2 KIULONG THSÜRÜ 6 - AMÜSÜH HÜM CL Bible (BSI)

Awü Ku Ngülokhi

¹ Kheakü wukihrü bokhühnü Elisha ki tha, “Nünü ngülah, isa nü lung lapung yam khide ninilah.

² Isa abande abinkiu lupü thsüde isa Jordan ching yüshang, tüsho isa lapü ju ching lapung thsanü.” Apinü alo, “Jude thsüang.”

³ Judüki arü lung khülangnü tha, “Muzhobah nü yamlarübo lung arang.” Tüsho apinü alo, “I arübah.”

⁴ Jumonü apinü arü lung yü. Küyimki arü Jordan ching arükhea, arünü sangbo kiushak.

⁵ Tüshe khülang buhnü sang kiushakde alachoki api wü ku ke ching yüzah; apinü zhi, “Aha, aputungrü! Ha amüshihkhea le.”

⁶ Judüki Thrünpuh mihtsürünü tha, “ Küching yüzah de?” Küyimki apinü anihbuh ki dangpung huhkhea, apinü sangkheam khapshak tüsho ju ching jipa yüzahshih, tüsho yinchi ju phungde akih.

⁷ Apinü tha, “Thrüa lung.” Jumonü apinü akhah chungbah ju lu.

Siria Bonungrü Kukkhi

⁸ Khülang ki küyimki Siria kiulongthsüpuhnü Israel kheak thirithsüde alakhea, apinü anihbuh torübo kheak lümrük lu. Apinü tha, “Hadürü dangpung khülang ching I binkheampung thsübah.”

⁹ Tüshe Thrünpuh mihtsürünü Israel kiulongthsüpuh kilim thiyusheak yüshih, “Ha dangpung muhopü kümkangang, tümütüsho Siriarü ju ching yükichoh.”

¹⁰ Thrünpuh mihtsürünü asukkhi dangpung ching Israel kiulongthsüpuhnü thiyusheak yüshih. Apinü khülang ki yungsho mahne ki kheak hode ha dangpung ching müzünde tha, junangde kurhangde alakheah.

¹¹ Ha dünkheaknü Siria kiulongthsüpuh mulong khide niuknimde kam; apinü anihbuh torübo jibah arü ki tha, “Isa bolung shepü Israel kiulongthsüpuh kilim tsanglanü I ki thaang?”

¹² Judüki anihbuh torü khülangnü tha, “I tungpuh kiulongthsüpuh, she müla. Israel ching lakhi wukihbuh Elishanü nünü nü yapkiu khiungshak ching thakhi yu ha Israel kiulongthsüpuh ki thachoh.”

¹³ Apinü tha, “Yüang tüsho api küching lanü yimang; inü ayüshihbah tüsho api rambah.” Api ki thakhi ju, “Api Dothan ching lah.”

¹⁴ Jumonü apinü khorabo le khoralolungbebo tüsho bonungrü hihde yüshih; arünü azhing ching arü, tüsho kiuto zündomükam.

¹⁵ Küyimki Thrünpuh mihtsürü yapsu mükikde asürübah awukhiukkhea, khorabo tüsho khora-lolungbe bebah bonungrübonü kiuto alala zündoa lakheah. Api yamlabuhnü tha, “Aha, aputungpuh! Isa küde athsüba?”

¹⁶ Apinü alo, “Dütre, tümüde arü lung lakhi kheaknü ike lung lakhi ahihbeah.”

¹⁷ Judüki Elishanü tamkhüntamnü: “O A TUN GPU H , muzhobah apinü angüpü thsüde amükbo khimshuhjang.” Jumonü Atungpuhnü yamlabuh mükbo khimshuhjih tüsho apinü ngü; khorabo tüsho khora-lolungbebonü Elisha zündomükamde awung mia lakheah.

¹⁸ Küyimki Siriarünü api azhihde akikhea, Elishanü Atungpuh ki tamkhüntamnü, tüsho tha, “Muzhobah ha mihtsürübo mük tukshihde shikang.” Jumonü Elishanü akeokhikhi nangde apinü mük tukshihde arü shik.

¹⁹ Elishanü arü ki tha, “Ha limro yung, tüsho ha kiuto yung; I yanang, tüsho nüsanü ayimkhi mihtsürü kilim inü nüsa bede ayübah.” Tüsho apinü arü Samaria lim bede yü.

²⁰ Arü Samaria ching yüzah akede, Elishanü tha, “O Atungpuh , arünü angüpü thsüde harü mihtsürü mükbo khimshuhjang.” Atungpuhnü arü mükbo khimshuhjih, tüsho arünü arübo Samaria ching lakhi ngü.

²¹ Küyimki Israel kiulongthsüpuhnü arü ngükhea, apinü Elisha ki tha, “Abuh, inü arü laksahanü de? Inü arü laksahanü de?”

²² Apinü alo, “Düh! Nü nukshang tüsho sanglühnü ayandokhi mihtsürübo nünü alaksahba de? Arü miki jim tüsho ke zojang, junangde arünü atsühyungbah; tüsho arü putungrü kilim alode yüshang.”

²³ Jumonü apinü arü thsungkheak jimpung ato thsakham; tüsho tsühyungkhi dunglim apinü arübo arü limro ching yüshih, tüsho arünü arü putungrü kilim yü. Tüsho Siriarünü kheaküa Israel lomi ching ayanpü marüdebah.

Samaria Yankhi

²⁴ Kim anükhüh dunglim Siria kiulongthsüpuh Ben-hadadnü api bonungrü lüpdükhi jimukhung; apinü Samaria azhihde yü tüsho yan.

²⁵ Ayankhi hode Samaria ching khümzung arü, junangde donki ku ju shotoyinchi 8 tüsho guduru khih düpüt 200 mo shotoyinchi 5nü yin.

²⁶ Kheakü Israel kiulongthsüpuh kiuto chipi kheak tsahde alachoki, azoberü khülangnü api ki zhi, “Rungang, I tungpuh kiulongthsüpuh!”

²⁷ Apinü tha, “Muh! Atungpuhnü nü rungshang. Inü küde thsah nü rungpü? Hi nitpung chingnü dashi yukhu nitpung chingnü?”

²⁸ Tüshe kiulongthsüpuhnü alibe ki keokhi, “Nünü atsangkhi ju tümü a?” Alibenü alo, “Ha liberünü I ki tha, ‘Nü tsührü athrürü jihang; ikenü api khihni tsühanü, tüsho ikenü shido I tsührü athrürü tsühbah.’

²⁹ Jumonü ikenü I tsührü khiung tüsho tsüh. Ashidopü inü anihbe ki tha, ‘Nü tsührü jihang tüsho ikenü api tsühanü.’ Tüshe anihbenü atsührü ramabah.”

³⁰ Küyimki kiulongthsüpuhnü alibe yu sokhea, apinü akhim thorüp, tüsho api kiuto chipi kheak tsahde alachoki api pang alunglim shungliukhim lah de mihtsürübonü ngü.

³¹ Tüsho apinü tha, “ Khihni Shaphat tsührü Elisha ku kih-a lasho, Atungpuhnü I ki alübe rhimoshang.”

³² Jumonü apinü mihtsürübo api mikinü chama yüshih. Kheakü Elisha ju api yam ching binde alakheah, tüsho azothsürübo api lung binde alakheah. Yunithsürü mukhiungyide, Elishanü azothsürübo ki tha, “Ha mihkhukrünü I ku lushihpü khürü arüshihkhi nüsanü mükheahnah? Küyimki yunithsürübo arübanü, nüsanü khimdopü rihang tüsho api kheak nimkihde rihdobah ramloang. Api putungrü jing khün anihbuh dunglim müla de?”

³³ Apinü arü ki thade alachoki kiulongthsüpuhnü api ki akibah tha, “Ha küpkhuk Atungpuh kilimnü ah! Kheaküa tümü thsüpü inü Atungpuh kheak mulonglampü?”