2 KIULONG THSÜRÜ 8 - AMÜSÜH HÜM CL Bible (BSI)

Shunem chingnü Azoberü Alodarükhi

¹ Kheakü Elishanü atsührü arhang kamloshihkhi azoberü ki tha, “Asürang, nü tüsho nü yamkhün yüang, tüsho nünü küching lakhukbanü ju ching laang; tümüde Atungpuhnü khümzung jido, tüsho ju lomi ching kam thüne arübah.”

² Jumonü alibenü asürü tüsho Thrünpuh mihtsürü yu yande rhimo; alibenü anihbe yamkhün lung yü tüsho Filistia lomi ching kam thüne la.

³ Kam thünepü akheam ching küyimki alibenü Filistia lomi chingnü alode arükhea, anihbe yamkhün tüsho anihbe lomi thsungkheak kiulongthsüpuh ki mushupü alibenü tsahmusu.

⁴ Kheakü kiulongthsüpuhnü Thrünpuh mihtsürü yamlarü Gehazi asukachihde alakheah, “Elishanü arhimokhi atobo alala I ki thaang.”

⁵ Apinü küruk Elishanü ashekhi mihtsürü arhang kamloshihkheanü ju kiulongthsüpuh ki thachoki, apinü ashekhi chingnü arhang kamloshihkhi tsührü abenü kiulongthsüpuh ki anihbe yamkhün tüsho lomi thsungkheak mushu. Gehazinü tha, “I tungpuh kiulongthsüpuh, ha ching azoberü khülang lah, tüsho anihbe tsührü Elishanü arhang kamloshihkhi ha kheak lah.”

⁶ Küyimki kiulongthsüpuhnü alibe ki keokhikhea, alibenü api ki tha. Jumonü kiulongthsüpuhnü anihbe thsungkheak atorü thiyide tha, “Alibenü lomi bahbah atsokhi chingnü khihni khiungde thulubo lubün alala bede anihbe yo alala jihloang.”

Elisha tüsho Siria Kiulongthsüpuh Ben-hadad

⁷ Siria kiulongthsüpuh Ben-hadad tukthsüde alachoki Elishanü Damaska lim yü. Küyimki api ki, “Thrünpuh mihtsürü ha ching arüa lah” de athakhea,

⁸ kiulongthsüpuhnü Hazael ki tha, “Nünü thsambah khülang luang tüsho Thrünpuh mihtsürü shorupü yüang. I ha tukthsü chingnü anguba shi mungunü api hode Atungpuh ki keokhiang.”

⁹ Jumonü Hazaelnü Damaska kukruk thsambah lubah anihbuh shorupü yü. Küyimki api yüzahbah anihbuh miki zhipkhea, apinü tha, “Nü tsührü Siria kiulongthsüpuh Ben-hadadnü I nü kilim arüshihde tha, ‘I ha tukthsü chingnü anguba shi?’”

¹⁰ Elishanü api ki tha, “Yüang, api ki thaang, ‘ Tsükjide nü angubah’; tüshe Atungpuhnü I ki huhkhi a tsükjide api ashebah.”

¹¹ Apinü amük müzhingbah anihbuh achih müngüyi khiungde api kheak kheahkih. Judüki Thrünpuh mihtsürünü trip.

¹² Hazaelnü keokhi, “Tümüde I tungpuh tripcho?” Apinü alo, “Tümütüsho nünü Israel mihtsürü kheak amütsü rhimo lakhi inü mükheahlah; nünü arü chipi monü atakbah, nünü arü athrününgtsüng mihtsürübo nukshangnü alaksahbah, khungarü aninibo ajip kamde jipa bahbah, tüsho mihlakhi azoberübo chakashungbah.”

¹³ Hazaelnü tha, “Nü yamlarü tümü a, apinü ha ato rhimopü thsüde khihnu ju shepü a?” Elishanü alo, “Nü Siria kurungkheak kiulongthsürü thsüpü Atungpuhnü I ki huhdo.”

¹⁴ Judüki apinü Elisha bahbah tso, tüsho api putungrü Ben-hadad kilim yü. Apinü anihbuh ki tha, “Elishanü tümü nü ki thade?” Tüsho apinü alo, “Nü tsükjide angubah de apinü I ki thado.”

¹⁵ Tüshe ashidopü apinü yappung khimbe lu tüsho ke ching thsambah kiulongthsüpuh miro kheak api müsheyi khiungde phukih-a zo. Tüsho Hazaelnü api müthri.

Juda Kiulongthsüpuh Jehoram

¹⁶ Israelrü Ahab tsührü kiulongthsüpuh Joram kiulongthsükhi kam phüngüpü ching Juda kiulongthsüpuh Jehoshaphat tsührü Jehoramnü kiulongthsüpü tankih.

¹⁷ Api kiulongthsürü kamchoki anihbuh kam 32 lakheah, tüsho apinü Jirusalem ching kam tizheah kiulongthsü.

¹⁸ Apinü Ahab yamkhünnü arhimokhi nangde, Israel kiulongthsürübo limro ching tsah, tümüde api niube ju Ahab tsührü lakheah. Atungpuh miki amütsü apinü rhimo.

¹⁹ Tütüshe api yamlarü David dünkheaknü Atungpuhnü Juda müthsümünim, tümütüsho apinü api tüsho tsühsoniuso kilim lünnü tsünpung khülang jihpü alokhi.

²⁰ Api nimungbo ching Edomnü Juda yakzan kheak azhih, tüsho arü kiulongthsürü mokhit.

²¹ Judüki Jehoramnü api yo khora-lolungbe alala lubah Zair lim tsahmusude yü. Edomrünü api le api khora-lolungbe limthorübo zündo, tüshe apinü asürü tüsho azhing ching tsoabah; api bonungrü she thüyam lim alihde tso.

²² Jumonü khihni khiungde Edomnü Juda yakzan azhihde arü. Ju kim ching Libnanü she azhih.

²³ Kheakü Jehoram rhimobo aningkhi tüsho apinü arhimokhi alala, Juda kiulongthsürübo yukhean hüm ching thrüta müla de?

²⁴ Junangde Jehoram nihbuh jipürü lung yap, tüsho arü lung David kiuto ching kiuyukabah; api tsührü Ahazianü api müthri.

Juda Kiulongthsüpuh Ahazia

²⁵ Israelrü Ahab tsührü kiulongthsüpuh Joram kam thürükheak mahnepü ching Juda kiulongthsüpuh Jehoram tsührü Ahazianü kiulongthsüpü tankih.

²⁶ Api kiulongthsüpü tankihchoki Ahazia kam 22 lakheah; apinü Jirusalem ching kam khülang kiulongthsü. Abe ju Israel kiulongthsüpuh Omri tsührütsührü Athalia lakheah.

²⁷ Apinü she Ahab yamkhünnü arhimokhi nangde, Atungpuh miki amütsü rhimode Ahab yamkhün limro ching tsah, tümüde api Ahab yamkhün tsühmeakrü lakheah.

²⁸ Apinü Ramoth-gilead ching Siria kiulongthsüpuh Hazael bede thirithsüpü Ahab tsührü Joram lung yü, ju ching Siriarünü Joram yurijih.

²⁹ Ramoth ching apinü Siria kiulongthsüpuh Hazael bede thirithsüchoki Siriarünü yurijihkhi mü thsüngupü kiulongthsüpuh Joramnü Jezreel ching alode arü. Judarü Jehoram tsührü kiulongthsüpuh Ahazianü Ahab tsührü Joram shorupü Jezreel ching yüki, tümütüsho api yuria lakheah.