2 KIUTHSÜYUKHEAN 10 - AMÜSÜH HÜM CL Bible (BSI)

Dukulim Trükbonü Azhihkhi

¹ Rehoboamnü Shekem ching yü, tümüde Israel alala api kiulongthsürü thsüshihpü Shekem ching arü.

² Küyimki Nebat tsührü Jeroboamnü ha sokhea (tümüde api kiulongthsüpuh Solomon kheaknü tsode ayükhi, Ijip ching lang alakheah), judüki api Ijip chingnü alode arü.

³ Arünü yüshihbah api jidarü; tüsho Jeroboam le Israel alala arü tüsho Rehoboam ki tha,

⁴ “Nü buhnü isa hahmülangde kamshihdo. Jumonü kheakü nü buhnü arhimokhibo amüküp tüsho api hahmülang isa kheak yihkihkhi hiphipde kamshang, tüsho isanü nü tankihbah.”

⁵ Apinü arü ki tha, “Nimung asampü ching I kilim alode arang.” Jumonü mihtsürübo tsoabah.

⁶ Judüki kiulongthsüpuh Rehoboamnü abuh Solomon rhangdung lachoki api ki larü ashinbuhrübo ki lümkhi keokhi, “Ha mihtsürübo ki alopü nüsanü küruk I ki athsunganahba?”

⁷ Arünü api ki alo, “Nünü ha mihtsürü ki muzhosho tüsho arü ki thiyu atsü thasho, arübo lünnü nü yamlarü thsübah.”

⁸ Tüshe ashinbuhrübonü api ki athsunganahkhi apinü müleangkhi, tüsho api lung zode asürübah kheakü api lung larü athrününgtsüng mihtsürübo kheak keokhikeora.

⁹ Apinü arü ki tha, “Nü buhnü isa kheak hahmülang yihkihjihkhi hiphipde kamshang de I ki tharü ha mihtsürübo ki isanü alopü thsüde nüsanü I ki tümü athsunganahba?”

¹⁰ Api lung zode asürükhi athrününgtsüngbonü api ki tha, “Nü buhnü isa hahmülangde kamshihdo, tüshe nünü isa thsungkheak hiphipshihbeah de nü ki tharü mihtsürübo ki nünü ha ruk thaang, ‘I yingkhing aninibe ju I buh chim kheaknü akheahbe ah.

¹¹ Kheakü, I buhnü nüsa kheak hahmülang yihkihjihdo, inü nüsa hahmülang khiojihbah. I buhnü nüsa rhaptsonü dando, tüshe inü nüsa kheak lungthsührinü adanbah.’ ”

¹² Jumonü kiulongthsüpuhnü asam nipü I kilim alodarang de athakhi nangde, Jeroboam tüsho mihtsürübo alala Rehoboam kilim asam nipü arü.

¹³ Kiulongthsüpuhnü mihtsürübo ki müküpde alo. Ashinbuhrübonü api ki athsunganahkhi apinü mani;

¹⁴ tüsho athrününgtsüngbonü athsunganahkhi yande apinü arü ki tha, “I buhnü nüsa hahmülangshihdo, tüshe inü nüsa hahmülang kheak khiojihbah; I buhnü nüsa rhaptsonü dando, tüshe inü nüsa lungthsührinü adanbah.”

¹⁵ Junangde kiulongthsüpuhnü mihtsürübo ki mani tümütüsho apinü Nebat tsührü Jeroboam ki Shilonrü Ahija hode athakhi dünjipü Atungpuh Thrünpuh lümkhi lakheah.

¹⁶ Küyimki kiulongthsüpuhnü arü ki mani de Israel alalanü angükhea, mihtsürübonü kiulongthsüpuh ki alo, “David lung isa tümü shihcham la? Jesse tsührü lung isa tümü yamrüplurüp müla. Nüsa khimyambo lim yüang, O Israel, kheakü nüsa nihbuh yam lim kheahang, O David.” Jumonü Israel alala arü yam lim yüabah.

¹⁷ Tüshe Rehoboamnü Juda kiutobo ching larü Israel mihtsürübo kurungkheak kiulongthsü.

¹⁸ Küyimki kiulongthsüpuhnü rhimo müküp kurungkheak rhimo mükheahbuh Adoniram yüshihkhea, Israel alalanü api rusahabah. Judüki kiulongthsüpuhnü Jirusalem lim alihde ayüpü nihbuh khora-lolungbe kheak niokheamde künkih.

¹⁹ Jumonü khihni khiungde Israelnü David yamkhün azhihde arükheah.