2 KIULONG THSÜRÜ 21 - AMÜSÜH HÜM CL Bible (BSI)

Juda Kiulongthsüpuh Manase

¹ Manase kiulongthsüpü tankihchoki anihbuh kam 12 azorü lakheah; apinü Jirusalem ching kam thünimkheak phüngü kiulongthsü. Abe mung Hephziba lakheah.

² Atungpuhnü Israel müngüh yankhita bahkhi trükshihbonü arhimokhi yande, apinü Atungpuh miki amütsü rhimo.

³ Tümüde apinü abuh Hezekianü luka bahkhi achang dangpungbo thsülo; kiulongthsüpuh Ahabnü athsükhi nangde apinü Baal kingaün sadam, Ashera sangthsü thsü, chiningbo alala kingaün tüsho arübo tankih.

⁴ Apinü Atungpuh yam ching kingaün sadambo thsü, küpü Atungpuhnü tha, “Jirusalem ching inü I mung zobah.”

⁵ Apinü Atungpuh yam dükeak mahne ching chiningbo alala thsungkheak kingaün sadambo thsü.

⁶ Apinü atsührü monü taka kingaün, apinü müchityu tha tüsho lümrük thsü, tüsho akhasherü le thümürü ki keokhi. Apinü Atungpuh miki amütsü khide rhimode api bukakhiukshih.

⁷ Apinü athsükhi Ashera sangthsü anihbuhnü lu tüsho arüngyam ching yuk, küpü Atungpuhnü David tüsho atsührü Solomon ki tha, “Ha yam, tüsho Jirusalem ching, küpü Israel trük alala chingnü inü mokhitkhea, inü lünnü I mung zobah;

⁸ arünü lang inü thiyukhüm jihkhi tüsho I yamlarü Mosanü thiyukhüm jihkhi yakzan alala yande kümkangde rhimosho inü arü jipürü kilim jihkhi lomi chingnü kheaküa Israel mütsahkhitshih.”

⁹ Tüshe arünü mani, Atungpuhnü Israel müngüh dükheakshihkhi trükshihbonü arhimokhi kheaknü alü Manasenü amütsü rhimopü arü bemüchih.

¹⁰ Atungpuhnü api yamlarü wukihrübo hode tha,

¹¹ “Tümütüsho Juda kiulongthsüpuh Manasenü harü athraneanbebo yihbeak, api müngüh larü Amorrü kheaknü alü amütsü rhimodo, tüsho Juda she api sangthsübo lung neak yihbeakshih;

¹² jumonü Atungpuh Israel Thrünpuhnü ha thachoh, Inü Jirusalem tüsho Juda kheak amütsü hande arüchoh, junangde ju sorübo nükhün jingjingbah.

¹³ Samaria thsungkheak akebe-liu, tüsho Ahab yamkhün thsungkheak awukbe-liu inü Jirusalem binghode ayübah; khürünü phuru müsühkhi nangde inü Jirusalem nana bahbah tüsho aniukphülapbah.

¹⁴ Inü I yamrüplurüp aningkhi bahyukbah, tüsho arü riri khah ching jihbah; arübo ju arü riri alala miki thsünükhi tüsho yankhia lukhi kambah,

¹⁵ tümütüsho arünü I miki amütsü rhimodo tüsho arü jipürü Ijip chingnü akhiukkhi nimungnü khihni khiungde I bukakhiukshih.”

¹⁶ Kheaküshe apinü Juda neak yihbeakshihde arünü Atungpuh miki amütsü rhimokhi kheak khiode, Manasenü Jirusalem akheamnü akheam khiungde mümiyi khiungde amülim mükihrü thiyih hihde bukshih.

¹⁷ Kheakü aningkhi Manase rhimobo, apinü arhimokhi alala, tüsho apinü ayihbeakkhi neak, Juda kiulongthsürübo yukhean hüm ching thrüta müla de?

¹⁸ Manase nihbuh jipürü lung yap, tüsho api yam shahwün, Uzza shahwün ching kiuyukabah. Anihbuh tsührü Amonnü api müthri.

Juda Kiulongthsüpuh Amon

¹⁹ Amon kiulongthsüpü tankihchoki kam 22 azorü lakheah; apinü Jirusalem ching kam mahne kiulongthsü. Abe mung Jotbarü Haruz tsührü Meshullemeth lakheah.

²⁰ Abuh Manasenü arhimokhi nangde, apinü Atungpuh miki amütsü rhimo.

²¹ Abuhnü atsahkhi limro alala ching apinü tsah, abuhnü tankihkhi sangthsübo tankih, tüsho arü kingaün;

²² apinü anihbuh jipürü Thrünpuh, Atungpuh bahyuk, tüsho Atungpuh limro ching mütsah.

²³ Amon yamlarübonü api azhihde rük thsü, tüsho kiulongthsüpuh ju anihbuh yam chingnü laksah.

²⁴ Tüshe lomi mihtsürübonü kiulongthsüpuh Amon azhihde rük thsürü alala laksah, tüsho mihtsürübonü api tsührü Josia anihbuh müthri kiulongthsüshih.

²⁵ Kheakü aningkhi Amonnü arhimokhibo Juda kiulongthsürübo yukhean hüm ching thrüta müla de?

²⁶ Api Uzza shahwün ching kiuyukabah; jushu anihbuh tsührü Josianü api müthri.