2 KIULONG THSÜRÜ 22 - AMÜSÜH HÜM CL Bible (BSI)

Juda Kiulongthsüpuh Josia

¹ Josia kiulongthsüpü tankihchoki api kam 8 azorü lakheah. Apinü Jirusalem ching kam samrükheak khülang kiulongthsü. Abe mung ju Bozkathrü Adaia tsührü Jedaia lakheah.

² Apinü Atungpuh miki alungki rhimo, tüsho abuh David limro alala ching tsah; apinü tsülim yungsho huzulim manguh.

Yakzan Hüm Ngülokhi

³ Kiulongthsüpuh kam thürükheak tizheahpü ching, apinü Meshullam tsührü Azalia tsührü athrütbuh Shaphan Atungpuh yam ching yüshihde tha,

⁴ “Hilkia achangbe amükeambuh kilim wutuang, tüsho ripit aheangrünü mihtsürübo kheaknü athremukhungkhi sho alala apinü kheshang;

⁵ ju Atungpuh yam thsürü aberü khah ching jihshang; arünü ju Atungpuh yam thsülorübo kilim jihshang,

⁶ ju sangrhimosorü, athsürübo, lungzünrü kilim; tüsho arünü ju arhütsang le akingarihkhi lung thüyam thsülopü thulopü ching bahshang.

⁷ Tüshe arü khah ching jihkhi sho chingnü mütsanmüküh mükheang, tümüde arünü thiyuronü rhimochoh.”

⁸ Hilkia achangbe amükeambuhnü athrütbuh Shaphan ki tha, “Inü yakzan hüm Atungpuh yam ching ngüdo.” Küyimki Hilkianü hüm Shaphan kilim jihkhea, apinü ju khe.

⁹ Judüki athrütbuh Shaphannü kiulongthsüpuh kilim arü tüsho api kilim thiyusheak jih, “Nü yamlarübonü thüyam ching lakhi sho yihkhita ludo, tüsho Atungpuh yam rhimorü aberü khah ching jihdo.”

¹⁰ Athrütbuh Shaphannü kiulongthsüpuh ki mükheahshih, “Hilkia amükeambuhnü I kilim hüm khülang jihkheah.” Shaphannü ju achangnü kiulongthsüpuh ki khe.

¹¹ Küyimki kiulongthsüpuhnü yakzan hüm yubo sokhea, apinü khimbo thorüp.

¹² Judüki kiulongthsüpuhnü Hilkia amükeambuh, Shaphan tsührü Ahikam, Mikaia tsührü Akbor, athrütbuh Shaphan, tüsho kiulongthsüpuh yamlarü Asaia ki thiyukhüm jihde tha,

¹³ “Yüang, ha ngükhi hüm yubo dünkheak I, mihtsürübo, tüsho Juda alala thsungkheak Atungpuh ki keoang; tümüde isa azhihde Atungpuh bukakhiukkhi tolah, tümütüsho isa jipürünü isa dünkheak thrütkhi alala yande rhimode ha hüm yubo mania lah.”

¹⁴ Jumonü Hilkia amükeambuh, Ahikam, Akbor, Shaphan, tüsho Asaianü arüngyam shungliu neakbuh Harhas tsührü, Tikva tsührü Shallum niube amükeambe Hulda kilim yü; alibe Jirusalem ching thüyam mahnepü ching lakheah, ju ching arünü anihbe ki asukachih.

¹⁵ Alibenü arü ki tha, “Atungpuh Israel Thrünpuhnü ha thachoh: Nüsa I kilim arüshihbuh mihtsürü ki thaang,

¹⁶ Atungpuhnü ha thachoh, Juda kiulongthsüpuhnü akhekhi hüm yubo yande, atsütsü ha dangpung tüsho mihtsürübo kheak inü thsümütsü handarübah.

¹⁷ Tümütüsho arünü I bahyuk tüsho püpü thrünpuhbo kilim kingaün jih, junangde arü khah rhimo alalanü I bukakhiukshih, jumonü ha dangpung azhihde I bukakhiukbah, tüsho ju müzünmüt.

¹⁸ Tüshe Juda kiulongthsüpuh kilim Atungpuh ki keokhishihpü shepünü nüsa thiyikhea, nüsanü api ki thaang, A TUN GPU H Israel Thrünpuhnü ha thachoh: Nünü asokhi yubo dünkheak:

¹⁹ tümütüsho arübo zhikrangkhündo akampü tüsho muthrumüneanpü ha dangpung tüsho mihtsürübo azhihde inü athachoki nünü sobah nü mulong azhihayihde nünü Thrünpuh miki mushu, tüsho nünü nü khimmih thorüp, tüsho I miki trip, inü she nü ki sojihdo, Atungpuhnü thachoh.

²⁰ Jumonü inü nü nüsa jipürü lung yüshihbah, tüsho nü nihbuh kiuyuk ching mungtsü chingnü yüzahbah; inü ha dangpung ching thsümütsü alala hande arüpü lakhi nü müknü müngü.” Arünü thiyusheak lulobah kiulongthsüpuh kilim yü.