angükhea, Atungpuh yu Shemaia kilim arüshihde tha: “Arünü azhihayihde kamdo; inü arü müthsümünim, tüshe arü kilim atsokhitpü khürü mülüjihbah, tüsho Shishak khah hode I bukakhiukkhi Jirusalem kheak mudungkih.

⁸ Judüalalashe arübo api yamlarü thsübah, junangde arünü I tüsho alomi kiulongthsübo tankihkhi dükeak büthsükhi mükheahbah.”

⁹ Jumonü Ijip kiulongthsüpuh Shishaknü Jirusalem azhihde atu; apinü Atungpuh yam tüsho kiulongthsüpuh yam rahpungbo lude tso; apinü kukruk lüpdükhi lu. Apinü Solomonnü athsükhi suna tsungbo she lude tso;

¹⁰ tüshe kiulongthsüpuh Rehoboamnü jurü müthri sunalung tsungbo thsü, tüsho kiulongthsüpuh yam ripit neakrü atorübo khah ching jih.

¹¹ Kiulongthsüpuhnü Atungpuh yam ching yü aban aheangrünü jurü shuhbah arü, tüsho aheangpung khiungshak lim hanlode yü.

¹² Tümütüsho apinü azhihayihde akammonü Atungpuh bukakhiukkhi api kheaknü rholo, junangde arü shahde müthsümünim; kheaküshe, Juda ching lalimlako tsüde alakheah.

Rehoboam Kiulongthsü Tsükkhityu

¹³ Jumonü kiulongthsüpuh Rehoboamnü Jirusalem ching anihbuh küdah thsüde düküngde kam tüsho kiulongthsü. Rehoboam kiulongthsüpü tankihchoki kam 41 azorü lakheah; Atungpuhnü api mung zopü Israel trük alala chingnü amokhitkhi kiuto Jirusalem ching apinü kam thürükheak thüne kiulongthsü. Abe mung Amonrü Naama lakheah.

¹⁴ Apinü amütsübe rhimo, tümüde apinü Atungpuh yimpü mulong müjih.

¹⁵ Kheakü aningkhi Rehoboam rhimobo, atankihnü akheam khiungde, wukihbuh Shemaianü athrütyukkhi tüsho wukihbuh Iddonü lün yande athrütyukkhi ching thrüta müla de? Judüki Rehoboam tüsho Jeroboam dükeak mutukzhakde thirithsü lakheah.

¹⁶ Rehoboam nihbuh jipürü lung yap tüsho David kiuto ching kiuyukabah; tüsho atsührü Abijanü api müthri.