2 KIULONG THSÜRÜ 4 - AMÜSÜH HÜM CL Bible (BSI)

Elishanü Zhochihrü Khimoberü Rungkhi

¹ Kheakü wukihrü bolung khülang niubenü Elisha ki zhi, “Nü yamlarü I niubuh sheabahdo; tüsho nü yamlarünü Atungpuh wüntrede lachoh de nünü mükheahlah, tüshe sho züngrü I tsührü 2 azhorü thsüde alupü arüa lah.”

² Elishanü alibe ki tha, “Inü nü thsungkheak tümü rhimoba? I ki thaang, nü yam ching tümü la?” Alibenü alo, “Müdangke phüh 1 kheak hode, nü yamlarü a thüyam ching tümü müla.”

³ Apinü tha, “Wungdo wukhiukang, nü yamhingrü alala kheaknü pangjiphüh akeangkeangbo nipang tüsho anükhüh lang dükheang.

⁴ Jushu yüzahang, tüsho nü le nü tsührübo dunglim khimdopü rihang, tüsho pangjiphüh alala ching dungyukpü tankihang; küyimki abande amibanü, shuhmuwuh-a zoang.”

⁵ Jumonü alibenü api bahbah anihbe le atsührübonü khimdopü rih, arünü pangjiphühbo anihbe kilim hande arü, tüsho alibenü dungyuk.

⁶ Küyimki pangjiphühbo mikhea, alibenü atsührü athrürü ki tha, “I kilim pangjiphüh püpü lude arang.” Tüshe apinü anihbe ki tha, “ Kheaküa müla.” Jushu a müdangke ju abukkhi chingnü tukloabah.

⁷ Alibenü arübah Thrünpuh mihtsürü ki tha, tüsho apinü tha, “Yübah müdangke yinang tüsho nü shozüng shakang, tüsho nü le nü tsührübo lapü suhde aningbah.”

Elisha tüsho Shunem Liberü

⁸ Nimung khülang alarü aliberü lapung Elishanü Shunem hode yüchoki alibenü api ki yimtsühpü mushu. Jumonü küyimki apinü ju limronü ahobanü, apinü yimtsühpü tuklode alakheah.

⁹ Alibenü aniubuh ki tha, “ Kheahang, ha mihtsürü mutuklode isa limro hode alabuh ha dükde Thrünpuh mihtsürü amüsüh ah.

¹⁰ Isanü ayi-lüpkhi kheak rhü yukde khiungshak anikhüh thsanü, tüsho api thsungkheak ju ching yapkiu khülang, dükhüm khülang, jingchang binkiu khülang, tüsho tsünpung khülang de zoanü, junangde api küyimki isa kilim arübanü ju ching mühümbah.”

¹¹ Nimung khülang küyimki api ju ching arükhea, apinü khiungshak ching wutu tüsho ju ching yap.

¹² Apinü ayamlarü Gehazi ki tha, “Shunem liberü jiang.” Küyimki apinü alibe jikhea, alibenü api miki zhip.

¹³ Apinü anihbuh ki tha, “Alibe ki thaang, Tümütüsho nünü isa thsungkheak küpkhuk alala ludo, nü thsungkheak tümü rhimoba? Nü mung chingnü kiulongthsüpuh yungsho bonungrü wühkenobuh kilim thakhi yu laba shi?” Alibenü alo, “I, I mihtsürü bolung lachoh.”

¹⁴ Apinü tha, “Dale tüsho anihbe thsungkheak tümü rhimoba?” Gehazinü alo, “Tsülah, alibe tsührü athrürü müla, tüsho aniubuh shina lah.”

¹⁵ Apinü tha, “Alibe jiang.” Küyimki apinü alibe jikhea, alibenü ripit ki zhip.

¹⁶ Apinü tha, “Ha akheahmünchi arübe kam ching, nünü tsührü athrürü khülang kapbah.” Alibenü alo, “Yung, I tungpuh, O Thrünpuh mihtsürü; nü yamlarü rük daki.”

¹⁷ Elishanü alibe ki thakhi nangde, ju akheahmünchi kim dükdü ching alibe mübünkeangde kam tüsho tsührü athrürü khülang zübe.

¹⁸ Küyimki khungarü ju azorü kamkhea, nimung khülang apinü yimlurü bolung lakhi abuh kilim wukhiuk.

¹⁹ Apinü abuh ki tha, “O, I ku, I ku!” Abuhnü ayamlarü ki tha, “Api ju abe kilim buhbah yüang.”

²⁰ Apinü anihbuh ju buhbah abe kilim arü; khungarü ju animuro khiungde anihbe pho kheak bin tüsho api sheabah.

²¹ Alibenü wutu tüsho api ju Thrünpuh mihtsürü yapkiu kheak yapshihbah khimdopü rih tüsho tsoabah.

²² Judüki alibenü aniubuh ji tüsho tha, “I kilim yamlarü khülang tüsho donki khülang arüshang, junangde inü nahde Thrünpuh mihtsürü kilim yübah tüsho alode arübah.”

²³ Apinü tha, “Tümüde khihni api kilim yüpü? Ha khinu aso yungsho amuni yung.” Alibenü tha, “Ju atsübah.”

²⁴ Judüki alibenü donki thsakham tüsho ayamlarü ki tha, “Shiwüh ju tuthsukang; inü nü ki müthasho I thsungkheaknü dütuklo.”

²⁵ Jumonü alibenü tsahmusu, tüsho Karmel wung ching Thrünpuh mihtsürü kilim arü. Küyimki Thrünpuh mihtsürünü anihbe arüde angükhea, apinü ayamlarü Gehazi ki tha, “ Kheahang, ju ching Shunem liberü lah;

²⁶ alibe shorupü khülang ki alihang, tüsho anihbe ki keoang, Nü tsüde la shi? Nü niubuh tsüde la shi? khungarü tsüde la shi?” Alibenü alo, “Tsüde lah.”

²⁷ Küyimki alibenü Thrünpuh mihtsürü shorupü awung ching arükhea, alibenü api jing kheak ramlo. Gehazinü alibe nima tsoshihpü thsü. Tüshe Thrünpuh mihtsürünü tha, “Alibe azangrü zojang, tümüde anihbe lümthsünü akhüh ching lah; Atungpuhnü ju I kheaknü ramlah tüsho I ki mütha.”

²⁸ Judüki alibenü tha, “Inü I tungpuh ki tsührü athrürü khülang thsungkheak keokhea de? I dümülapyuk de inü mütha de?”

²⁹ Apinü Gehazi ki tha, “Nü chim rümang, tüsho nü khah ching I tso shuhbah yüang. Nünü khürü shorusho, salüm düjih, tüsho khürünü nü ki salüm jihsho, dalo; tüsho khungarü miro kheak I tso yihkihang.”

³⁰ Judüki azübuh abenü tha, “Atungpuh tüsho nü lale, nü mübedüa inü müdükhe.” Jumonü api asürü tüsho anihbe yande yü.

³¹ Gehazinü arü müngüh yü tüsho azübuh miro kheak tso yihkih, tüshe rhangdung thsungkheaknü düsheak tüsho amütsan mülakheah. Apinü anihbuh shorupü alode arü tüsho api ki tha, “ Khungarü masürü.”

³² Küyimki Elisha thüyam ching azahkhea, apinü khungarü ju anihbuh yapkiu kheak shea yapa ngü.

³³ Jumonü apinü yüzahbah ane dunglim khimdopü rih tüsho Atungpuh ki tamkhüntamnü.

³⁴ Jushu apinü yapkiu kheak yükih tüsho azübuh kheak ju yap, amün anihbuh mün ching yuk, amük anihbuh mük kheak shangkih, tüsho akhah anihbuh khah kheak yihkih; tüsho apinü anihbuh kheak ningbah alachoki, azübuh shihphü ju lamlamde kam.

³⁵ Apinü yükihbah akhiungshak ching khülang ki yüla arüla de tsah, jushu yükihlo tüsho anihbuh kheak ning; azübuhnü thüne ki hahchi thsü, tüsho amük khimshuh.

³⁶ Elishanü Gehazi ji tüsho tha, “Shunem liberü jiang.” Jumonü apinü alibe ju ji. Küyimki alibenü api kilim arükhea, apinü tha, “Nü tsührü luang.”

³⁷ Alibenü arü tüsho alo ching mükhümde api jing kheak khukning; jushu alibenü anihbe tsührü lu tüsho tsoabah.

Phüh ching Ashebe Zahkhi

³⁸ Küyimki Elisha Gilgal lim alode yükhea, lomi ching khümzung lakheah. Wukihrü bokhüh api müngüh binde alachoki, apinü ayamlarü ki tha, “Phüh ato khülang dükihang, tüsho wukihrü bokhüh khilim awo kelamang.”

³⁹ Arü bolung khülangnü moli wophüyak yimpü thulu ching wukhiuk; apinü mütüm kurungaso ngü, tüsho sangaso ahihdo lubah arü tüsho jurü tümüanü mümükheahde nipthünakbah awo phüh ching yuk.

⁴⁰ Arünü mihtsürübo kilim anükhüh ahiuh-a kip. Tüshe küyimki arübo awophüyak ju tsühde alakhea, arünü zhi, “O Thrünpuh mihtsürü, phüh ching ashebe zahlah!” Arünü ju mütsühkhuk.

⁴¹ Apinü tha, “Ayikangkang anükhüh lude arang.” Apinü ju phüh ching kamyuk, tüsho tha, “Mihtsürübo ki ahiuhang tüsho arübo tsühshang.” Tüsho phüh ching athsümünimbe tümü mülade alakheah.

⁴² Mihtsürü khülang akhuh asokhi sangasobo lubah Baal-shalisha chingnü Thrünpuh mihtsürü kilim arü: barli yikhap 20 tüsho anihbuh shungliu qiuqiu ching aso yimlukhi hi ye. Elishanü tha, “Ju mihtsürübo kilim jihang tüsho arübo tsühshang.”

⁴³ Tüsho api yamlabuhnü tha, “Inü küde thsah ha mihtsürü 100 müngüh zojihpü?” Jumonü apinü thalo, “Ju mihtsürübo kilim jihang tüsho arübo tsühshang, tümüde Atungpuhnü ha thachoh, ‘ Arünü atsühbah tüsho khürü aningbah.’”

⁴⁴ Apinü ju arü müngüh zojih, arünü tsüh tüsho Atungpuh yu yande khürü aning.