2 KIUTHSÜYUKHEAN 1 - AMÜSÜH HÜM CL Bible (BSI)

Solomonnü Lümlung Kheangkhi

¹ David tsührü Solomonnü api kiulongthsü düküngde kamshih; Atungpuh api Thrünpuh anihbuh lung lakheah tüsho api khide ato kamshih.

² Solomonnü Israel alala, chithürübo tüsho chibo kurungkheak wühkenorü, mahkhaprübo, Israel limberü alala, guk ching akubo jimukhung.

³ Judüki Solomon, tüsho api lung amukhungrü athrünkhi Gibeon ching lakhi achang dangpung ching yü; tümüde Atungpuh yamlarü Mosanü sunglo ching Thrünpuh yo ashorupung khimyam thsükhi ju ching lakheah.

⁴ (Tüshe Davidnü Thrünpuh sangdan ju Kiriath-jearim ching lude apinü athsakhamkhi dangpung chingnü arü; tümüde apinü ju thsungkheak Jirusalem ching thsüa zo.)

⁵ Tüshe Hur tsührü Uri tsührü Bezalelnü athsükhi müwayinchi kingaün sadam ju ching Atungpuh arüngkhimyam miki lakheah. Tüsho Solomon le amukhungrünü ju dünkheak atsangashua kheah.

⁶ Solomonnü ashorupung khimyam ki lakhi Atungpuh miki müwayinchi kingaün sadam lim wutu, tüsho taka kingaünbo 1000 jih.

⁷ Ju tsüngre Thrünpuhnü Solomon ki akhiuk, tüsho api ki tha, “Inü nü tümü jihbeanü kheangang.”

⁸ Solomonnü Thrünpuh ki alo, “Nünü I buh David ki amuzhodakkhi ato huhdo, tüsho api müthri I kiulongthsürü kamshihdo.

⁹ O Atungpuh , Thrünpuh, nünü I buh David ki alokhikhibo kheakü dünjishang, tümüde alo asungthulung nangde ahihkhi mihtsürübo kurungkheak nünü I kiulongthsürü kamshihdo.

¹⁰ Kheakü ha mihtsürübo limbepü I kilim lümlung tüsho mükheahmudu jihang, tümüde ha nü mihtsürü ato shenü yakzan shuhkhukpü?”

¹¹ Thrünpuhnü Solomon ki alo, “Tümütüsho ha nü mulong ching laa lah, tüsho nünü alakukruk, lakhit, wüntrepü, yungsho nünü athraneanrü rhangdung thsungkheak mükheang, tüsho kutsüp thsungkheak she mükheang, tüshe nünü I mihtsürü kurungkheak inü nü kiulongthsürü kamshihkhi yakzan shuhkhukpü thsüde lümlung tüsho mükheahmudu kheang,

¹² lümlung tüsho mükheahmudu nü kilim jihbah. Kheaküshe inü nü kilim lakhit, alakukruk, wüntrepü nü müngüh tüsho nü dunglim kiulongthsürübo lakhi kheaknü alü jihbah.”

Kiulongthsüpuh Solomon Wu-sühmüh tüsho Lakhit

¹³ Jumonü Solomonnü Gibeon ching achang dangpung, ashorupung khimyam chingnü Jirusalem lim arü. Tüsho apinü Israel kurungkheak kiulongthsü.

¹⁴ Tüsho Solomonnü khora-lolungbe tüsho khorabo bemukhung; api khora-lolungbe 1400 tüsho khora 12,000 lakheah, ju apinü khora-lolungbe Jirusalem tüsho kiutobo ching zo.

¹⁵ Kiulongthsüpuhnü shotoyinchi tüsho suna Jirusalem ching lung nangde bokhuh kamshih, tüsho apinü lokeamlo ching sangzhinasodung nangde cedar suhdahde kamshih.

¹⁶ Solomon yo khorabo ju Ijip tüsho Kue chingnü handarü; kiulongthsüpuh shothsümolorünü jurübo ju kim yo adün jihbah thulo.

¹⁷ Arünü Ijip chingnü handarü, tüsho mühah, khora-lolungbe khülang dün shotoyinchi 600, tüsho khora khülang dün shotoyinchi 150; junangde arü hode harübo Hit tüsho Siria kiulongthsürübo alala kilim mühah.