2 KIULONG THSÜRÜ 20 - AMÜSÜH HÜM CL Bible (BSI)

Kiulongthsüpuh Hezekia Ngukhi

¹ Judüki nimung ching Hezekia tukthsü tüsho ashepü thsüde alakheah. Amoz tsührü wukihbuh Isaia api kilim arü tüsho tha, “Atungpuhnü ha thachoh: Nü yam tsüde tsanglunga zoang, tümüde nü ashebah, nü mungu.”

² Judüki Hezekianü api miro rhü lim anguh tüsho Atungpuh ki tamkhüntamnü:

³ “O Atungpuh , inü nü ki zhoshechoh, inü thiyuronü nü miki mulong shuhmülanga jihde atsahkhi tüsho alungki rhimokhi kheakü lümkhitjang.” Hezekianü düsüknimde trip.

⁴ Isaia thüyam khiungshak aphulungbe muhoyide, Atungpuh yu api ki arü:

⁵ “Rholoang, tüsho I mihtsürü yakzanshuhbuh Hezekia ki thaang, Nü pü David Thrünpuh, Atungpuhnü ha thachoh: Inü nü tamkhüntamnükhi sodo, inü nü chike ngüdo; atsütsü, inü nü thsüngubah; nimung asam nipü nü Atungpuh yam ching wutubah.

⁶ Inü nü rhangdung ching kam 15 yukajakjihbah. Inü nü tüsho ha kiuto Asiria kiulongthsüpuh khah chingnü abekhitbah; I tüsho I yamlarü David mung chingnü ha kiuto tsungdojihbah.”

⁷ Judüki Isaianü tha, “ Khubaso zhihzhih lude arang. Arünü ju lubah mü kheak mujushang, junangde api angubah.”

⁸ Hezekianü Isaia ki tha, “Atungpuhnü I thsüngupü tüsho nimung asampü ching I Atungpuh yam ching wutupü amütsan tümü laba?”

⁹ Isaianü tha, “Ha Atungpuh kilimnü nü kilim amütsan ah, junangde Atungpuhnü alokhikhi rhimobah: me mikhuhlim jingdükü 10 yüba shi, dashi dunglim jingdükü 10 yüloba?”

¹⁰ Hezekianü alo, “Me mikhuhlim jingdükü 10 yüpü athülihbe ah, tüshe me dunglim jingdükü 10 yüloshang.”

¹¹ Wukihbuh Isaianü Atungpuh ki zhi; tüsho Atungpuhnü me Ahaz sadam leak kheak jingdükü 10 alode yüshih.

Babilon chingnü Yunithsürü

¹² Ju kim ching Baladan tsührü Babilon kiulongthsüpuh Merodakbaladannü kihüm tüsho thsambah mühahbah yunithsürübo Hezekia kilim yüshih, tümüde apinü Hezekia tukthsüde alakheah de so,

¹³ Hezekianü arübo leangkhi; apinü arü ki anihbuh rahpung-yam alala, shotoyinchi, suna, rhümthüneabe mungjibo, shoto müdangke, zülu, api kukruk zopung-yam ching lakhi alala huh; Hezekianü api yam ching yungsho api kiulongthsü ching muhuhkhi tümü she mülakheah.

¹⁴ Tüsho wukihbuh Isaianü kiulongthsüpuh Hezekia kilim arü, tüsho api ki tha, “Harü mihtsürübonü tümü thade, tüsho arübo küchingnü nü kilim arükhea?” Hezekianü alo, “Arübo limshu lomi, Babilon chingnü arükheah.”

¹⁵ Apinü tha, “Arübonü nü yam ching tümü ngüde?” Hezekianü alo, “Arünü I yam ching lakhi alala ngüdo; inü I kukruk zopung-yam ching arü ki muhuhkhi tümü müla.”

¹⁶ Judüki Isaianü Hezekia ki tha, “Atungpuh yu aniang:

¹⁷ Nü yam ching lakhi alala, tüsho nü pü pürünü khihni khiungde azomukhungkhi Babilon lim hande atsopü nimung arüchoh; tümü she maning, Atungpuhnü thachoh.

¹⁸ Nü kilim zübejihkhi tsührü athrürü khürü hande atsobah; arübo Babilon kiulongthsüpuh yam ching dukhabo labah.”

¹⁹ Tüsho Hezekianü Isaia ki tha, “Nünü athakhi Atungpuh yu tsülah.” Tümüde apinü lüm, “I rhangdung kim ching mungtsü tüsho kurampung mülaba de?”

Hezekia Kiulongthsü Akheam

²⁰ Aningkhi Hezekia rhimobo, api wu-sühmüh alala, apinü kekhip tüsho keru kiubah kiuto ching ke münitde arükhi, Juda kiulongthsürübo yukhean hüm ching thrüta müla de?

²¹ Hezekia nihbuh jipürü lung yap; tüsho atsührü Manasenü api müthri.