2 KIULONG THSÜRÜ 9 - AMÜSÜH HÜM CL Bible (BSI)

Israel Kiulongthsüpuh Jehu

¹ Judüki wukihbuh Elishanü wukihrü bolung khülang ji tüsho api ki tha, “Nü chim rüma lung; ha müdangke pung nü khah ching luang, tüsho Ramoth-gilead ching yüang.

² Küyimki nü akhiungbanü, ju ching Nimshi tsührü, Jehoshaphat tsührü Jehu kheahang; yüzahang tüsho anihbuh borü lungnü bekhitang, tüsho alungbe khiungshak ching api bede yüzahang.

³ Jushu müdangke pung lubah aku kheak dungkihang, tüsho thaang, ‘Atungpuhnü ha thachoh: Inü Israel kurungkheak kiulongthsürü thsüpü nü mujudemokhitchoh.’ Jushu khimdopü khimshuhbah alihde tsoang; dashu.”

⁴ Jumonü athrününgtsüng mihtsürü wukihbuhnü Ramoth-gilead ching yü.

⁵ Bonungrü wühkenorübo küdangde alachoki api khiung, tüsho apinü tha, “Wühkenobuh, nü thsungkheaknü thiyusheak khülang lah.” Jehunü keokhi, “Isa shepü thsungkheak?” Apinü alo, “Wühkenobuh, nü thsungkheak.”

⁶ Jumonü Jehunü asürü tüsho alunglim yüzah; athrününgtsüng junü aku kheak müdangke dungkihde api ki tha, “Atungpuh Israel Thrünpuhnü ha thachoh: Atungpuh mihtsürü, Israel kurungkheak kiulongthsürü thsüpü inü nü mujude-mokhitchoh.

⁷ Nünü nü tungpuh Ahab yamkhün laksahbah, junangde I yamlarü wukihrübo tüsho Atungpuh yamlarü alala laksahkhi Jezebel kheak royimbah.

⁸ Tümüde Ahab yamkhün athrünkhi dükheakbah; inü Israel ching Ahab kheaknü athrürü aban, rhüka lakhi yungsho zuzu lakhi kheamshihbah.

⁹ Inü Ahab yamkhün ju Nebat tsührü Jeroboam yamkhün tüsho Ahija tsührü Baasha yamkhün nangde akamshihbah.

¹⁰ Jezreel lomi ching khihnubonü Jezebel tsühbah, tüsho shenü anihbe kiuyuka mübah.” Jushu apinü khimdopü khimshuh tüsho alihde tso.

¹¹ Küyimki Jehunü nihbuh putungrü yo atorü kilim alode arükhea, arünü api ki tha, “Alala dükde la shi? Tümüde abünrü mihtsürü nü kilim arükhea?” Apinü arü ki alo, “Mihtsürü tüsho apinü dapdaprarakhi nüsanü mükheahlah.”

¹² Arünü tha, “Akeangyu ah! Isa ki thaang!” Jumonü apinü tha, “Apinü I ki thakhi ju ha: ‘Atungpuhnü ha thachoh, “Inü nü Israel kurungkheak kiulongthsürü thsüpü mujudemokhitchoh.’’’”

¹³ Judüki arünü niokheamde arü khimmih lubah api thsungkheak jingdüküpung kheak khimjih; tüsho arünü hulipungpung khung, tüsho zhiyuk, “Jehu ju kiulongthsüpuh.”

Israel Kiulongthsüpuh Joram Laksahkhi

¹⁴ Hanangde Nimshi tsührü Jehoshaphat tsührü Jehunü Joram azhihde rük thsü. Joram lung Israel alala bebah Siria kiulongthsüpuh Hazael azhihde Ramoth-gilead ching aheangde alakheah;

¹⁵ tüshe kiulongthsüpuh Joram a apinü Siria kiulongthsüpuh Hazael bede keochihchoki Siriarünü ayiurijihkhi mü thsüngupü Jezreel ching alode yüa lakheah. Jumonü Jehunü tha, “Ha nü lümkhi thsüsho, sheshe kiuto chingnü duwukhiukshih tüsho Jezreel ching thiyusheak thaang.”

¹⁶ Judüki Jehunü nihbuh khoralolungbe kheak yükih tüsho Joram tukthsüde ayappung, Jezreel ching yü. Juda kiulongthsüpuh Ahazianü Joram rhua kheahpü akia lakheah.

¹⁷ Jezreel ching, aheangsadam kheak aheangde azhipbuhnü Jehu le amihtsürü khiungde arükhi abina ngü, tüsho tha, “Inü boto khülang ngüchoh.” Joramnü tha, “ Khoraberü khülang luang; arü shorupü api yüshang tüsho apinü thashang, ‘ Ha mungtsü a shi?’”

¹⁸ Jumonü khorabebuhnü Jehu shorupü yübah tha, “ Kiulongthsüpuhnü ha thachoh, ‘ Ha mungtsü a shi?’” Jehunü alo, “Nünü mungtsü tümü thsüpü? I dunglim yüabahang.” Aheangbuhnü thiyusheak jihde tha, “Yunithsürünü arü khiungdo, tüshe api alode marü.”

¹⁹ Judüki apinü khoraberü püpü arü kilim yüshih tüsho tha, “ Kiulongthsüpuhnü ha thachoh, ‘ Ha mungtsü a shi?’ ” Jehunü alo, “Nünü mungtsü tümü thsüpü? I dunglim yüabahang.”

²⁰ Kheaküshe aheangbuhnü thiyusheak jih, “Apinü arü khiungdo, tüshe api alode marü. Ha Nimshi tsührü Jehunü abekhi ruk ah; tümüde apinü abünrü nangde bechoh.”

²¹ Joramnü tha, “Thsakhamang.” Tüsho arünü api khora-lolungbe thsakham. Jushu Israel kiulongthsüpuh Joram tüsho kiulongthsüpuh Ahazia ane nihbuh khora-lolungbe kheaknü tsahmusu, tüsho Jehu shorupü yü; anenü api Jezreelrü Naboth lo ching shoru.

²² Küyimki Joramnü Jehu ngükhea, apinü tha, “Jehu, ha mungtsü a shi?” Apinü alo, “Nü be Jezebelnü thümükhi tüsho sangthsü kingaünkhi khiungde tümü mungtsü lapü?”

²³ Judüki Joramnü rholobah tsode Ahazia ki tha, “Ahazia, amülim ah!”

²⁴ Jehunü sühmüh alalanü sanglüh hünkih, tüsho Joram ngam dükeak kip; junangde hühzonü api mulong chinkhit; tüsho nihbuh khora-lolungbe ching api keamabah.

²⁵ Jehunü api khoralolungbe torü Bidkar ki tha, “Api shuhkhitang tüsho Jezreelrü Naboth lo kheak bahang; lümkhitang, küyimki ike rukhüh abuh Ahab dunglim bede atsahkhea, Atungpuhnü api azhihde ha müchityu thakhi lümkhitang:

²⁶ ‘Naboth thiyih tüsho api tsührü thiyih inü yini ngükhi thsungkheak, Atungpuhnü tha, inü thiyuchihchimchoh, inü ha lo kheak nü kilim jihlobah.’ Kheakü jumonü api shuhkhitang tüsho Atungpuh yu yande api alo kheak shuh-a bahang.”

Juda Kiulongthsüpuh Ahazia Laksahkhi

²⁷ Küyimki Juda kiulongthsüpuh Ahazianü ha ngükhea, apinü Beth-haggan lim alihde tso. Jehunü api müshamde tha, “Api she kipang!” Tüsho arünü api Ibleam ching, Gur wutu lim khora-lolungbe chingnü kip. Jushu api Megiddo lim alihde yü tüsho ju ching sheabah.

²⁸ Api torübonü anihbuh khora-lolungbe chingnü hande Jirusalem ching yü, tüsho David kiuto ching nihbuh jipürü lung kiuyukabah.

²⁹ Ahab tsührü Joram kam thürükheak khülangpü ching, Ahazianü Juda kurungkheak kiulongthsüpü tankih.

Kiulongthsübe Jezebel Laksahkhi

³⁰ Küyimki Jehu Jezreel ching arükhea, Jezebelnü ju so; alibenü amükbo muju, tüsho akuyü thsakhama lubah ayinripit chingnü abinkhita kheah.

³¹ Jehu ripit ching azahchoki, alibenü tha, “Nü putungpuh laksahrü. Zimri, ha mungtsü a shi?”

³² Apinü ayinripit ching abinkih-a kheah tüsho tha, “Shepü I kilim thrip a? Shepü a?” Dukha 2 yungsho 3nü api abinkhita kheah.

³³ Apinü tha, “Alibe jipkhiang.” Jumonü arünü alibe jipkhia bah; anihbe thiyih khürü rhü kheak tüsho anihbe kheak jungkhi khorabo kheak rhakkih.

³⁴ Jushu apinü yüzah tüsho tsühyung; apinü tha, “Ju muthrumüneankhi azoberü kilim kheahang tüsho anihbe kiuyuka bahang; tümüde alibe kiulongthsüpuh tsührü ah.”

³⁵ Tüshe küyimki arünü anihbe kiuyuka bahpü yükhea, arünü alibe kuro le jing tüsho amüyilungbo lang ngü.

³⁶ Küyimki arünü alode arübah api ki thakhea, apinü tha, “Ha api yamlarü Tishbirü Elija hode asukkhi Atungpuh yu ah, ‘ Jezreel lomi ching khihnubonü Jezebel shih tsühbah;

³⁷ Jezebel mi ju Jezreel lomi mükeak ching khihmujung nangde alabah, junangde ha Jezebel ah de shenü müthakhuk.’ ”