2 KIULONG THSÜRÜ 25 - AMÜSÜH HÜM CL Bible (BSI)

Jirusalem Lungkhi

¹ Zedekia kiulongthsü kam tukupü ching, khinu thürü, nimung thürü nipü, Nebukednezar Babilon kiulongthsüpuh lung api bonungrü alala bebah Jirusalem azhihde arü. Apinü kiuto aleanglim bin tüsho ju mükamde ayanpung thsü.

² Junangde Zedekia kiulongthsü kam thürükheak khülang khiungde kiuto ju ayandokhi khüp lakheah.

³ Khinu phüyi, nimung tuku nipü kiuto ching khümzung khide phünahde kam, junangde lomi mihtsürübo thsungkheak tsühyungbe mülade alakheah.

⁴ Judüki kiuto chipi ching ahopung thsakham; Kaldearünü kiuto mükamde zündodo she kiulongthsüpuh lung bonungrü alala kiulongthsüpuh shahwün ki, chipi mahne dükeak ripit chingnü tsoabah. Arünü Araba thrippeang yü.

⁵ Tüshe Kaldea bonungrünü kiulongthsüpuh müshamde yü, tüsho Jirikho dükhün chingnü api tholo; anihbuh bonungrü alalanü api bahbah hiumüzüt.

⁶ Jushu arünü kiulongthsüpuh ram tüsho Ribla ching api Babilon kiulongthsüpuh kilim bede atu tüsho api thaa sheshih.

⁷ Arünü Zedekia tsührübo api mük kinü laksah, jushu Zedekia mükjibo khünkhit; arünü api wuhrünliunü rhükbah Babilon lim bede yü.

Arüngyam Thsümünimkhi

⁸ Khinu phüngü, nimung thüne nipü–küpü Nebukednezar Babilon kiulongthsü kam thürükheak tukupü lakhea–Nebukednezar, mih-aheangrü wühkenobuh, Babilon kiulongthsüpuh yamlarü Jirusalem ching arü.

⁹ Apinü Atungpuh yam, kiulongthsüpuh yam, tüsho Jirusalem yambo alala takabah; thüyam atotobo apinü takabah.

¹⁰ Aheangrü wühkenobuh lung bekhi Kaldea bonungrübonü Jirusalem mükamde chipi kingkheam.

¹¹ Nebuzaradan aheangrü wühkenobuhnü kiuto ching aninga lakhi, Babilon kiulongthsüpuh kinü atsorü, aningkhi mihtsürü alala ramtso ching bede yü.

¹² Tüshe aheangrü wühkenobuhnü ju lomi ching zhochih traktrak mihtsürü kurungasolu tüsho thulu wochakshihpü aninga lashih.

¹³ Atungpuh yam ching lakhi müwayinchi dungjingbo, lolungbebo tüsho müwayinchi kekung, Kaldearünü adütre kamde kingthünak, tüsho müwayinchi ju Babilon ching hande yü.

¹⁴ Arünü phühbo, alo-thsukbe, moyihmütbe, rhümthüneabe thsungkheak mopungphüh, tüsho arüngyam ching mukhungmüdanki ahoribe müwayinchi kukrukbo alala lude yü.

¹⁵ Suna tüsho shotoyinchi müthsünnü athsükhi mophühbo tüsho müsühmüraphurubo, aheangrü wühkenobuhnü lubah yü.

¹⁶ Atungpuh yam thsungkheak Solomonnü athsükhi dungjing mahne, kekung khülang, tüsho lolungbebo, harü müwayinchi kukrukbo ju madünkhambe lakheah.

¹⁷ Dungjing khülang ju achanglim khahnap 18 lakheah; aku düthrün ju khahnap 3nü thsü; müwayinchinü lang keakrude tüsho tsarümkiu thsüa aku mükamde yihkih. Dungjing mahnepü she ju ruk keakrude thsüa lakheah.

Juda Mihtsürü Babilon lim Bede Atsokhi

¹⁸ Aheangrü wühkenobuhnü Seraia achangbe amükeambuh, ju khinbuh Zephania amükeambuh tüsho ripit-limro aheangrü 3 bea lu;

¹⁹ kiuto chingnü apinü bonungrü limthobuh, tüsho kiulongthsüpuh yo kiuthsü-binkiu mihtsürü 5 kiuto ching lakhi, bonungrü limthobuh athrütbuh, shepünü lomi mihtsürü trüngmukhungkhea; tüsho kiuto ching lakhi lomi mihtsürü 60 bea lu.

²⁰ Nebuzaradan aheangrü wühkenobuhnü arü bea lubah Ribla ching Babilon kiulongthsüpuh kilim arü.

²¹ Babilon kiulongthsüpuhnü arü kinga lungshih tüsho Hamath lomi Ribla chingnü arü sheshih. Jumonü lomi bahbah Juda ramtso ching yü.

Juda Kovünor Gedalia

²² Nebukednezar Babilon kiulongthsüpuhnü aninga lashihkhi, Juda lomi ching mihtsürübo kurungkheak kovünor thsüshihpü apinü Shaphan tsührü Gedalia mokhit.

²³ Küyimki Babilon kiulongthsüpuhnü Gedalia ju kovünor mokhitkhi thirithsürü wühkenorü alala tüsho arü mihtsürübonü asokhea, arünü arü lung mihtsürübo bebah Gedalia kilim Mizpa ching Nethania tsührü Ishmael, Karea tsührü Johanan, Netopharü Tanhumeth tsührü Seraia, tüsho Maakathrü tsührü Jaazania arü.

²⁴ Gedalianü arü le arü mihtsürü ki thiyuchihchimde tha, “ Kaldea atorübo dünkheaknü dütre; lomi ching laang, Babilon kiulongthsüpuh tankihang, tüsho nüsa tsüde alabah.”

²⁵ Tüshe khinu thünepü ching kiulongthsürü yamkhün chingnü Elishama tsührü Nethania tsührü Ishmaelnü mihtsürü 10 bebah arü; arünü api kinga lungshih, junangde, Mizpa ching api lung larü Judarü tüsho Kaldearü sheabah.

²⁶ Judüki mihtsürü alala, achangbe tüsho abobe tüsho thirithsürü wühkenorübonü tsahmusu tüsho Ijip ching yü; tümüde arünü Kaldearü trede alakheah.

Jehoiakin Rihyam chingnü Adükhekhi

²⁷ Jehoiakin Juda kiulongthsüpuh ramtso ching yükhi kam samrükheak thünepü, khinu thürükheak mahne, nimung mukukheak thüne nipü Evil-merodak Babilon kiulongthsüpuh api kiulongthsü tankih kam Jehoiakin Juda kiulongthsüpuh rihyam chingnü dükhe;

²⁸ apinü mihmuzhode api ki asuk, tüsho Babilon ching api lung lakhi püpürü kiulongthsürü kurungkheak api kilim binkiu atobe jih.

²⁹ Jumonü Jehoiakinnü anihbuh rihyam khim müthriabah. Api rhangdung ching nimung aban mutukzhakde kiulongthsüpuh miki tsühyungde alakheah.

³⁰ Tümüde api rhangdung lakhi amuyung, nimung aban shihcham mutukzhakde kiulongthsüpuhnü api kilim jih.