2 KIULONG THSÜRÜ 23 - AMÜSÜH HÜM CL Bible (BSI)

Josianü Tangzüng Aso Kamloshihkhi

¹ Judüki kiulongthsüpuhnü Juda tüsho Jirusalem azothsürübo api ki mukhungpü thiyu jih.

² Kiulongthsüpuhnü Atungpuh yam ching wutu, tüsho Juda mihtsürü alala, Jirusalem ching larü alala, amükeamrübo, wukihrübo, tüsho mihtsürü alala, aninirü tüsho atorü api lung yü; Atungpuh yam chingnü angükhi tangzüng hüm yubo alala arünü sode apinü khe.

³ Kiulongthsüpuhnü dungjing ki zhip tüsho api yukhümbo, yakzanbo, thiyuzüngbo ha hüm ching thrüta lakhi tangzüngkhi yubo rhimode Atungpuh yanpü api miki tangzüng khülang thsü. Mihtsürü alalanü tangzüngkhi ching arihde yan.

⁴ Kiulongthsüpuhnü Hilkia achangbe amükeambuh, api khin amükeamrübo, tüsho ripit neakrübo ki Baal, Ashera, tüsho chiningbo thsungkheak thsükhi kukrukbo alala Atungpuh arüngyam chingnü lude akhiukshihpü thiyukhüm jih; apinü jurübo Jirusalem aleanglim Kidron mükeak chingnü tak tüsho awahbo Bethel ching hande yü.

⁵ Juda kiulongthsürübonü Juda kiuto tüsho Jirusalem mühide achang dangpungbo ching kingaün jihshihpü sangthsü amükeamrübo müsühde tsangkhitrü–Baal, ani, khinu, alomibo, chiningbo kingaünrü rhimo chingnü yihkhita bah.

⁶ Apinü Atungpuh yam chingnü Ashera sangthsü yihkhitbah Jirusalem aleanglim, Kidron ayung lim lude yünü takbah asungthulung kamde kingnak tüsho asungthulung ju mihtsürü dümung kiuyukbo kheak bah.

⁷ Apinü Atungpuh yam ching lakhi athrürü müzammüramrü yambo, aliberübonü Ashera khilim keaklahpungbo luka bahjih.

⁸ Apinü Juda kiutobo chingnü amükeamrü alala bekhit, tüsho Geba kheaknü Beersheba khiungde amükeamrübonü kingaün jihpung achang dangpungbo alala thsümünim; apinü kiuto ripit huzulim lakhi kiuto kovünor Jihusua ripit limro achang dangpungbo lukabah.

⁹ Tütüshe achang dangpungbo amükeamrübonü Jirusalem ching Atungpuh kingaün sadam ki matu, tüshe arü buhtsührü lung phaüm muyukkhi yikhap tsüh.

¹⁰ Apinü Ben-hinnom ching lakhi Topheth thsümünim, junangde shenü she tsührü athrürü yungsho aliberü Molek kilim monü taka mükingaün.

¹¹ Juda kiulongthsürünü ani kilim müsühkhitkhi khorabo, Atungpuh yam ripit ki, mahkhappung ching atorü, Nathan-melek khiungshak ki lakhi apinü yihkhita bah; tüsho apinü ani yo khoralolungbebo monü takabah.

¹² Ahaz khiungshak kumung lakhi kingaün sadam, küpü Juda kiulongthsürübonü athsükhea, tüsho Manasenü athsükhi Atungpuh yam khiungshak mahne ching lakhi kingaün sadam, kiulongthsüpuhnü lukbah adütre kamde yihthünak, tüsho lungjinimbo Kidron ayung ching jipa bah.

¹³ Kiulongthsüpuhnü Jirusalem aniakhiuklim lakhi achang dangpungbo Athsümünim Wung düjinglim lakhi, Israel kiulongthsüpuh Solomonnü Sidonrü athraneanbe Astar thsükhi, Moabrünü athraneanbe Kemosh thsungkheak, tüsho Amon mihtsürünü athraneanbe Milkom thsungkheak thsükhi thsümünim.

¹⁴ Apinü dungjingbo adütre kamde yihthünak, Ashera sangthsübo kiushak, tüsho ju dangpungbo ching mihtsürü robonü danglo.

¹⁵ Kheaküshe, Nebat tsührü Jeroboamnü Israel neak yihbeakshihde athsükhi Bethel ching kingaün sadambo tüsho achang dangpungbo lukabah. Apinü achang dangpung takbah asungthulung kamde züthünak; apinü Ashera sangthsü she tak.

¹⁶ Josia rholochoki apinü awung kheak kiuyukbo lakhi ngü; apinü yüshih tüsho kiuyukbo chingnü robo yihkhit, tüsho jurübo kingaün sadam kheak tak, tüsho amuni Jeroboam kingaün sadam ki zhipchoki, Thrünpuh mihtsürünü azhiyukkhi Atungpuh yu yande ju müneanshih; apinü rholo tüsho harü müchitbuh Thrünpuh mihtsürü kiuyuk lim abinkhih-a kheah.

¹⁷ Judüki apinü tha, “Inü ngüde alakhi lung-khimkhi ju tümü a?” Kiuto mihtsürübonü api ki tha, “Ha Juda chingnü arübah nünü Bethel ching lakhi kingaün sadambo azhihde arhimokhi dünkheak harü müchitkhi Thrünpuh mihtsürü kiuyuk ah.”

¹⁸ Apinü tha, “Api jude zojang; shenü she api robo düyeahkhin.” Jumonü arünü api robo yungsho Samaria chingnü arükhi wukihrü robo zojih.

¹⁹ Kheaküshe, Israel kiulongthsürübonü rhimode Atungpuh bukakhiukshihkhi, Samaria ching lakhi achang dangpung kingaünpungbo Josianü alala lukabah; apinü Bethel ching rhimokhi nangde jurü kheak rhimo.

²⁰ Apinü ju ching larü achang dangpung amükeamrü alala kingaün sadam kheaknü laksah, tüsho arü kheak mihtsürü robo tak. Jushu api Jirusalem lim alode yü.

Josianü Phungho-thünio Mungkhi

²¹ Kiulongthsüpuhnü mihtsürü alala ki thiyukhüm jih, “Ha tangzüng hüm ching thaa lakhi nangde Atungpuh nü Thrünpuh kilim phungho-thünio mungang.”

²² Israel mahkhaprü, yungsho Israel kiulongthsürü yungsho Juda kiulongthsürü nimungbo chingnü hadürü phunghothünio mümungakheah;

²³ tüshe Josia kiulongthsüpuh kam thürükheak tizheahpü ching ha phungho-thünio Atungpuh miki Jirusalem ching mung.

Josianü Amüthrikhi Püpübo

²⁴ Kheaküshe Josianü akhasherü, thümürü, yambuk thrünpuhbo, sangthsübo, tüsho Juda le Jirusalem lomi ching ngükhi athraneanbe alala yihkhita bah, junangde Hilkia amükeambuhnü Atungpuh yam chingnü angükhi hüm ching thrüta lakhi yubo apinü düküngde zo.

²⁵ Mosa yakzan ching lakhi nangde, api mulong athrünkhinü, me athrünkhinü, sulüm athrünkhinü Atungpuh kilim rholokhi nangde api müngüh kiulongthsürü sheshe api ruk mülakheah; yungsho api dunglim sheshe api ruk masürü.

²⁶ Judüalalashe, Manasenü abukakhiukshihkhi alala dünkheaknü Juda azhihde api bukakhiukkhi chingnü Atungpuhnü murholo.

²⁷ Atungpuhnü tha, “Inü Israel yihkhita bahkhi nangde, I mikinü Juda she yihkhita bahbah; tüsho inü amokhitkhi ha Jirusalem kiuto tüsho I mung ju ching labah de inü athakhi yam inü abahyukbah.”

Josia Kiulongthsü Akheam Thsükhi

²⁸ Kheakü aningkhi Josia rhimobo, tüsho apinü arhimokhi alala, Juda kiulongthsürübo yukhean hüm ching thrüta müla de?

²⁹ Api nimungbo ching Ijip kiulongthsüpuh Pharao Nekonü Asiria kiulongthsüpuh kilim Euphra ayung ching wutu. Josia kiulongthsüpuhnü api shorupü yü; tüshe küyimki Pharao Nekonü Megiddo ching api shorukhea, apinü anihbuh laksah.

³⁰ Api yamlarübonü khora-lolungbe ching shea hanbah Megiddo chingnü Jirusalem ching arü, tüsho mibahpung ching kiuyukabah. Lomi mihtsürübonü Josia tsührü Jehoahaz lubah mujude-mokhit, tüsho abuh müthri api kiulongthsürü kamshih.

Juda Kiulongthsüpuh Jehoahaz

³¹ Jehoahaz kiulongthsüpü tankihchoki api kam 23 azorü lakheah; apinü Jirusalem ching khinu mahsam kiulongthsü. Abe mung ju Libnarü Jeremia tsührü Hamutal lakheah.

³² Api jipürünü arhimokhi nangde apinü Atungpuh miki amütsü rhimo.

³³ Apinü Jirusalem ching kiulong müthsüshihpü thsüde, Pharao Nekonü Hamath lomi, Ribla ching api rama zo, tüsho lomi kheaknü shotoyinchi khahngak 3400 tüsho suna khahngak 34nü ruk lupü tha.

³⁴ Pharao Nekonü Josia tsührü Eliakim anihbuh abuh müthri kiulongthsürü kamshih, tüsho api mung Jehoiakim müthrijih. Tüshe apinü Jehoahaz bebah tso; api Ijip ching arü tüsho ju ching sheabah.

Juda Kiulongthsüpuh Jehoiakim

³⁵ Jehoiakimnü shotoyinchi tüsho suna Pharao kilim jih, tüshe Pharaonü sho kheangkhi jihpü thsüde lomi kheaknü ruk thre. Pharao Neko kilim jihpü arü lakhi thülünnü lomi mihtsürübo kheaknü apinü shotoyinchi tüsho suna threa lu.

³⁶ Jehoiakim kiulongthsüpü tankihchoki api kam 25 azorü lakheah; apinü Jirusalem ching kam thürükheak khülang kiulongthsü. Abe mung ju Rumarü Pedaia tsührü Zebida lakheah.

³⁷ Anihbuh jipürübonü arhimokhi nangde, apinü Atungpuh miki amütsü rhimo.