2 KIULONG THSÜRÜ 3 - AMÜSÜH HÜM CL Bible (BSI)

Israel tüsho Moab dükeak Thirithsü

¹ Juda kiulongthsüpuh Jehoshaphat kam thürükheak tizheahpü ching, Ahab tsührü Jehoram Samaria ching Israel kurungkheak kiulongthsürü kam; apinü kam thürükheak mahne kiulongthsü.

² Abuh le abe ruk yunga lalashe apinü Atungpuh miki amütsü rhimo, tümüde apinü abuhnü athsükhi Baal dungjing yihkhita bah.

³ Judüalalashe apinü Israel neak yihbeakshihkhi, Nebat tsührü Jeroboam neak kheak mürip; apinü ju kheaknü müchamachih.

⁴ Kheakü Moab kiulongthsüpuh Mesha ju namfimihnu akamrü lakheah, apinü Israel kiulongthsüpuh kilim namfimihnunu 100,000, tüsho namfimihnu 100,000 kheaknü anam jih.

⁵ Tüshe küyimki Ahab shekhea, Moab kiulongthsüpuhnü Israel kiulongthsüpuh kheak azhih.

⁶ Jumonü kiulongthsüpuh Jehoramnü Samaria chingnü ju kim ching wukhiuk tüsho Israel alala trüngmukhung.

⁷ Api yü tüsho apinü Juda kiulongthsüpuh Jehoshaphat kilim thiyu yüshih, “Moab kiulongthsüpuhnü I azhihdo; Moab kheak thirithsüpü nü I lung arünahnü?” Apinü alo, “I arübah; I nü lung lah, I mihtsürü ju nü mihtsürü, I khorabo ju nü khorabo.”

⁸ Judüki apinü keokhi, “ Küpü limronü isa yüba?” Jehoramnü alo, “Edom sunglo limronü.”

⁹ Jumonü Israel kiulongthsüpuh, Juda kiulongthsüpuh, tüsho Edom kiulongthsüpuh tsahmusu; tüsho arübo nimung thüne tsah dunglim, bonungrü le arü lung bekhi shiwühbo thsungkheak ke musuhde kam.

¹⁰ Judüki Israel kiulongthsüpuhnü tha, “Aha! Kiulongthsürü mahsam Moab kilim jihpü lang Atungpuhnü isa jia lah.”

¹¹ Tüshe Jehoshaphatnü tha, “Atungpuh ki isanü keoakheahpü thsüde ha ching Atungpuh wukihrü müla de?” Judüki Israel kiulongthsüpuh yamlarü khülangnü alo, “Elija khah kheak ke bukkihde alabuh, Shaphat tsührü Elisha ha ching lah.”

¹² Jehoshaphatnü tha, “Atungpuh yu api lung lah.” Jumonü Israel kiulongthsüpuh le Jehoshaphat tüsho Edom kiulongthsüpuh api kilim yüki.

¹³ Elishanü Israel kiulongthsüpuh ki tha, “Inü nü kheak tümü thsüpü la? Nü buh yungsho nü be wukihrübo kilim yüang.” Tüshe Israel kiulongthsüpuhnü api ki tha, “Yung; kiulongthsürü mahsam Moab kilim jihpü lang Atungpuhnü isa jia lah.”

¹⁴ Elishanü tha, “Atoachang Atungpuh inü atankihbuh lale, Juda kiulongthsüpuh Jehoshaphat ki inü akin müjihkhülaa, inü nü kheak mükheah yungsho nü mümükheah.

¹⁵ Tüshe I kilim khün thsürü bede arang.” Tüsho küyimki khün thsübuhnü kingde alakhea, Atungpuh wu api kheak arü.

¹⁶ Tüsho apinü tha, “Atungpuhnü ha thachoh, ‘Inü ha ayung kerubonü amishihbah.’

¹⁷ Tümüde Atungpuhnü ha thachoh, ‘Nünü apung yungsho tsüng müngü, tüshe ayung ju kenü amishihbah, junangde nüsa, nüsa akam-shiwühbo, nüsa moshibonü ayungbah.’

¹⁸ Ha Atungpuh miki athülih rhimo lah, tümüde apinü Moab she nü kilim jihbah.

¹⁹ Nünü chipi ayünkhi kiuto alala tüsho amokhitkhi kiuto kukbah; sang atsübo nünü akeamshihbah, kenü alala nünü ayihdobah, tüsho alo atsübo nünü lungbonü athsümünimbah.”

²⁰ Ashidopü, yapsu kingaünpü kim ngüm, zukleangnü Edom limpeangnü ke bukmusubah lomi ju kenü bukmi.

²¹ Küyimki kiulongthsürübo arü bede keochihpü atua lah de Moabrünü asokhea, azürünü azorü khiungde, thsühnuk shuhsorü alala jikhit tüsho shihkhin thsübah aredungyean yü.

²² Küyimki arü yapsu mükikde asürükhea, tüsho animung aninü ke kheak tahkihkhea, Moabrünü arü mikhuh lakhi ke ju thiyih nangde mürümdo ngü.

²³ Arünü tha, “Ha thiyih ah; kiulongthsürübo rukhüh keochihbah, arü zangzang laksah-a lah khunuh. Dale kheakü, ayankhikhi kheahpü yüanü!”

²⁴ Tüshe küyimki arübo Israel binkheampung ching arükhea, Israelrübo asürü tüsho Moabrü yande, arü müngüh arü tsoshih; arünü Moab ching yüzahbah mutuklode yan.

²⁵ Kiutobo arünü thsümünim, tüsho alo atsübo kheak murhungdoyi khiungde arü abannü lung jipa bah; kenü aban arünü yihdo, tüsho sang atsü aban arünü kiushaka keamshih. Akheam ching lunghitrünü zündode yan, tüsho Kir-heres kiuying aning.

²⁶ Küyimki Moab kiulongthsüpuhnü api azhihde keochihkhi ngükhea, apinü Edom kiulongthsüpuh mikhuh ching lakashungde ayüpü, api lung thsühnuk shuhrü mihtsürü 700 be; tüshe arünü müthsükhuk.

²⁷ Judüki api khah müthripü lakhi atsührü athrürü adüjibuh apinü lu, tüsho chipi kheak taka kingaünkhi jih. Tüsho bukakhiukkhi ato Israel kheak arü, jumonü arünü api kheaknü tuklo tüsho arü nihbuh lomi lim alode yü.